1Israel jae ko Jacob. Kuae jae Israel taɨ reta jee, Jacob ndive oike reta Egipto pe vae; metei metei ñavo yogüɨraja imichia reta ndive:
2Rubén, Simeón, Judá,
3Isacar, Zabulón, Benjamín,
4Dan, Neftalí, Gad jare Aser.
5Opaete Jacob iñemuña reta oa chupe vae jae ko setenta. Ërei José oime ma oï Egipto pe.
6Jare omano José jare opaete tɨkeɨ reta, tɨvɨ, jare vi opaete iyaveigua reta.
7Jare Israel taɨ reta jeta yae oñemuña, jeiete okuakuaa reta jare imbaepuere yae reta, jökorai jae reta omotɨnɨe jókuae ɨvɨ.
8Jayave opüa ïru mburuvicha guasu Egipto pe mbaetɨ oikuaa José regua vae; jare jei jëtaɨgua reta pe:
9“Mase, kuae tëta Israel iñemuña reta jeta yae ma jare imbaepuere yae reta ma yandegüi.
10Añave yandearakuaa yandeyeupe ikotɨ reta, agüɨye vaerä jekuae oñemuña reta; güɨramoi oime yave ñeraro oñemoïruta yanderovaicho reta ndive oñeraro reta vaerä yande ndive, jare opata yogüɨraja yandegüi.”
11Jáeramo, oñono reta iárambo mbaravɨkɨ re oyangareko vae reta, oyapouka vaerä chupe reta mbaravɨkɨ ipoɨ vae; jare oyapo reta mburuvicha guasu pembaagüɨye jɨrurä, tëta Pitón pe jare Ramesés pe.
12Ërei jeiete oiporarauka chupe reta reve, jekuaeñoi oñemuña jare okuakuaa reta; jáeramo Egiptoɨgua reta okɨɨye Israel iñemuña reta güi.
13Jare Egiptoɨgua reta güɨrekoasɨ katu yae Israel iñemuña reta.
14Oiporarauka yae chupe reta mbaravɨkɨ rupi, oyapouka chupe reta tuyuapo jare ladrillo jare opaete mbaravɨkɨ kó rupigua rupi; jare opaete mbaembae oyapouka chupe reta vae rupi omombaravɨkɨasɨ katu yae.
15Jare mburuvicha guasu Egipto pegua imiari Sifra jare Fúa ndive, hebrea reta omboyekuaku vae reta, körai jei chupe reta:
16—Pemborɨ hebrea reta imembɨ oa vaerä yave, pemae jese; kuimbae yave ¡peyuka!, ërei kuña yave pemaeño toikove.
17Ërei oporomboyekuaku vae reta oipoɨu Tumpa güi, jare mbaetɨ oyapo reta mburuvicha guasu Egipto pegua oyókuai rami, omaeño michia kuimbae reta oikove.
18Jayave mburuvicha guasu Egipto pegua omondo oenɨiuka kuae oporomboyekuaku vae reta, jare jei chupe reta:
—¿Maera pa peyapo kuae, pemaeño oikove michia kuimbae reta?
19Jare oporomboyekuaku vae reta jei Faraón pe:
—Echa hebrea reta mbaetɨ ko kuña Egiptoɨgua reta rami; jae reta jete pɨ̈rata yae ko, ndei ore oporomboyekuaku vae reta rojo mbove jae reta oa ma imembɨ.
20Jare Tumpa oyapo ikavi vae oporomboyekuaku vae reta pe; jare Israel iñemuña reta jeta yae oñemuña.
21Jare oporomboyekuaku vae reta, Tumpa güi oipoɨu vae jeko pegua, jae iporerekua jo pegua reta re.
22Jayave Faraón oyókuai opaete jëtaɨgua reta, körai: “Pemombo ɨ pe opaete michia raɨ kuimbae oa vae,Hch 7.19. ërei kuña ko yave pemaeño toikove.”
Who We AreWhat We EelieveWhat We Do
2025 by iamachristian.org,Inc All rights reserved.
