1Gorgias güɨraja cinco mil sundaro ɨvɨ rupigua jare mil kavayu regua reta, ñoraro regua katuai, jare pɨ̈tu yave omboɨpɨ oguata reta
2opüa vaerä judío reta jeyupa re iparanoe. Amogüe mbɨa Jerusalén pegua reta etei güɨraja omombeu tape chupe.
3Ërei ngatu, Judas pe jërakua kuae, jare omboɨpɨ oguata isundaro reta ndive oñoövaiti vaerä mburuvicha guasu iejército Emaús pe ñogüɨnoi vae reta ndive,
4oyemboyao ñogüɨnoi ramboeve.
5Gorgias ou tëi oväe yave pɨ̈tu reve Judas jeyupa pe, mbaetɨ etei kia oväe chupe. Opoko oeka reta tëi ɨvɨtɨ rupi, oime echa jokotɨ oñemi ñogüɨnoi chugüi reta okɨɨye ramo.
6Ërei ndeimboveasɨ Judas ojo ma oväe ñuu pe tres mil kuimbae reta ndive, yepe tëi mbaetɨ güɨnoi reta temimonde ñoraro pegua.
7Oecha jovaicho itumpa ambuae vae reta ñogüɨnoi, iyeopiaka katu kavi yae, ikavayu jeta, jare ñoraro regua katuai.
8Jayave Judas jei ikuimbae reta pe: “Agüɨye kuae jeta vae reta tapemongɨɨye, agüɨye vi tapereroa kɨɨye jae reta opüa yanderé yave.
9Pemaendua kïrai yandeɨpɨ reta opa oasayepe Ɨguasu Pɨta vae pe vaere, faraón reta isundaro reta ndive öakuemuña reta yave.
10Yaiporu añave yande Tumpa yandemborɨ vaerä imaendúa vaerä añave ñomoïru oyapo yandeɨpɨ reta ndive vae re jare opa vaerä opɨ̈saa tovaicho reta yanderesa róvai ñogüɨnoi vae.
11Jökorai yave opaete tëta guasu reta oikuaata, ngaraai ko kia oasayepe Israel ipo güi.”
12Tëta ambuaeɨgua reta, oecha yave Israel pegua reta yogüeru ikotɨ,
13ñogüɨnoe jeyupa güi omboɨpɨ vaerä oñoraro. Judas isundaro reta omoñee jemimbɨ
14jare okua oyoe. Itumpa mbuae vae reta iñamɨri jare opa otekuarai ñuu kotɨ.
15Opaete taɨkuegua reta omano kɨsepuku guasu pe. Israel-ɨgua reta oaɨkuemoña ïru reta güɨraja güɨroväe Gezer pe jare ñuu reta Idumea, Azoto jare Jabnia pegua kotɨ. Tovaicho reta opa omano tres mil rupi.
16Judas oyerova ye isundaro reta ndive, opa ma yave oaɨkuemoña jovaicho reta,
17jei jëta pe: “Agüɨye peyemoambeko teyupapo re, echa oime vɨteri jeta ñoraro ñanoi yanderenonde kotɨ:
18Gorgias iejército ndive oime ñogüɨnoi ɨvɨtɨ reta rupi, köiño yandegüi. Peyeumbɨkua perovaicho reta jóvai, jare peñoraro jae ndive. Joko güi pepuere peraja pɨagüive peyeupe jeyupa pe.”
19Opa ramoete Judas kuae ñee ojäa yave, yogüeru oväe ɨvɨtɨ güi tovaicho omae vɨari ñogüɨnoi vae reta.
20Kuae sundaro reta oecha iñeïru reta opa osɨi joko güi jare jeyupa reta opa ókai: tätati oë joko güi vae rupiño jae reta oikuaa ma mbae ko oasa oï joko pe vae.
21Kuae oecha yave, okɨɨye yae reta; jare oecha yave Judas isundaro reta ñuu pe oïndaivi yae ma ñoraro peguarä,
22opaete otekuarai filisteo reta jëta kotɨ.
23Judas joko güi oyerova güɨraja opaetei mbaembae reta jovaicho jeyupa pegua, güɨraja jeta oro jare korepoti, jaeramoño vi tembiapo oñemopