2 REYES 6 - Guarani Bible with DC

Eliseo ombovevɨi yɨɨ

1Ñeemombeúa reta jei Eliseo pe:

—Mase, nde ndive yaikoa, michi yae ko yandeve.

2Emaeño torojo ɨ̈aka Jordán kotɨ, joko pe metei ñavo royasɨa vaerä ɨvɨra, jare royapo vaerä oreyeupe joko pe roiko vaerä pɨpe.

Eliseo jei chupe reta:

—Pekua.

3Javoi metei vae jei:

—Romoñera reo vaerä orerupíe.

Eliseo jei:

—Taja perupíe.

4Jayave Eliseo ojo jae reta ndive Jordán kotɨ, jare joko pe oyasɨa reta ɨvɨra.

5Jare metei oyasɨa ɨvɨra oï ramboeve, iyɨɨ oa chugüi ɨ pe, jayave osapúkai:

—¡Atataɨ, cheya! ¡Jókuae yɨɨ aiporugüe ko!

6Tumpa iñeemombeúa oparandu chupe:

—¿Ketɨ pa oa?

Jae omombeu chupe ketɨ ko oa vae. Jayave Eliseo oyasɨa metei ɨvɨra jare oitɨ joko pe, jare yɨɨ ombovevɨi ɨ iárambo.

7Jayave Eliseo jei chupe:

—Enoe.

Jare ipo pe güɨnoe jókuae yɨɨ.

Eliseo jare Siriaɨgua reta

8Mburuvicha guasu Siria pegua omboɨpɨ oñeraro Israel pegua reta ndive, jare omboatɨ isundaro ruvicha reta pe jei, kia kia pe oñono vaerä jeyupa.

9Jayave Tumpa iñeemombeúa omondo oikuaauka mburuvicha guasu Israel pegua pe, agüɨye vaerä oasa jókuae Siriaɨgua reta yogüeruta ñogüɨnoia rupi.

10Jayave mburuvicha guasu Israel pegua omondo isundaro reta Tumpa iñeemombeúa jei chupea kotɨ. Jökorai oasayepe reta yogüɨreko mbovɨ ye.

11Jare mburuvicha guasu Siriaɨgua omboyemongeta yae kuae, jare oenɨi isundaro ruvicha reta, jare jei chupe reta.

—¡Pere cheve! ¿Kia pa yandegüi oñemoïru mburuvicha guasu Israel pegua ndive?

12Jayave sundaro ruvicha reta güi metei jei:

—Mbaetɨ cheruvicha guasu. Ñeemombeúa Eliseo ko oï Israel pe, jae ko omombeu mburuvicha guasu Israel pegua pe jókuae ñee reta rere ndero japɨpe pe vae.

13Jayave mburuvicha guasu Siria pegua jei:

—Pekua jare peikuaa, kia pe ra oime oï vae, che amondo vaerä mbovɨ kuimbae reta oipɨɨ.

Jare omombeu reta mburuvicha guasu pe, Eliseo oime oï Dotán pe,

14jayave jae omondo jokotɨ kuimbae reta kavayu regua, käretou ñeraro pegua reta, jare jeta sundaro reta; kuae reta yogüeru pɨ̈tu yave, jare oñova reta tëta guasu Dotán.

15Pɨareve pe ndeimbove yave opüa Eliseo Tumpa iñeemombeúa jembiokuai, jare oë rupive oecha jókuae sundaro reta oñova güɨnoi tëta guasu kavayu regua reta ndive jare käretou ñeraro pegua reta ndive; jayave ojo omombeu Eliseo pe:

—¡Atataɨ cheya! ¿Mbae pa yayapota añave?

16Eliseo jei chupe:

—Agüɨye ekɨɨye, echa jeta ko yande ndive ñogüɨnoi vae, jae reta ndive ñogüɨnoi vae güi.

17Jare Eliseo oyerure yandeYa pe, jei reve: “CheYa, romoñera, eipea jesa omae vaerä.” Jayave yandeYa oipea tembiokuai jesa, jare omae; jare oecha ɨvɨtɨ rupi tɨnɨe kuimbae reta kavayu regua, jare käretou tata katuai vae Eliseo iyɨ́vɨri rupi.

18Jare Siriaɨgua reta ogüeyɨ Eliseo kotɨ yave, jae oyerure yandeYa pe, jei körai: “Romoñera jesambae opɨta vaerä kuae kuimbae reta.”

Jare yandeYa opa oeya jesambae, Eliseo oyerure rami.

19Jayave Eliseo jei chupe reta:

—Kuae jaeä ko tape peeka vae ani tëta guasu peeka vae. Peyu cherupíe, che pogüɨrajata jókuae kuimbae peeka vae oïa pe.

Jare güɨraja reta Samaria kotɨ.

20Joko pe oväe reta yave, Eliseo oyerure: “CheYa, añave eipea jesa reta omae reta vaerä.” Jayave jae reta omae yave, oecha reta ñogüɨnoi tëta guasu Samaria japɨpe.

21Jare mburuvicha guasu Israel pegua oecha reta yave, oparandu Eliseo pe:

—¿Ayuka retata pa, cheru?

22Ërei Eliseo jei chupe:

—Agüɨye eyuka reta, ¿reyukata pa tembipɨɨrä reyapouka reta ndekɨsepuku pe jare nderuvɨ pe vae? Emee tokaru jare toɨu reta, javoi topa ye toyogüɨraja juvicha guasu reta kotɨ.

23Jare oyapo chupe reta jeta tembíu kavi; jare opa okaru jare jou reta vino yave, opa omondo reta; opa ye yogüɨraja juvicha kotɨ. Jare mbaetɨ ma yogüeru reta jembiporu ñeraro pegua ndive Siria güi ɨvɨ Israel kotɨ.

Eliseo jare tëta Samaria oñova tovaicho vae

24Metei ara Ben-adad, mburuvicha guasu Siria pegua omboatɨ opaete isundaro reta jare ojo oñova tëta Samaria, oñeraro vaerä joko pegua reta ndive.

25Jókuae oñeova oï jeko pegua karuai yae tëta Samaria pe; jáeramo metei mburika iñäkagüe jepɨ ochenta reare korepoti pegua, jare cuarto litro pɨkasu repoti vae jepɨ pandepo reare korepoti pegua.

26Metei ara mburuvicha guasu Israel pegua oasa tëta guasu ikësea iárambo rupi yave, metei kuña osapúkai chupe:

—¡Cheruvicha guasu, chemborɨ!

27Mburuvicha guasu jei chupe:

—YandeYa mbaetɨ ndemborɨ yave, ¿këraita pa che chepuere romborɨ? ¿Chepuereta pa amee ndeve trigo ani vino?

28¿Mbae pa oasa nde ndive?

Jókuae kuña jei:

—Kuae kuña jei cheve chemembɨ royuka vaerä rou, jare pɨareve rou vaerä jae imembɨ.

29Jayave chemembɨ royuka royapo tembiurä jare rou.Dt 28.57. Pɨareve pe che jae chupe: “Añave emee nemembɨ yayuka yayapo vaerä tembíu.” Ërei jae oñomi imembɨ.

30Mburuvicha guasu oendu yave jókuae kuña jei vae, omondoro jemimonde, jare jökorai oasa tëta guasu ikësea iárambo rupi; jare kuimbae reta oecha oyemonde temimonde mbɨatɨtɨ pegua pe.

31Mburuvicha guasu jei: “¡Tumpa toiporarauka jeta cheve, kuae ara voi mbaetɨ ko Eliseo, Safat taɨ iñäka ayasɨa yave!”

32Eliseo oguapɨ oï jo pe tenondegua reta ndive. Jare mburuvicha guasu omondo Eliseo kotɨ metei kuimbae. Ërei ndei jókuae mburuvicha guasu omondo vae oväe mbove, Eliseo jei tenondegua reta pe:

—Pemae kuae oporoyuka vae ombou oyasɨauka cheäka. Ërei peyeapɨsaka peï, jókuae mburuvicha guasu ombou vae ou oväe yave peyokenda öke, agüɨye pemaeño toike, echa oime juvicha ou jaɨkue.

33Jare Eliseo imiari oï jókuae tenondegua reta ndive ramboeve, jókuae ñee jerúa ou oväe Eliseo pɨri, jare jei:

—Mase, kuae ikavimbae ombou yandeve yandeYa, ¿mbae yemborɨ pa aärota chugüi?