SABIDURÍA 14 - Guarani Bible with DC

1Ïru vae kuimbae, oyeupita ma oï barco pe

ojo vaerä ɨaparúa yavaete katu vae rupi vae,

tenonde oyerure räri metei ɨvɨra pe, ma tätambae ete jókuae ojota oï pɨpe vae güi vae.

2Jae oiparavo iyeupe jókuae pe ojo vaerä

jare jae ko kia ipoki vae reta oyapogüe vae,

3ërei nde remeegüe ko, cheRu, jókuae imboguataa,

echa nde ko reñonota japerä ɨguasu rupi

jare metei tape raɨ rami ɨaparúa ipäu rupi,

4jare jökorai reechauka nde ndepuere reroasa oipotagüe susere güi vae,

jare jökorai ma oikuaambae ave ipuere vaerä oyeupi pɨpe.

5Mbaetɨ reipota oyeporu mbae ndearakuaa rupi oyeapogüe vae;

jókuae ramo, kuimbae reta oñono jekove ojo kavi vaerä metei barco ɨvɨra pegua tätambae vae pe,

jókuae pe oasa reta ɨaparúa reta

jare opa yogüɨraja oväe ɨvɨ oïa pe ikavi mbaetɨ maratu reve.

6Jökoraiño vi ko, iyɨpɨ yave,

opa omano yave kuimbae jarusu vae reta oyembotuichagüe vae reta,

opaete ɨvɨ ipo reta oñono oasayepe vaerä metei barco pe,

ndepo güɨroata vae ko, oeya ɨvɨ pe

temitɨ rami oiko pɨau vaerä kuimbae reta.

7¡Ikavigüe yae jei vae ko ɨvɨra oyemboembiapo kavi vae!

8¡Ikavimbae yae ko jókuae ɨvɨra tumpa-raangarä oyeapo vae!

¡Ikavimbae yae ko tumpa-raanga jare iyapoa,

jae oyapo jeko pegua

jare jókuae echa, mbae ikúi katu vae oiko reve, oñeenɨi oiko tumpa pe!

9Tumpa omotareɨ ikavimbae jare iyapoa;

10jare, oyeapogüe jare iyapoa, oñenupata ko.

11Jókuae ramo, Tumpa opata ko omboai itumpa tee vae reta itumpa,

echa, yepe ndipo mbae Tumpa oyapogüe vae,

ërei jae oyeapo mbae ikavimbaerä,

mbae ikavimbae ko kuimbae reta pegua

jare ñuai rami ko yarakuaambae reta ipɨ peguarä.

Tumpa raanga reta iyɨpɨ yave oyemboete vae

12Tumpa-raanga reta oyeapoɨpɨ güive jaema ojo yoapɨ mbae ikavimbae vae;

jae ko metei mbae tekove omokañɨtei vae.

13Iyɨpɨ yave mbaetɨ ko oiko tumpa-raanga reta, jare ngaraaí oiko avei oiko.

14Yogüeru ko ɨvɨ pe kuimbae reta güɨrovia jese ramo,

jare jókuae ramo Tumpa oñono opa vaerä jarembaeño okañɨ reta.

15Metei michia tu, täta ipɨatɨtɨ taɨ jupivei omano vae pe,

oyeekɨ rai yae chugüi jeko pegua,

jae oyapo iä iyeupe,

jókuae ko tenonde yave jaeño ma metei kuimbae omano vae,

jae jókuae taɨkue rupi omboete tumpa rami,

jare oyapo, jëtara reta pegua, mbaemboeterä jare yemboareterä.

16Jaɨkue ete, ara oasa ojo vae ndive, jókuae yepokuaa jaekavimbae vae

jaema oñemotäta jare ojo oyekuaa mborookuai rami.

17Jökoraiño vi, mburuvicha reta mborookuai omeegüe rupi

jae reta iä oyemboɨ oï vae ave ma omee oyemboete vaerä.

Jaema oime amogüe reta matɨ yogüɨreko vae

mbaetɨ ma ipuere omboete reta jae etei,

oyapo reta oyoupe metei mburuvicha guasu iä

jae rami etei vae

omboete reta vaerä,

oyeaeä reta jese vaerä, jae ete mbaetɨ oï pegua,

oime joko pe oï rami.

18Jupivei, jaema ipoki mbae iä oyapo vae opoko oyapo,

kia mburuvicha guasu oikuaambae reta peguarä,

omboete vaerä,

19echa, oipota reta mburuvicha omboyerovia jeko pegua,

amogüe oasa ete ipoki jeko pegua ombokavi iä iyeupe.

20Jaema jökorai kuimbae reta, oecha jókuae oyeapogüe ikavi yae jeko pegua,

opoko oñono ete reta omboete vaerä

yɨpɨño tenonde yave kuimbae ramiño omboete yogüɨreko vae.

21Jókuae jaema oyeapo metei tavɨ kuimbae reta peguarä,

echa jae reta, mburuvicha jekopochɨ vae jembiokuairä yogüɨreko jeko pegua,

omee reta ita pe jare ɨvɨra pe

jókuae tee Tumpa jee.

Tumpa-raanga reta oyemboete jeko pegua oiko vae

22Jare, imbaeyavɨ re yangapɨɨaño reve jekuaeñoi mbaetɨ oikuaa reta Tumpa,

jókuae güi ma kuimbae reta yogüɨreko ñoraro rupi

yarakuaa jeko pegua,

¡jare jókuae ikavimbae vae oero reta pɨakavi!

23Omboete reta michia oyuka reta yave,

omboarete reta mbae oyekuaambae pe

ani ramo oyapo reta arete ambuaeyee yae vae;

24mbaetɨ tekove omboete reta jare menda ave,

jaeño ma oyapo reta kuimbae oyuka vaerä ïru vae kuimbae tavɨ rupi

ani ramo oiporara chupe güɨreko vɨari oiko chugüi jembireko.

25Opaete jókuae jae ko yembojopa, mano, yoyuka, monda, tavɨ,

oyeguauka vae, aguara, ñemoi pochɨ, mbae añete mbae vae,

26yembojopa mbae jepɨ vae rupi vae, yovaicho,

tekove yamongɨa vae, kuña ndive mbae oyapo vae,

menda oyemboai vae, aguasa jare ïru ikavimbae vae.

27Mbaemboete oñemee tumpa-raanga pe vae

jae ko, opaete mbae ikavimbae iyɨpɨ;

28kia jókuae omboete vae reta oyapo arete opa mbae güi oñemoakañɨ vaerä,

ani ramo ojäa kuri mbae oikota jaanga vae, ani ramo jei oyoupe jupi reveä oiko vae,

ani jei jaanga reta Tumpa jee re yavaimbae reve.

29Jaema tumpa oikovembae re güɨrovia ñogüɨnoi jeko pegua,

oyemongeta reta jei jaanga Tumpa jee re vae ngaraa mbae pɨ̈chɨi vae güeru chupe reta vae.

30Ërei oiporara retata ko kuri mókoi mbae jeko pegua:

Tumpa re oyemongeta jaanga vae jeko pegua, jare tumpa-raanga omboete reta jeko pegua,

jare jei reta Tumpa jee re mbae añetegüe re vae jare jupigüe kotɨ vae jeko pegua

jare jeta mbae ikɨambae güɨröɨro reta jeko pegua.

31Jókuae tumpa-raanga, jae reta jei Tumpa jee re jese vae ko, güɨnoi mbaepuere,

jaeño ma ko tembiporara oime jare kuri outa iyoa vae reta pegua vae ko

oata mbae ikavimbae oyapo vae reta re.