1YandeYa Imbaepuere yae ete vae Israel iTumpa jei körai Moab regua:
“¡Paravete tëta Nebo,
echa opa oyemboai oï!
¡Tëta guasu Quiriataim oñepɨ̈ro jare oñemomichi!
¡Iñepɨ̈roa opa oyemboai!
2Moab jërakua yae vae jaema opa.
Hesbón pe tovaicho reta oyapo yemongeta,
tëtaguasu Moab omboai vaerä.
Jökoraiño vi nde Madmena, reyemboaita,
ñeraro ngaraa osɨrɨ ndegüi.
3Horonaim güi täse jasɨ katu reve oyeendu körai:
‘¡Kañɨtei yavaetegüe oväe!’
4Moab oyemboai oï;
michia reta jäse jasɨ katu reve vae oyeendu.
5Oyaeo reve oyeupi reta
tëta Luhit oï ɨvɨtɨ re vae kotɨ;
jäse jasɨ katu reve susere güi vae,
tovaicho reta oendu Horonaim yagüeyɨa kotɨ.
6¡Petekuarai! ¡Peroasayepe perekove!
¡Peiko mburika jesaetegüe rami ñuu pe!
7Moab, reyerovia yae yepi mbaembae renoi vae re,
ërei nde vi reñepɨ̈roukata.
Netumpa-raanga Quemos oyererajata ïru ɨvɨ pe,
isacerdote reta jare mburuvicha reta ndive.
8Kañɨtei outa tëta guasu ñavo re,
metei ave ngaraa oasayepe;
ɨvɨtɨ päu ipe kavi vae jare ɨvɨpe kavi oyemboaita vi.
Che ndeYa ko jae kuae.
9Pemee Moab ipeporä,
oveve vaerä ojo,
echa okañɨteita;
jëta guasu reta ipombae opɨtata,
jare mbaetɨ eteita kia oiko pɨpe.”
10(¡Tijeko jókuae ipɨakatumbae reve oyapo yandeYa iparavɨkɨ vae! ¡Tijeko jókuae ñäteɨ oparapiti vae!)
11Tëta Moab oyeapo ramo güive oiko pɨagüive, mbaetɨi oyereraja tembipɨɨrä ïkotɨa. Jae ko, vino oguapɨ kavi jɨru pe vae mbaetɨi oyekuavo jɨru güi ïru jɨru pe vae rami, jáeramo mbaetɨ okañɨ chugüi jëe ngatu vae.
12Ërei yandeYa jei: “Oväeta ara ambou vaerä jókuae vino oikuavo reta vaerä ïru jɨru pe; jare jókuae jɨru mɨmbapire pegua oyekuavo chugüi vae opa vaerä ombojaɨ jaɨ.
13Jayave Moab imarata itumpa-raanga Quemos jeko pegua, Israel iñemuña reta imara Bet-el re oyerovia tëi yave vae rami.
14Moab agüɨye tei: ‘Orerëia yae ko,
ore ko ñeraro regua imbaepuere yae vae.’
15Oväe ma Moab imboaia jare jëta guasu reta imboaia;
itaɨrusu reta ikavigüe opata omano.
Jökorai jei Mburuvicha guasu,
jae ko jee yandeYa Imbaepuere yae ete vae.
16Moab oyemboai vaerä köi yae ma,
isusere iväea oyearo yae ma.
17Moab iyɨvɨrigua tëta reta,
jare opaete jërakua yae vae re oikuaa vae reta,
peyaeo jese jare, pere:
‘¡Mase, kërai opɨta imbaepuere
tuicha yae vae jare iyemboetea yae vae!’
18Tëta guasu Dibón,
egüeyɨ nderenda yemboetea pegua güi,
eguapɨ ɨvɨ re,
echa Moab imboaia oporepeña ndekotɨ,
omboai vaerä ndegüi nekësea.
19Tëta guasu Aroer pegua reta,
peyemboɨ tape jembeɨ pe jare pemae;
peparandu otekuaraigüe pe,
mbae ra oasa oï vae re.
20Ñemomarai pe oï Moab jare mbɨatɨtɨ tuichagüe pe.
¡Peyaeo jasɨ katu reve jese!
¡Pemoërakua ɨ̈aka Arnón pe
Moab oyemboai oï vae re!”
21Oväe morojäa oñemoërakua tëta guasu reta ɨvɨpe kavi rupigua reta kotɨ vae: Jae ko Holón, Jahaza, Mefaat,
22Dibón, Nebo, Bet-diblataim,
23Quiriataim, Bet-gamul, Bet-meón,
24Queriot, Bosra jare opaete tëta guasu reta Moab pegua, köiño oï vae reta re jare mombɨrɨ oï vae reta re.
25YandeYa jei:
“Moab imbaepuere oyeasɨa,
jare iyɨva oñemopë.”
