1Köiño ma ñogüɨnoi Caserín güi yave, jae ko tëta Nínive jóvai oï vae, Rafael jei Tobías pe:
2—Nde reikuaa reï kërai nderu yaeya vae.
3Yaja tenonde nderembireko güi, yaja oo ñañono kavi toï jae reta ndei ojo oväe mbove.
4Jaema opa yogüɨraja mókoi reve. Jare Rafael jei vi chupe güɨnoindaivi vaerä jevae ipɨ̈piagüe. Echa metei yaɨmba ojo ojo jaɨkue reta.
5Pe pe ko oime Ana omae oï tape kotɨ japerä re echa Tobías jokoropi outa oväe oï.
6Jare jae oikuaa ipɨa pe oï oime ko ou imembɨ vae, jaema jei Tobit pe:
—¡Ou ma oväe nderaɨ iñeïru ndive!
7Jare Rafael jei Tobías pe, ndei ojo oväe mbove tu jëta pe:
—Arovia nderu omae yeta.
8Eipichɨ jesa re jevae ipɨ̈piagüe. Kuae moa oitɨota jesa jäve güi jare omaeta. Nderu omae yeta jare oecha yeta tembipe.
9Ana osɨi ojo oiküava imembɨ, jare jei chupe:
—¡Roecha ye ma, chemembɨ michi! ¡Añave chepuere ma amano!
Jare opoko oyaeo.
10Tobit opüa ma ou, ipɨsa yeyuka reve ou öke pe.
11Tobías ko, oime güeru ipo pe jevae ipɨ̈piagüe, ojo oövaiti tu, oipɨɨ ipo pe. Jare oipeyu tu jesa re, jare jei chupe:
—¡Enoi mborogüɨrovia, cheru!
Jare oñono jese jókuae moa.
12Joko güi ipo mókoi reve pe, oekɨ jesa güi jesatügüe vae.
13Jaema Tobit oiküava taɨ, oyaeo reve jare jei chupe:
—¡Roecha ye, cheraɨ michi, jaeramiño vi tembipe cheresa pegua!
14Jare jei ye vi:
—¡Mbaemboete toiko Tumpa pe, mbaemboete toiko jae jee re! ¡Mbaemboete toiko opaete araɨgua reta ndive! ¡Mbaemboete toñemee chupe opaete ara rupi jekuae avei! Jae ko omee aiporara aiko vaerä, jare jae vi omee akuera ye vaerä, jare añave chepuere roecha ye cheraɨ, Tobías.
15Tobías oike ojo jo pe oyerovia reve jare iñeeäta reve omboete Tumpa. Jaɨkue rupi imiari tu pe iguata re, jae güeru korepoti vae re, imiari chupe imenda re, jae omenda Ragüel tayɨ ndive, jae outa ma oväe Nínive pe joko pe vae re.
16Tobit täta oyerovia jare Tumpa omboete reve, oë ojo tëta guasu jöke pe oövaiti vaerä iyukei. Nínive pegua täta opa ipɨakañɨ oecha yave Tobit oguata jaeño, ojo jare mbaetɨ reve kia oipoko güɨraja. Jare Tobit jei Tumpa ko oiparareko omae jese vae jare omee ye chupe omae vaerä.
17Jaemai ojo oövaiti Sara, taɨ Tobías jembireko, jare jei chupe:
—¡Tuicha ayerovia cherayɨ! Mbaemboete toiko Tumpa pe echa jae ndereru orépɨri. Mbaeyekou toiko nderu ndive, jare cheraɨ Tobías ndive, jare nde ndive, cherayɨ. ¡Ayerovia reyu kuae nerëta pe vae re! YandeYa tiporerekua nderé jare tomee ndeve yerovia. ¡Eike, cherayɨ!
18Jókuae ara oï oyerovia tuichagüe vae judío Niniveɨgua reta pe.
19Jaema Ajicar jare Nadab, jae ko Tobit jiɨ reta ma, yogüɨraja iyerovia oechauka chupe.
Who We AreWhat We EelieveWhat We Do
2025 by iamachristian.org,Inc All rights reserved.
