2 CRÓNICAS 29 - Guarani Bible with DC

Ezequías oiko mburuvicha guasurä Judá pe(2 R 18.1-3)

1Ezequías güɨnoi veinticinco año omboɨpɨ oï mburuvicha guasurä yave, jare oiko mburuvicha guasurä veintinueve año Jerusalén pe. Ichɨ jee Abías, jae ko Zacarías tayɨ.

2Oyapo jupi vae yandeYa jesa róvai, opaete iñemuñagüe David oyapo rami etei kavi.

3Metei añoa re ma oï mburuvicha guasurä yave, tenondegua yasɨ Nisán jee vae re oipea yandeYa jo jöke reta, jare oñono kavi.

4Javoi oekauka sacerdote reta jare levita reta, omboatɨ reta tupao joka kuaraɨ oëa kotɨgua pe.

5Jare jei chupe reta: “Leví iñemuña reta, peyeapɨsaka cheré: Peñeñono tee añave, peñono tee vi yandeYa jo, peñemuñagüe reta iTumpa jo. Penoe tupao güi opaete ikavimbae.

6Echa peñemuñagüe reta oyembopɨapochɨ, oyapo reta ikavimbae yandeYa Tumpa jesa róvai; oeya reta yandeYa itupao, oyerova reta chugüi.

7Oyokenda reta oka ikësea jöke, ombogüe reta mechero reta, mbaetɨ ma oapɨ reta ikäti kavi vae incienso jare mbaetɨ ma omee reta mɨmba oyeyukagüe opaetei oyeapɨ vae o mbaemboetea pe, Israel iTumpa pe.

8Jáeramo yandeYa iyarasɨ Judá pegua reta kotɨ jare Jerusalén pegua reta kotɨ jare opa oeya mbɨatɨtɨ pe, ñemotareɨ rupi jare yeyóyai yóyai rupi; pe reta etei peecha añave rupi penoi rami.

9Jáeramo ko ñaneñemuñagüe reta opa omano ñeraro pe, yanderaɨ reta jare yanderayɨ reta jare yanderembireko reta opa oyererajauka tembipɨɨrä.

10Añave, che añeñono ayapo vaerä morogüɨrökuavee päve yandeYa ndive, Israel iTumpa ndive, agüɨye vaerä mo iyarasɨ yandekotɨ.

11Jáeramo añave, cheraɨ reta, agüɨye peyembotavɨ echa yandeYa ko peparavo peiko avei vaerä jae jóvai, peyeokuai vaerä chupe, jare peapɨ vaerä chupe ikäti kavi vae incienso.”

12Jayave levita reta omboɨpɨ oparavɨkɨ vae jae ko kuae reta: Coat iñemuña reta pegua jae: Mahat, Amasai taɨ jare Joel, Azarías taɨ; Merari iñemuña reta pegua jae: Cis, Abdi taɨ jare Zacarías, Jehalelel taɨ; Gersón iñemuña reta pegua jae: Joa, Zima taɨ jare Edén, Joa taɨ;

13Elizafán iñemuña reta pegua jae: Zimri jare Jeiel; Asaf iñemuña reta pegua jae: Zacarías jare Matanías;

14Hemán iñemuña reta pegua jae: Jehiel jare Simei; jare Jedutún iñemuña reta pegua jae: Semaías jare Uziel.

15Kuae reta omboatɨ jëtara reta jare oñeñono tee reta opaete Tumpa peguarä, javoi oike reta tupao pe mburuvicha guasu jei rami jare yandeYa iporookuai jei chupe reta rami, oitɨo reta vaerä tupao guasu.

16Jayave oike sacerdote reta yandeYa jo pe oitɨo vaerä, güɨnoe reta oka pe opaete ikavimbae japɨpe pe oväe vae, joko güi levita reta güɨraja ikatu pe ɨ̈aka raɨ Cedrón jee vae pe.

17Omboɨpɨ reta oñono tee Tumpa peguarä tenondegua ara pe, tenondegua yasɨ re, juri ara pe jókuae yasɨ reño ñogüɨnoe reta yandeYa jo joka pe, jare oñono tee reta yandeYa jo juri ara pe, jare diecisei ara pe jókuae yasɨ re opa omboapɨ oitɨo.

18Jayave yogüɨraja mburuvicha guasu Ezequías pɨri, jare jei reta chupe: “Opaetei ma roitɨo yandeYa jo, mɨmba oyeyuka oyeapɨ jese vae opaete jembiporu reve, jare mesa mbaemboete pegua opaete jembiporu reve.

19Jaeramiño vi royapo kavi jare roñono tee Tumpa peguarä opaete tembiporu reta, Acaz mburuvicha guasurä oiko yave, mbaetɨ iporogüɨrovia kavi jeko pegua opa omboai vae, añave oime oï yandeYa pe mɨmba oyeyuka oyeapɨ jese vae jóvai.”

20Jare mburuvicha guasu Ezequías opüa ndeimboveasɨ omboatɨ mburuvicha reta tëta guasu pegua jare ojo yandeYa jo kotɨ.

