1 SAMUEL 5 - Guarani Bible with DC

Tumpa ikäjou oyereraja filisteo reta iɨvɨ pe

1Filisteo reta opɨ̈ro Tumpa ikäjou yave, güɨraja reta Eben-ezer güi Asdod pe,

2jare güɨroike reta Tumpa ikäjou itumpa Dagón tupao pe, jare oñono reta Dagón iyɨpɨ pe.

3Pɨareve ndeimbove pe Asdod pegua reta oecha itumpa Dagón oyepɨso oï ɨvɨ pe yandeYa ikäjou jóvai, jayave oupi reta oñono ye jenda pe.

4Pɨareve pe oecha reta ye itumpa Dagón jekuae yepɨso ɨvɨ pe yandeYa ikäjou jóvai, iñäka jare ipo mókoi reve opa oyeka oï öke pe etei, jaeño jetegüe opɨta.

5Kuae jeko pegua Dagón isacerdote reta jare opaete oike Dagón itupao pe vae reta, mbaetɨ opɨ̈ro tupao jöke pe etei añave rupi.

6Jare yandeYa imbaepuere oiporarauka Asdod pegua reta pe, jare omombaerasɨ pire mbaerasɨ ñakɨ̈ta vae pe opaete jókuae ɨvɨ rupi.

7Kuae oecha yave Asdod pegua reta, jei: “Agüɨye topɨta yandepɨte pe Israel iñemuña reta iTumpa ikäjou, echa oiporarauka yandeve jare ñanetumpa Dagón pe.”

8Jare omboatɨ reta opaete filisteo juvicha reta, oparandu chupe reta:

—¿Mbae pa royapota Israel iñemuña reta iTumpa ikäjou pe?

Jae reta jei:

—Peraja Israel iñemuña reta iTumpa ikäjou Gat pe.

Javoi güɨraja reta Tumpa ikäjou Gat pe.

9Jare güɨraja reta oeya Gat pe yave, yandeYa imbaepuere rupi okɨɨye yae jókuae tëta pegua reta, oiporarauka chupe reta, michia güive okuakuaa vae re oë pire mbaerasɨ ñakɨ̈ta vae.

10Jayave güɨroyakavo reta yandeYa ikäjou tëta Ecrón pe, jare joko pe yogüɨreko vae reta osapúkai jei: “¡Güeru reta Israel iñemuña reta iTumpa ikäjou yandeve opa vaerä yandeyukauka!”

11Jare omboatɨ reta opaete filisteo juvicha reta, jare jei chupe reta: “Peraja peeya Israel iñemuña reta iTumpa ikäjou, oyererúa güi, agüɨye vaerä opa ñamano.” Echa jërakua oï mano opaete jókuae tëta guasu pe, Tumpa oiporarauka yae oï joko pe.

12Jare oikoveño vae reta, oiporara mbaerasɨ pɨ̈chɨi ñakɨ̈ta vae, oë opaete vae jete re, jare opaete vae täta güɨroäse.