1Nabucodonosor, mburuvicha guasu Babilonia pegua, omboguapɨ Judá pe mburuvicharä Sedequías, Josías taɨ, Conías, Joacim taɨ jekovia pe.2 R 24.17; 2 Cr 36.10.
2Ërei ngatu Sedequías, ani iyɨvɨrigua mburuvicha reta ani tëta pegua reta ave, mbaetɨ oyeapɨsaka yandeYa jei ñeemombeúa Jeremías rupi vae re.
3Mburuvicha guasu Sedequías omondo Jucal, Selemías taɨ, jare sacerdote Sofonías, Maasías taɨ jei reta vaerä Jeremías pe: “Eyerure oreré yandeYa Tumpa pe.”
4Jayave rupi ndeiño oipɨɨ reta Jeremías oñono tembipɨɨrɨru pe, ipuereño oguata pɨagüive tëta rupi.
5Jare Caldeaɨgua reta oñova güɨnoi Jerusalén vae oikuaa, Faraón isundaro reta ñogüɨnoe Egipto güi vae yave, opa oñemoata joko güi.
6Jayave yandeYa oyókuai ñeemombeúa Jeremías jei vaerä
7jókuae yogüeru ípɨri vae reta pe: “Pere mburuvicha guasu Judá pegua pe, jókuae pembou peparandu vaerä cheve vae pe, Faraón isundaro reta yogüeru tëi pereepɨ vaerä vae, opa ye oyerova Egipto kotɨ.
8Añave, Caldeaɨgua reta oyerova yeta oporepeña vaerä tëta guasu Jerusalén re, opɨ̈ro retata jare oapɨ retata.
9Che, peYa amombeu peve: Agüɨye peyombotavɨ pe aeño jare pere: ‘Caldeaɨgua reta jaema ko opa yogüɨraja yandegüi.’ Echa mbaetɨta ko jökorai.
10Echa, yepe mona opa pemoamɨri Caldeaɨgua sundaro reta ñeraro pe, mbovɨ iperegüe reta opɨta teyupa rupi vae, opüata ko oapɨ tëta guasu.”
Jeremías tembipɨɨrɨru pe11Sundaro Caldeaɨgua reta opa oñemoata Jerusalén güi, echa oikuaa reta oime yogüeru Faraón isundaro reta vae.
12Jeremías oëta tëi Jerusalén güi ojo vaerä ɨvɨ Benjamín pegua pe, oyembosɨrɨ vaerä joko güi.
13Ërei ojo oväe Öke Benjamín jee vae öke pe yave, metei sundaro ruvicha Irías jee vae, Selemías taɨ, Hananías jɨmɨmino, oipɨɨ Jeremías jare jei chupe:
—¡Nde reipota reasa Caldeaɨgua reta kotɨ!
14Jeremías jei chupe:
—¡Mbaetɨ, mbaetɨta aasa Caldeaɨgua reta kotɨ!
Ërei Irías mbaetɨ güɨrovia, oipɨɨ jare güɨraja mburuvicha reta jóvai.
15Jare mburuvicha reta iyarasɨ Jeremías kotɨ, oinupauka jare oñonouka tembipɨɨrɨru oï ombaekuatía vae Jonatán jëta pe vae pe, echa jókuae yepe oipoepɨ reta tembipɨɨrɨrurä.
16Oñono reta Jeremías tembipɨɨrɨru oyeyoo vae jugua pe. Ɨma ma oiko joko pe yave,
17mburuvicha guasu Sedequías omondo güɨnoeuka jare güeruruka jae oïa pe; jare Jeremías oyereraja ma mburuvicha guasu jóvai yave, jae oparandu vɨari chupe:
—¿Oime pa mbae nunga ñee yandeYa güi?
Jeremías jei chupe:
—Oime. Jae ko kuae: “Nde cheruvicha guasu, reata mburuvicha guasu Babilonia pegua ipo pe.”
18Jare Jeremías oparandu voi vi mburuvicha guasu Sedequías pe:
—¿Mbae rupi pa oime chereko nde cheruvicha guasu kotɨ, ani ndeɨvɨrigua mburuvicha reta kotɨ, ani opaete vae reta kotɨ, cheñono reta vaerä tembipɨɨrɨru pe?
19¿Ketɨ pa oime ñogüɨnoi jókuae ñeemombeúa reta, omoërakua mbaetɨta ko mburuvicha guasu Babilonia pegua opüa peré ani kuae tëtaguasu re vae reta?
20Mburuvicha guasu, romoñera añave jare eendu cheve. Agüɨye emaeño tachereraja reta ye ombaekuatía vae Jonatán jëta pegua tembipɨɨrɨru pe, agüɨye vaerä amano joko pe.
21Jayave mburuvicha guasu Sedequías oporookuai Jeremías opɨta vaerä tembipɨɨ tembipɨɨrɨru joka pe, jare ara ñavo oyereraja vaerä chupe metei mbɨyape, kaye pe mbɨyape imeea reta güi. Mbaetɨ ma mbɨyape tëta guasu pe regua. Jökorai, Jeremías opɨta tembipɨɨrɨru joka pe.
Who We AreWhat We EelieveWhat We Do
2025 by iamachristian.org,Inc All rights reserved.