21Jare güɨraja reta chiu toro taɨrusu vae, chiu vecha kuimbae, chiu vecha kuimbae taɨrusu vae, jare chiu kavara kuimbae Tumpa iñɨ̈ro vaerä mbaeyoa reta re: Mburuvicha guasu reta pe, o mbaemboetea pe oyeokuai vae reta pe jare Judá pegua reta pe. Javoi mburuvicha guasu oyókuai sacerdote reta Aarón iñemuña reta omee vaerä yandeYa pe mɨmba oyeyukagüe opaetei oyeapɨ vae mɨmba oyeapɨ jese vae re.

22Jayave oyuka reta toro taɨrusu vae jare sacerdote reta omboɨru jugüɨgüe jare oñapiramo reta pɨpe mɨmba oyeyuka oyeapɨ jese vae. Jökorai vi oyapo reta vecha kuimbae reta jugüɨgüe pe.

23Jaɨkue rupi güɨraja reta mburuvicha guasu jóvai jare opaete vae jóvai kavara kuimbae reta Tumpa iñɨ̈ro vaerä mbaeyoa re, jare oñono reta ipo jókuae mɨmba reta iñäka re.

24Jare sacerdote reta oyuka jare jugüɨgüe oñapiramo reta mɨmba oyeyuka oyeapɨ jese vae re, Tumpa iñɨ̈ro vaerä Israel iñemuña reta iyoa re; echa opaete Israel iñemuña reta re mburuvicha guasu oporookuai oñemee vaerä mɨmba oyeyukagüe opaetei oyeapɨ vae, jare mɨmba oyeyuka Tumpa iñɨ̈ro vaerä mbaeyoa re vae.

25Ezequías oñono vi yandeYa jo pe levita reta platillo reta reve, ngitara reta reve jare arpa reta reve, David jare mbae re oecha voi vae Gad, mburuvicha guasu iyɨvɨrigua jare ñeemombeúa Natán oporookuai rami.1 Cr 25.1. Echa jókuae mborookuai omee yandeYa iñeemombeúa reta rupi.

26Jare levita reta ñogüɨnoi jembiporu tairari pegua reve reve David oporookuai rami, jare sacerdote reta mimbɨguasu reve reve.

27Jayave Ezequías oporookuai oñemee vaerä mɨmba oyeyukagüe opaetei oyeapɨ vae mɨmba oyeyuka oñemee jese vae re. Jare mɨmba oyeyukagüe opaetei oyeapɨ vae oyemboɨpɨ oñemee yave, oyemboɨpɨ vi tairari reta yandeYa kotɨ, mimbɨguasu reta jare tembiporu reta tairari pegua David mburuvicha guasu Israel pegua oporookuai rami.

28Jare opaete Israel iñemuña reta omee mbaemboete, otairari vae reta otairari, jare mimbɨguasu imoñeea reta omoñee mimbɨ guasu. Opaete kuae oyeapo mɨmba oyeyukagüe opaetei oyeapɨ regua.

29Jare opa reta omee yave, mburuvicha guasu jare opaete jae omoïru vae reta oyetavatɨka jae ndive omee vaerä mbaemboete.

30Jayave mburuvicha guasu Ezequías jare iyɨvɨrigua mburuvicha reta jei levita reta pe otairari vaerä yandeYa pe, David jare mbae re oecha voi vae Asaf iñee reta pe. Jare jae reta oyerovia yae reve otairari, jare oyetavatɨka reta omee vaerä mbaemboete.

31Javoi Ezequías jei chupe reta: “Añave pe reta peñeñono tee ete ma ko yandeYa pe, jayave pemee mɨmba oyeyukagüe jare mbota yasoropai pegua yandeYa jo pe.” Jare opaete vae güeru mɨmba oyeyuka vaerä jare mbota yasoropai pegua, jare opaete ipɨakavi vae reta güeru mɨmba oyeyuka opaeteita oyeapɨ vae.

32Jare güeru reta mɨmba oyeyuka opaetei oyeapɨ vaerä vae, jae ko setenta toro, cien vecha kuimbae jare dosciento vecha kuimbae taɨrusu vae. Opaete kuae reta jae ko mɨmba oyeyuka opaetei oyeapɨ vaerä yandeYa pe vae.

33Opaete reve mɨmba reta oñemee vae jae ko seisciento toro jare tres mil vecha.

34Ërei sacerdote mbovɨ jeko pegua, mbaetɨ oupitɨ omboi vaerä opaete mɨmba reta oyeyukagüe opaetei oyeapɨ vaerä vae, jáeramo jëtara levita reta omborɨ opa oyapo reta regua, ïru sacerdote reta opa regua oñeñono tee reta Tumpa pe; echa levita reta jarembae pegua voi oñeñono tee reta Tumpa pe sacerdote reta güi.

35Jökorai oime jeta mɨmba oyeyukagüe opaetei oyeapɨ vae, mbota mbɨakatu pegua oñemee vae ikɨragüe ndive jare mbota vino oyepɨyere vaerä vae mɨmba oyeyukagüe opaetei oyeapɨ vae re. Jare jökorai oyeapo ye mbaravɨkɨ yandeYa jo pegua.

36Jare Ezequías oyerovia opaete vae ndive, Tumpa oñono kavi ye opaete vae reta vae re, echa opaete mbaembae oyeapo jarembae pegua.