ECLESIÁSTICO 20 - Guarani Bible with DC

Iyarakuaa vae jare mbaetɨ iyarakuaa vae

1Oime yeopia reta ndei iara mbove,

jare oime amogüe kïrii yarakuaa ramo.

2Má ikavi yamboetaiño vae yandearasɨ vae güi.

3Kia ñavo imbaeyavɨ omoañete vae, oasayepeta mbaesusere güi.

4Metei kuimbae oyeapiaogüe oipota metei kuñatai re opoko vae rami,

jökorai ko kia oipota jeia rupi oyapo yembojupi vae.

5Amogüe reta oñemokïrii iyarakuaa vae rami

jaema ïru vae reta, oasa ete imiari vae güi, oñemotareɨuka.

6Amogüe reta oñemokïrii echa mbaetɨ oikuaa mbae jei vaerä,

jare ïru vae reta oñemokïrii oäro vaerä jëgua chupe vae.

7Iyarakuaa vae oñemokïrii oï kia pe jaekavi chupegua,

ërei iyarakuaambae ko mbaetɨ mbae oäro.

8Kia oasa ete imiari vae oñemotareɨuka ko,

jare kia imbaeyuvanga imbaepuere rupi vae oñemotareɨuka vi.

9Amo yave mbae oë kavi vaerä ñaväeä susere rupi,

jare oime vi mbae ñanoigüe ma opa ye ñamokañɨ vae.

10Amo yave omee oekɨ mbae reve chugüi mbae ikavigüe,

jare oime vi, remee yave, renoita má jeta.

11Oime yemboete reta iyapɨ susere peväe,

jare oime amogüe mbaravete reve iñäka omopüa vae.

12Amogüe jeta ombaegua jepɨa ramo,

ërei omboepɨ ko ma yé chiu vae güi jepɨ ae güi.

13Iyarakuaa vae mbovɨ ñee vae peño ko oyeaɨukata,

ërei yarakuaambae iporomboete oñereröɨrota ko.

14Metei iyarakuaambae mbae pe ndembopotagüe ngaraa mbaerä oë ndeve;

jae tuicha yae ko oecha oiko ae vae güi;

15yepe michi omee, täta omoërakua

jare oyurupeka kia mbae tuicha vae omoërakua rami.

Añave oiporukata ndeve jare pɨareve oeka yeta ma ndeve:

¡Kuimbae iporomotareɨgüe vae!

16Yarakuaambae jeita: “¡Che mbaetɨ ko chechëi reta!

¡Mbaetɨ ko kia yasoropai oyapo ikavi vae oyapo vae re!

17Cherembíu jou reta jare imiari kaviä reta cheré.”

¡Ërei mbovɨ ndipo opuka reta jese!

18Má ikavi yayepɨtakua rupi yaa vae,

ñanekü yandereitɨuka vae güi,

ikavimbae reta oa vaerä jökoraita ko ou güɨramoi peguaño.

19Metei kuimbae oñerambae mbae ipöra mbae ma rami ko

echa ojäa teiiño yarakuaambae reta.

20Yembojaanga reta yarakuaambae iyuru pe jaekaviä etei ko oa,

echa ko jae mbaetɨi ojäa jëgua chupe yave.

21Amogüe mbaetɨ ko iyoa paravete vae jeko pegua;

oputuu reta yave oyemongeta kïrii kavi güɨnoi reta.

22Ïru vae reta oñemokañɨtei imara jeko pegua

jare yarakuaambae güi okɨɨye ramo.

23Amogüe, imbaepoɨu güi, oñererökuavee ichëi vae pe,

jaema oata mbae chupe reve oyapo iyeupe metei tovaicho.

24Apu jae ko metei mbae kuimbae ombogüɨ vae;

jaeñoi oväeta yarakuaambae reta iyuru pe.

25Imonda vae jae ko iyapu vae ipɨapotaa,

ërei opareve ojota kañɨtei pe.

26Iyapu vae ndive oikota yemboetembae;

jaeñoi oechata iyé yemboetembae.

27Yarakuaa vae oipea tape iyeupe yavaimbae reve,

jare ipɨarakuaa katu vae oyeaɨuuka tuicha vae reta pe.

28Kia ñavo ɨvɨ re oparavɨkɨ vae ombaarɨvota ko,

jare kia tuicha vae reta pe oyeaɨuuka vae

güɨnoita ko ñemoɨ̈ro imbaeyoa yave.

29Mbota reta mbaetɨ omboesa rami yarakuaa vae,

jare oñono jese metei jakima omboavai vaerä emboeta.

30Arakuaa oñeomi yave jare mbaeyekou oñeomi yave,

¿kia pe ya mbaerä ikavita?

31Má ko ikavi pɨarakuaambae oñeomi vaerä

arakuaa oñeomi vae güi.