2 CRÓNICAS 35 - Guarani Bible with DC

Josías oyapo Pascua(2 R 23.21-23)

1Josías oyapo PascuaEx 12.1-13,21-27; Lv 23.5-8; Nm 28.16; Dt 16.1-8. yandeYa pe, Jerusalén pe, oyuka reta vecha Pascua pegua oyeyuka vae tenondegua yasɨ re catorce araa pe.

2Oñono vi sacerdote reta iparavɨkɨa rupi, oñono kavi oyangareko reta vaerä mbaembae yandeYa jo pe oyeapo vae re.

3Jare jei levita reta opaete Israel iñemuña imboea reta pe, oñeñono tee yandeYa peguarä vae reta pe: “Peñono käjou oñeñono tee Tumpa peguarä vae tupao Salomón, David mburuvicha guasu Israel pegua taɨ oyapo vae pe. Agüɨye vaerä ma pevoɨ avei peroyakavo. Añave peyeokuai yandeYa Tumpa pe, jare imbae vae Israel iñemuña reta pe.

4Peñeñono kavi opaete peñemuña ñavo rupi, peparavɨkɨ iara rupi kavi, David mburuvicha guasu Israel pegua jare taɨ Salomón2 Cr 8.14. mborookuai oeya rami.

5Pepɨta metei yemboyao levita reta o mbaemboetea pe metei tëtara ñavo güi, metei ñemuña vae Israel pegua reta jekovia pe.

6Peyuka vecha Pascua pegua oyeyuka vae, peñeñono tee jare peñono kavi perëtara reta pe ipuere vaerä oyeapo yandeYa oporookuai Moisés rupi vae.”

7Jare mburuvicha guasu Josías omee opaete joko pe ñogüɨnoi vae reta pe jɨmba reta güi Pascua pe oyeyuka vaerä: Vecha jare vecha kuimbae taɨrusu vae, kavara kuimbae taɨrusu vae, opaete reve jae ko treinta mil, jare tres mil toro taɨrusu vae.

8Jökorai vi omee mburuvicha guasu iyɨvɨrigua reta ipɨa yerovia reve kavi opaete vae reta pe, sacerdote reta pe jare levita reta pe. Jökorai vi Hilcías, Zacarías, jare Jehiel, Tumpa jo pe oyangareko vae reta, omee sacerdote reta pe dos mil seisciento vecha jare tresciento toro taɨrusu vae, Pascua oyeapo vaerä;

9jaeramiño vi levita juvicha reta Conanías jare Semaías jare tɨvɨ Natanael, jare Hasabías, Jeiel jare Josabad omee reta levita reta pe cinco mil vecha jare quiniento toro taɨrusu vae, Pascua pe oyeyuka vaerä.

10Jaema oyemboɨpɨta mbaemboete yave, sacerdote reta oñeñono jenda jenda ae rupi jare levita reta opa oñeñono oyemboyao yao ñogüɨnoia rupi, mburuvicha guasu oporookuai rami.

11Jayave oyuka reta mɨmba Pascua pegua; jare levita reta omboi ramboeve mɨmba reta, sacerdote reta oñapiramo tugüɨ pe mɨmba oyeyuka oyeapɨ jese vae, jókuae tugüɨ levita reta güi omboresive vae.

12Javoi ombosɨrɨ reta mɨmba ikɨragüe opata oyeapɨ vae güi, omee reta tëtara ñavo pe, jae reta omee vaerä yandeYa pe, Moisés jembikuatía pe mborookuai oyekuatía oï rami; jökoraiño vi oekɨ reta toro taɨrusu vae reta güi.

13Jare omboyɨ reta soo Pascua pegua tätapɨi re, oyekuatía oï rami;Ex 12.8-9. jare ïru mbota oñeñono tee vae reta omboyɨ reta yapepo pe, takɨpe pe, ani ïru yapepo pe, jare opa omboyao yao reta jarembae pegua opaete vae pe.

14Javoi levita reta oyapo iyeupeguarä jare sacerdote reta peguarä, echa sacerdote reta Aarón iñemuña reta güɨnoi jeta yae mbaravɨkɨ pɨ̈tu regua, omee reta vaerä mɨmba oyeyukagüe opaetei oyeapɨ vae jare mɨmba ikɨragüe; jáeramo levita reta oyapo iyeupeguarä jare sacerdote reta Aarón iñemuña reta peguarä.

15Jökoraiño vi otairari vae reta, Asaf iñemuña reta ñogüɨnoi jenda jenda ae rupi, David, Asaf, Hemán jare mbae re oecha voi vae Jedutún, mburuvicha guasu pe oyeokuai vae reta iporookuai pe jei rami.1 Cr 25.1. Jare öke iyangarekoa reta ñogüɨnoi vi jenda jenda ae pe; metei ave chugüi reta mbaetɨ ipuere osɨrɨ jenda güi, echa jëtara levita reta oyapo chupe reta, jae reta oyapota tëi vae.

16Jökorai oyeapo opaete mbaembae yandeYa pe jókuae ara, oyeapo vaerä Pascua jare mɨmba oyeyukagüe opaetei oyeapɨ vae, mɨmba oyeyuka oyeapɨ jese vae yandeYa imbae re, mburuvicha guasu Josías oporookuai rami.

17Jare Israel iñemuña reta ñogüɨnoi joko pe vae oyapo Pascua jókuae ara, jare chiu ara arete mbaemboete pegua, mbɨyape oyembovumbae oyeu vae.Ex 12.1-20.

18Mbaetɨi körai oyeapo Pascua kuae rami vae Israel pe, ñeemombeúa Samuel oiko güire; mbaetɨi vi metei mburuvicha guasu Israel pegua oyapo Pascua mburuvicha guasu Josías oyapo rami, sacerdote reta ndive jare levita reta ndive, jare opaete Judá jare Israel pegua reta ndive, joko pe ñogüɨnoi vae reta, opaete Jerusalén pegua reta ndive.

19Josías dieciocho año ma oiko mburuvicha guasurä yave oyeapo kuae Pascua.

Josías imano(2 R 23.28-30)

20Opaete kuae mbaembae oyeapo güire, Josías opa oyapo kavi yandeYa jo güire, Necao mburuvicha guasu Egipto pegua oë ojo oñeraro vaerä Carquemis pe ɨ̈aka Éufrates kotɨ. Jare Josías oë japerä pe;

21ërei Necao omondo ñee jerajaa reta jei chupe: “Mburuvicha guasu Judá pegua agüɨye chemoambeko. Echa mbaetɨ ko ayu aporepeña nderé, ïru tëtaguasu oñeraro oï che ndive vae re ko. Tumpa jei cheve cheandeko vaerä; jayave agüɨye eyovaicho Tumpa kotɨ, che ndive oï vae re, jökorai agüɨye vaerä nemokañɨtei.”

22Ërei Josías ñäteɨ osɨrɨ, oipotañoi oñeraro jae ndive, mbaetɨ oendu Necao omondo jei chupe vae, jókuae ñee Tumpa güi etei ou vae. Jare ou oñeraro vaerä jae ndive Meguido pe.

23Jare uvɨ regua reta oñɨvo mburuvicha guasu Josías. Jare mburuvicha guasu jei iyɨvɨrigua reta pe: “¡Cherenoe kuae güi, echa tuicha yae chepere!”

24Javoi iyɨvɨrigua reta güɨnoe käretou ñeraro pegua güi, jare oñono reta ïru käretou güɨnoi vae pe, jare güɨraja reta Jerusalén pe, joko pe omano. Jare oñotɨ reta iñemuñagüe reta oñeotɨa pe. Opaete Judá jare Jerusalén pegua reta oäpiro Josías imano.

25Jare JeremíasJer 1.1-2; 3.6; 22.10-15. oyapo metei tairari mbɨatɨtɨ pegua Josías imano re. Opaete kuimbae jare kuña oikatu otairari vae reta omboaɨkuere kuae tairari reta mbɨatɨtɨ pegua Josías re añave rupi. Kuae tairari oñejäa opaete Israel pe jare oime oyekuatía oï tairari reta mbɨatɨtɨ pegua oyekuatiaa pe.

26Ïru mbaembae Josías oyapo vae regua, opaete iporomboete rupi kavi oyapo yandeYa iporookuai pe oyekuatía oï rami,

27tenonde rupi jare taɨkue rupi mbaembae oyapo vae, oime oyekuatía oï tembikuatía mburuvicha guasu reta Israel pegua jare Judá pegua regua oyekuatía oïa pe.