JUDIT 11 - Guarani Bible with DC

Judit imiari Holofernes ndive

1Holofernes jei chupe:

—¡Enoi mborogüɨrovia, kuña, agüɨye ekɨɨye! Che mbaetɨ mbae ikavimbae ayapo kia ikɨ̈reɨ Nabucodonosor pe oyeokuai vae pe, jae ko mburuvicha tuicha vae opaete ɨvɨ pe.

2Jaema nerëta ipo reta, ɨvɨtɨ rupi rogüɨreko vae reta, mbaetɨ che chereröɨro yave, che ngaraa ko chemii ndive apüa viña jese reta. Ërei jae reta etei oeka kuae iyeupe.

3Añave, ere cheve: maera pa retekuarai chugüi reta jare reyu orekotɨ jaekavi reyu jeko pegua, jaema ko reasayepe. Enoiño mborogüɨrovia, añave kuae pɨ̈tu güive nde jaema ko reasayepe.

4Ngaraa ma kia mbae oyapo ndeve; oñemae kavita nderé, opaete che mburuvicha guasu Nabucodonosor pe, oyeokuai vae reta rami.

5Jaema Judit jei chupe:

—Cheruvicha eyeapɨsaka jaeta ndeve vae re; emaeño kuae nderembiokuai timiari ndeve, echa apu rupiä ko kuae pɨ̈tu chemiarita aï ndeve.

6Jaema nde cheruvicha reo yave che jae vae rupi, Tumpa oyapota ndeve oime mbae tuicha vae, jaema ndeyemongeta ngaraa okañɨtei.

7¡Nabucodonosor jekove re jare imbaepuere re, echa jae ko mburuvicha tuicha vae opaete pe kuae ɨvɨ pe, jae ndembou teko reñono kavi vaerä opaete vae pe: yasoropai cheruvicha, kuimbae retañoä ko oï mburuvicha tuicha vae iporookuai pe, opaete mɨmba kaa rupigua reta, guaka reta jare güɨra reta ave ko oikota Nabucodonosor imbaerä jare opaete iñemuña reta pe!

8Roendu vi miari nde ndearakuaa regua mburuvicha jare oasa ete ndepɨarakuaa vae re. Jare opaete kuae ɨvɨ rupi oikuaa vae nde jae ko mburuvicha kuimbae ikavigüe yae opaete kuae ɨvɨpe vae, täta ndearakuaa jare reporomopɨakañɨ rerëia ñoraro pegua pe vae.

9Jare ore roikuaa Aquior jei mburuvicha reta iyemboatɨa pe vae, Betulia pegua kuimbae reta ko jae güɨroasayepe vae, jare jae opaetei omombeu nderóvai mbae jei mburuvicha vae.

10Jayave eyapo jae jei vae; nemaendúa katu, echa kuae añete ko. Orerëta ipo reta ngaraaí oiporara jare ngaraaí iñamɨri, mbaetɨ iTumpa kotɨ iyoa yave.

11Añave, nde cheruvicha agüɨye esusere jare agüɨye embaeyavɨ. Jae reta añave jaema omano vaerä etei o ñogüɨnoi, echa oa reta mbaeyoa ipo pe, omboarasɨ reta ma iTumpa echa oyapo avei reta mbae ikavimbae vae.

12Añave jaema karuai pe ma ñogüɨnoi jare ɨ ave ma oata chupe reta, jare ikɨ̈reɨ ma opoko reta mɨmba re, jare ikɨ̈reɨ ma vi jou reta opaete jókuae Tumpa iporookuai pe oyopia chugüi reta agüɨyeta jou vae.

13Jaeramiño vi oñono ma jou reta vaerä trigo ia tenonde yagüɨye vae jare opoko retata vi vino jare asaite diezmo Tumpa pegua vae re jókuae ko jae reta oñono tee ma oyepokombae jese vaerä pai reta pe Jerusalén pe Tumpa pe oyeokuai oï vae reta pegua vae, echa ko jókuae re mbaetɨ eteita kia ojo opoko yepe ipo pe.

14Omondo reta ma Jerusalén kotɨ vae oiporu vaerä ndechi reta pe jókuae regua, echa joko pegua reta oyapo ma vi jókuae.

15Jare ou ye ma ñee oväe chupe reta rupive jaema oyapo retata, jókuae ara voi Tumpa oñonota ndepo pe cheruvicha opa vaerä remokañɨtei reta.

16Jókuae ramo ko, che jókuae aikuaa rupive, aë atekuarai chugüi reta. Tumpa ko chembou kuae ayapo vaerä nde ndive cheruvicha jare tɨpɨakañɨ kuri kia ñavo oikuaa yave kuae re opaete ɨvɨ rupi.

17Che, nderembiokuai cheruvicha, che ko jae metei kuña Tumpa pe oyeokuai vae ara rupi jare pɨ̈tu rupi. Che apɨtata nde ndive; jare opa pɨ̈tu aëta aja ɨvɨtɨ päu ayerure Tumpa pe, jaema jae ko jeita cheve Israel-ɨgua reta mbaeyoa oyapo yave.

18Jayave che ayuta amombeuta ndeve cheruvicha, jare nde reo vaerä opaete ndesundaro reta ndive; jaema metei ave ko ngaraa neïraro vae.

19Joko güi rogüɨrajata Judea rupi Jerusalén pe cheruvicha, rogüɨrajata romboguapɨ mburuvicha iguapɨa pe tëta mbɨte pe. Ndepuere vaerä reraja opaete jeko pegua reta vecha reta iyangarekoambae rami, jare ngaraa metei äve yaɨmba oñaro nderé. Kuae re che aparandu ma ko tenondeve, jaema Tumpa jei cheve jare añave chembou amombeu vaerä ndeve cheruvicha.

20Judit iñee omboyerovia yae Holofernes jare ïru mburuvicha reta oyeokuai chupe vae, täta ipɨakañɨ reta iyarakuaa re jare jei reta chupe:

21—Mbaetɨta kia nunga kuña kuae ɨvɨpe ipuereta kuae iyarakuaa omboyovake vae.

22Jare Holofernes jei chupe:

—¡Täta jaekavi Tumpa oyapo ndembou orekotɨ nerëta jenondeve roporomoamɨri vaerä, jare omano vaerä cheya güɨröɨro vae reta!

23Täta nepöra michi jare nemiari kavi yae. Reyapo jókuae rere vae yave, ndeTumpa oikota cheTumparä, jare reikota mburuvicha tuicha vae Nabucodonosor jo pe, jare nerërakuata opaete ɨvɨ rupi.