ÉXODO 35 - Guarani Bible with DC

Mborookuai ara mbutuu regua(Ex 31.12-17)

1Moisés omboatɨ opaete Israel iñemuña reta, jare jei chupe reta:

“Kuae ko jae mbaembae reta, yandeYa oporookuai oyeapo vaerä vae:

2Ova ara toyeparavɨkɨ, ërei chiúa ara toiko tee peve, ara mbutuu pegua yandeYa peguarä,Ex 20.8-11; 23.12; 31.15; 34.21; Lv 23.3; Dt 5.12-14. kia nunga vae oyapo yave oipotagüe mbaravɨkɨ jókuae ara, tomano.

3Agüɨye etei peyatapɨ peikoa rupi ara mbutuu pegua pe.”

Mbota tupao guakapi pegua peguarä(Ex 25.1-9)

4Moisés imiari opaete Israel iñemuña reta pe, jei reve: “Kuae ko jae yandeYa iporookuai:

5Pemboatɨ oyougüi reta mbota yandeYa peguarä; opaete ipɨakavi vae togüeru yandeYa pe oro, korepoti, jiero iyu vae,

6vecharaagüe inimbo jovɨ vae, pɨ̈taü vae, pɨ̈taasɨ vae, jare lino oyeambae, kavara jaagüe,

7vecha kuimbae ipire oñemopɨ̈tagüe, mɨmbapire ikavi yae vae, ɨvɨra käti,

8asaite mechero peguarä, mbaembae ikäti kavi vae asaite yeparavo peguarä, jare incienso ikäti kavi yae vae oyeapo vaerä,

9jare ita ónice jee vae, ita temimonde iyɨvambae reguarä jare pɨtía reguarä.

Mbaembae oyeapo tupao guakapi pegua peguarä vae(Ex 39.32-43)

10Opaete pepɨte pe ipɨarakuaa ipoki mbae oyapo vae reta toyogüeru toyapo opaete mbaembae yandeYa oporookuai jese vae, jae ko:

11Tupao guakapi pegua, iküaraɨa, iküaraɨa iarambogua, itɨ̈ai reta, iɨvɨra ipe vae reta, iɨvɨra oyepɨasa vae reta, okɨta reta jare iguapɨka reta;

12käjou jare iɨvɨra oyepɨasa vae reta, ñɨ̈ro renda käjou itapa jare asoya o imboyaoa;

13mesa jare iɨvɨra reta, jare opaete jembiporu reta jare mbɨyape mbaemboete pegua;

14mechero renda jare jembiporu reta, jare imechero reta jare asaite mechero peguarä;

15ikäti kavi vae incienso oyeapɨ jese vae jare iɨvɨra reta, asaite yeparavo pegua jare incienso ikäti kavi yae vae, asoya tupao guakapi pegua jöke reguarä;

16mɨmba oyeyukagüe opaetei oyeapɨ jese vae, jare japɨpe pegua güɨrapembɨecha vae, iɨvɨra reta jare opaete jembiporu reta, jare ɨrɨru iguapɨka ndive;

17asoya reta oka ikësearä, poste reta jare iguapɨka reta jare oka jöke re asoya oï vaerä;

18tupao guakapi pegua ietaka reta, jare oka ikësea ietaka reta jare iïcha reta;

19temimonde reta o mbaemboetea pegua pe mbaravɨkɨ oyeapo yave oyemonde vaerä, temimonde ikavi yae ete vae sacerdote Aarón peguarä jare taɨ reta jemimonderä.”

Opaete vae güeru mbota

20Jayave opaete Israel iñemuña reta yogüɨraja Moisés oïa güi,

21javoi, opaete ipɨa pe oyandu kɨ̈reɨ ngatu vae, ipɨakavi reve güeru mbota yandeYa pe, tupao guakapi pegua oyeapo vaerä jare opaete mbaembae pɨpegua oyeapo vaerä, jare temimonde retarä.

22Yogüeru kuimbae jare kuña, opaete ipɨa-kɨ̈reɨ vae güeru mboɨ, namicha, moäka-vera jare poapɨ regua, jare opaete mbaembae oro pegua, opaete vae reta omee mbota oro pegua yandeYa pe.

23Opaete güɨnoi vecharaagüe inimbo vae, güeru inimbo jovɨ vae, pɨ̈taü vae, pɨ̈taasɨ vae, jare lino oyeambae, kavara jaagüe, vecha kuimbae ipire oñemopɨ̈tagüe, mɨmbapire ikavi yae vae, kuaekuae güeru reta.

24Opaete mbota reta korepoti ani jiero iyu vae omee vae reta, güeru yandeYa pe, jare opaete ɨvɨra käti güɨnoi vae reta, güeru opaete mbaembae reta oyeapo vaerä.

25Kuña reta ipoki omaepöva vae güeru inimbo jovɨ vae, pɨ̈taü vae, pɨ̈taasɨ vae jare lino oyeambae;

26opaete kuña reta ipoki omaepöva vae, oyandu ipɨa pe kɨ̈reɨ ngatu vae oipöva kavara jaagüe.

27Mburuvicha reta güeru ita ónice jee vae, jare ita temimonde iyɨvambae reguarä jare pɨtía reguarä,

28jare mbaembae ikäti kavi vae, asaite mechero peguarä, asaite yeparavo peguarä jare incienso ikäti kavi yae vae oyeapo vaerä.

29Kuimbae jare kuña Israel iñemuña reta, oime kɨ̈reɨ ngatu güɨnoi oporomborɨ vaerä opaete mbaravɨkɨ pe vae, oyeapo vaerä yandeYa oyókuai Moisés vae, güeru reta mbota ipɨakavi reve yandeYa pe.

Bezaleel jare Aholiab oyeparavo mbaravɨkɨ oyapo vaerä(Ex 31.1-11)

30Moisés jei Israel iñemuña reta pe: “Mase, Judá iñemuña pegua güi yandeYa oiparavo Bezaleel, Uri taɨ, Ur jɨmɨmino.

31Jare omee chupe Tumpa iEspíritu, arakuaa katu, oikuaa katu yae vaerä mbaembae jare ipoki yae vaerä opaete mbaembae oyapo,

32oikatu yae vaerä mbae ojäa kavi oyapo, oro pegua, korepoti pegua jare jiero iyu vae pegua;

33oikatu vaerä oñopa ita jepɨ vae mbae omopöra vaerä, oikatu yae ɨvɨra güi mbae oyapo vaerä; oikatu vaerä oyapo oipotagüe mbaravɨkɨ.

34Jare omee chupe arakuaa katu oporomboe vaerä, jae jare Aholiab, Ahisamac taɨ, Dan iñemuña pegua.

35Jare omee chupe reta arakuaa katu, oyapo reta vaerä opaete mbaravɨkɨ oñeopa oyeapo vae, jare oikatu iyeɨgüi aeño mbae ojäa kavi oyapo vae, temimonde oyekuatía vaerä, vecharaagüe inimbo jovɨ vae, pɨ̈taü vae, pɨ̈taasɨ vae pe jare lino pegua pe, jare mbae oñepöva oyeapo vae pegua, oyapo reta vaerä oipotagüe mbaravɨkɨ; jare oyapo reta vaerä opaete mbaravɨkɨ kërai oñejäa kavi jare oñemopöra kavi oyeapo vae.