SABIDURÍA 13 - Guarani Bible with DC

Mbaemboete yasɨtata reta pegua jare ïru mbae ɨvɨ rupigua reta pegua vae

1Oata ete kavi ko arakuaa re

opaete kuimbae reta Tumpa oikuaambae yogüɨreko vae;

jae reta, jeta mbae ikavigüe oecha reve ko

mbaetɨ güɨrovia reta jókuae añetete oime oikove oiko vae;

jae reta ko, jembiapo reta oecha reve,

mbaetɨ oväe reta kia ko oyapo vae.

2Jökorai ramo, jae reta güɨreko itumparä kuae ɨvɨ pe oporookuai vae reta

jae ko tata, u,

amapɨtu, yasɨtata reta ara re ñogüɨnoi vae,

ɨ tɨpɨ vae jare yasɨ kuaraɨ ara re ñogüɨnoi vae.

3Opaete jókuae reta ipöragüe re jae reta täta oyemboyerovia

jare opoko oyapo reta itumparä,

oime vaerägüe oikuaa reta tei pea ma ikavi vae

jae ko opaete jae reta iTumpa vae,

echa jae, jae ko opaete mbae ipöra vae iyapoa jae ko opaete oyapo.

4Jare oecha reta ramboeve jókuae mbae reta imbaepuere,

ipuere tëi oyemongeta reta ma ko imbaepuere iyapoa vae;

5echa, yaecha ramboeve mbae tuicha vae jare ipöra yae oyeapo vae,

ipuere ou yayemongeta vaerä jare yaikuaata kia ko jare iyapoa vae.

6Ërei ngatu, mbaetɨ vi yandepuere yamboeko mbatee vaerä jókuae kuimbae reta,

echa ipuere vi jae retai oyembojopa

Tumpa oeka yogüɨreko peve echa oipota tëi oväe reta chupe.

7Oiko oiko reta Tumpa jembiapo ipɨte rupi, oipota tëi oyemboe reta jese,

jare oyembotavɨuka reta oecha ikavi vae pe,

echa mbae oecha reta vae añetete täta ikavi.

8Ërei ngatu, mbaetɨ ma ko mbae re omboya reta vaerä,

9echa ko oime tei chupe reta ma oikuaa kavi vaerä,

oyemboe reta vaerä opaete mbae re,

¿maera pa oekaä reta tenonde oikuaa vaerä opaete vae iTumpa?

Mbaemboete tumpa-raanga pegua

10¡Aa jae täta ko paravete

jókuae tumpa jei yogüɨreko kuimbae iparavɨkɨ pe vae,

mbae oro pegua vae jare korepoti pegua, täta oyeapo kavi vae,

mbae iä reta pegua vae,

ita jepɨmbae vae, arakae ma kia jókuae pegua ipoki vae oyapogüe vae,

jare täta güɨrovia reta jókuae mbae omɨi mbae vae pe!

11Yambojaanga ñañono yave metei ɨvɨra pegua mbaravɨkɨ pe oparavɨkɨ vae

oyasɨata metei ɨvɨra tätambae yayavɨkɨ vaerä vae,

jarembae pegua opata oekɨ chugüi ipire,

jaema opokota oñopa ipoki rupi

jare jarembae pegua oyapota chugüi oipotagüe mbae oyeporu vaerä vae;

12ïru vae oiporupambae oapɨta tembíu oyapo vaerä pɨpe iyeupe.

13Jare oimeño jembɨre chupe yave,

jae ko metei ɨvɨra opa ñapäri päri vae, jare ikɨ̈ta kɨ̈tagüe ma, mbaetɨta ma mbaerä ikavi vae,

oipɨɨ, oñopa ye, ara omboasa jese vaeräño ma,

jare opoko oyapo mbae iärä, mboki rupi jare oïraro reve,

jare güɨraja güɨnoe chugüi metei kuimbae iä

14ani ramo metei mɨmba yavaete katu vae iä.

Opoko oñono jese pintura pɨ̈ta vae,

jare jókuae pe opa oñomi nunga oñeöpi kavimbaegüe;

15jaema jayave oyapo chupe jendarä iyave kavi,

oñono ovapetea re jare oikutu oñono mbaekutúa pe.

16Oikuaa rupi oñono agüɨye vaerä oa,

echa ko oikuaa katu jókuae tumpa-raanga mbaetɨ ko oikove vae:

echa ko mbae iäño, jaema oipotata ko oyeoko vae.

17Jare jökorai reve, oyerureta chupe opaete imbaembae reta re jare imbaeyekou re,

jembireko re jare imichia reta re;

mbaetɨ etei imara omomiari vaerä

jókuae mbae oikovembae vae.

Tekove re oyerure vaerä, imaendúa metei mbae oikovembae re;

18tekove oiporu vaerä, imaendúa mbae omɨi mbae re;

oyeepɨ vaerä mbae güi, oyemboya mbaepuere güɨnoi mbae kotɨ;

ketɨ ojo kavi vaerä, oiporu jókuae ipuerembae oguata vae pe;

19opaete mbae oyapogüe oë kavi vaerä chupe, iparavɨkɨ reta yepe,

oeka yemborɨ jókuae ipo ave ipuere mbae omomɨi vae pe.