2 MACABEOS 1 - Guarani Bible with DC

Tenondegua tupapire judío reta Egipto pe yogüɨreko vae peguarä

1“Judío reta Jerusalén pegua jare ɨvɨ Judea pegua omondo tamaraeme jëtara judío reta Egipto pegua reta pe, ikaviño toñogüɨnoi reta.

2Tumpa ipɨakavi toiko jae reta ndive ñomoïru oyapo Abraham, Isaac jare Jacob ndive rami.

3Tomee peve kɨ̈reɨ ngatu avei pemboete vaerä jare peyapo vae jemimbota pepɨaguasu jare peräta ngatu reve,

4pepɨa-kɨ̈reɨ ngatu reve peyapo vaerä iporookuai jare iñee jeigüe, tomee peve vɨakatu,

5jare toendu peyerure, tipɨakatu vi pekotɨ jare agüɨye tosɨrɨ pe güi tekoavai pe peñeväe yave.

6Kuae roiporu peveguarä oreyerure rupi.

7Año ciento sesenta y nueve rupi ma, Demetrio oiko yave mburuvicharä, ore judío reta rombaekuatía peve. Jókuae ara rupi roiko tovaicho ipogüɨ rupi jare roikoasɨ roiko, Jasón jare jupiegua reta oyeapa juvicha kotɨ jare ɨvɨ maraëɨ re.

8Oyatapɨ reta tupao jöke guasu re jare oyuka reta jekombae vae. Ërei ore royerure Tumpa kotɨ, jare jae oendu oreyerure, rombaeyuka chupe jare rombopota temitɨ kó ipo pe, romoendɨ mechero reta, jare roñono karúa iárambo mbɨyape mbaemboete pegua vae.

9Añave rombaekuatía ye pɨau peve, pomoñera reve peyapo o ñairaka pegua iarete Quisleu yasɨ pe.

‘Oyekuatía ko año ciento ochenta y ocho pe.’

Tembikuatía mokoía judío reta Egipto pe yogüɨreko vae peguarä

10Jerusalén jare Judeaɨgua reta, arakuaa iya reta jare Judas, omondo tamaraeme Aristóbulo, mburuvicha guasu iyokoka, Tolomeo isacerdote iñemuña reta pe, jaeramiño vi ïru judío reta yogüɨreko Egipto pe vae pe, tiyerekua peve reta teko kavi pe.

11Tumpa yandereepɨ ma tekoavai tuicha vae güi, romee yasoropai opaete orepɨa ndive chupe, echa jae oremborɨ mburuvicha guasu ndive roñoraro yave,

12opa omombo tëta maraëɨ kotɨ oñoraro vae reta.

13Jáeramo, mburuvicha guasu ojo yave Persia kotɨ metei sundaroatɨ yandepuere rapembae jese vae ndive, opa omboyao yao reta itumpa kuña Nanea itupao pe,

14echa omenda jaanga oyeapo tumpa kuña ndive yave, mburuvicha guasu Antíoco, ichëi reta ndive, yogüɨraja joko güi güɨnoe mbotarä jeta mbaeyekou tupao pegua.

15Nanea isacerdote reta oechauka, jare mburuvicha guasu oike tupao japɨpe pe mbovɨ kuimbae reta ndive. Japɨpe pe ma oï yave, sacerdote reta oyokenda öke,

16jayave oipea reta ventana oyekuaambae oï o iyapɨte kotɨ vae, jare oyuka reta ita pe mburuvicha guasu, opaete ichëi reta ndive. Joko güi oyasɨa reta iñäka, iyɨva jare iu reta, jare omombo ikatu kotɨ.

17¡Mbaemboete toiko jekuae avei Tumpa kotɨ, echa opa oyuka ipɨapochɨ vae reta!

18Yaikɨayoeta ñanoi tupao kuae veinticinco pe Quisleu yasɨ pe ramo, orekɨ̈reɨ roikuatía peve, pomomaendúa vaerä peyapo vi kuae arete o ñairaka pegua yandemaendúa vaerä Nehemías pe tata jendɨ vae re, opa yave tupao jare omopüa ye,

19echa yandeɨpɨ reta oyererajauka yave Persia kotɨ, sacerdote ipɨakavi vae reta oñovatu jókuae tata ɨrɨru pöreɨ pe; oñeñovatu kavi yae ramo mbaetɨ kia oväe.

20Ɨma año ma oasa yave, Tumpa ipɨapotaa ramo, mburuvicha guasu Persia pegua omondo Judá kotɨ, jare jae oyókuai sacerdote tata iñovatúa taɨgüe reta, oeka vaerä jókuae tata. Ërei jae reta mbaetɨ oväe chupe, jaeño pa oväe reta chupe iyarapasigüe michi, Nehemías jayave oyókuai oekɨ reta vaerä jókuae tɨgüegüe güɨraja vaerä.

21Opa ma yave oï kavi mbaeyuka peguarä, Nehemías jei Sacerdote reta pe oñapiramo vaerä yepea jare tembia jókuae tataɨgüe pe,

22jökorai oyapo reta yave, güɨramoiño kuaraɨ, tenonde yave okañɨ amapɨtu pe oï vae, omboesape, jare tata omboɨpɨ vi jendɨ tuicha, jare opaete vae omopɨakañɨ.

23Tembiyuka jendɨ oï meme, sacerdote reta oyerure opaete vae ndive, Jonatán omboɨpɨ yave yerure, ïru reta, Nehemías ndive, omboyevɨ vi yerure.

24Körai oyerure reta: ‘CheYa, cheYa jare CheRu Tumpa, opaete mbae iyapoa, yavaete ipɨ̈rata vae, jupi jare ipɨaguasu vae, jaeño Mburuvicha guasu, jaeño ipɨakavi vae,

25jaeño iporerekua vae, jaeño jupi vae, imbaepuere yeyé vae jare iyapɨ mbae vae, nde ko reepɨ Israel mbae pɨ̈chɨi vae güi, nde reiparavo oreɨpɨ reta jare remboya ndekotɨ.

26Eipɨɨ kuae mbaeyuka rogüɨrökuavee opaete Israel jee re vae, jae ko kuae tëta ndembae; eepɨ jare eñono tee ndeyeupeguarä.

27Emboatɨ opaete iɨvɨ güi mombɨrɨ yogüɨreko vae reta, eyora tembiaurä yogüɨreko itumpa ambuae vae reta ipɨte rupi vae, jare eiparareko emae ma eröɨro jare ñemotareɨ rupi yogüɨreko vae reta re; opaete tëta rupi itumpa ambuae vae reta oikuaa vaerä jae ko nde oreTumpa vae.

28Eiporarauka orerekoasɨ jare oreangao jasɨ katu rupi vae reta pe,

29jare emomɨ̈rata nerëtaɨgua reta, Moisés jei rami.’

30Körai ramboeve, sacerdote reta oyemongoi salmo reta pe.

31Opa ma yave ókai tembiyuka, Nehemías opɨyereuka tata tataɨ jembɨregüe ita guasu reta iárambo.

32Kuae oyapo reta yave, tata jendɨ, ërei opa okañɨ tembipe ou mɨmba oyeyuka oyeapɨ jese güi vae pe.

33Kuae oasagüe opaete oikuaa vae, mburuvicha guasu Persia pegua ave oikuaa kia ko oñomi jókuae tata vae, jare Nehemías iñeïru reta ndive oiporu jókuae tataɨ oapɨ vaerä mɨmba oyeyukagüe.

34Jayave mburuvicha guasu, oecha yave añete ko kuae, oyapouka metei oguambɨ guasu jókuae jendagüe pe jare ombojee ikɨambae pe;

35jare iyangarekoa reta pe omee mbota jepɨ vae chupe mbota ou vae güi.

36Nehemías iñeïru reta oenɨi jókuae tataɨ ‘neftar pe’, kuae oipota jei mbaekɨayoe, ërei opaete vae oenɨi ‘nafta pe’.