26Pembosavaɨpo Moab,
echa oyembopɨapochɨ yandeYa kotɨ.
Jayave Moab oyapayereta igüëegüe pe,
jare opaete opukata jese vae.
27Moab, ¿reyóyai yoyaiä pa ko Israel yepi,
jare nemiari jese reröɨro reve,
metei imonda vae re rami?
28Moab pegua reta, peeya tëta guasu reta;
pekua ɨ̈vavira kotɨ, jare joko pe peiko,
pɨkasu oyembojaitɨ ɨ̈vavira ipäu vae rupi rami.
29Yaikuaa katu Moab iyembotuicha;
ipɨarai, ipɨayemboete jare ipɨapochɨ.
30YandeYa oikuaa vi Moab iyarasɨ katu yae vae,
iñee añetegüe nunga vae,
ërei mbaetɨ etei mbaerä ikavi chupe.
31Jáeramo jasɨ katu reve aäpirota jare chepɨatɨtɨta,
opaete tëta Moab pegua reta re,
jare Kir-hares pegua reta re.
32Uvarupa Sibma pegua, roäpirota vi,
oasa ete yeta Jazer oñeäpiro vae güi.
Nderembo reta oasa ye yepi ɨguasu,
ojoi oväe Jazer pe.
Ërei añave uva reipoose vae oyemboai opɨta.
33Mbaetɨ ma oyeendu sapúkai yerovia pegua
Moab pegua kó kavi reta rupi.
Vino opa jɨru pe.
Mbaetɨ ma uva itɨamía,
mbaetɨ ma tairari yerovia pegua.
34Hesbón pegua reta omoäse jasɨ katu vae,
jare jäse oyeendu Eleale jare Jahaza pe,
jare Zoar güi Horonaim,
guakiya mboapɨ año vae rami,
echa ɨesaɨ Nimrim pegua ave opa tɨpa.
35YandeYa jei:
“Che amboaita Moab pegua reta,
mbaemboete renda reta ɨvɨtɨ rupigua re
omee mɨmba oyeyukagüe vae reta,
jare oapɨ ikäti kavi vae incienso vae reta.”
36Jáeramo chepɨatɨtɨ Moab re,
jare opaete Kir-hares pegua reta re,
mimbɨñee mano pegua rami,
echa imbaeyekou reta opa okañɨtei.
37Opaetei ia jare jendɨvaa oñapi reta;
opaete oyembopere ipo reta rupi,
jare oyemonde reta temimonde mbɨatɨtɨ pegua pe.
38“Opaete o Moab pegua iárambo rupi,
jare opaete ikaye rupi
oyeendu yaeo katuaiño;
echa che ayoka Moab
ɨ jɨru ikavimbae oyeyoka rami.
Che ndeYa ko jae kuae.”
39¡Pepɨatɨtɨ yae Moab re!
¡Kërai opa oyemboai oï!
¡Ikupeño omee jare imara yae!
Moab iyemboai opɨta kɨɨyearä
jare omae kaviä vaerä jese,
opaete iyɨ́vɨri rupigua reta peguarä.
40YandeYa jei körai:
“Moab jovaicho oporepeña ikotɨ,
güɨraké ipepo oipɨso kavi oporepeña rami.
41Tëta guasu reta jare ñepɨ̈roa reta
opata oa jovaicho reta ipo pe.
Jókuae ara jëia vae reta Moab pegua,
orɨrɨita kuña imembɨ oa oï vae rami.
42Moab mbaetɨta ma oiko tëtaguasu,
echa oyembopɨapochɨ chekotɨ.
43Jáeramo, kɨɨye, ɨvɨkua jare ñuai
okätɨro oï nderé. Che ndeYa ko jae kuae.
44Okɨɨye güi otekuarai vae,
oata ɨvɨkua pe,
jare ɨvɨkua güi oë tëigüe, oata ñuai pe,
echa che aruta Moab re tembiporara.
Che ndeYa ko jae kuae.
45Amogüe reta otekuarai tëi ipuerembae reve,
oeka oñepɨ̈ro vaerä tëta guasu Hesbón pe;
ërei Hesbón, mburuvicha guasu Sehón jëta jendɨ oï,
jare tata oñemoai oapɨ ɨvɨtɨ Moab pegua,
jovaicho pota yae vae reta.
46¡Ndeparavete, nde Moab!
¡Quemos jëta, opa rekañɨtei!
¡Nderaɨ reta jare nderayɨ reta opa oyereraja tembipɨɨrä!
47Ërei metei ara, Moab aru yeta kuri iɨvɨ pe tembipɨɨrä oikoa güi.
Che ndeYa ko jae kuae.”
Jae kuae Tumpa iporojäa oiko vaerä Moab ndive.
Who We AreWhat We EelieveWhat We Do
2025 by iamachristian.org,Inc All rights reserved.
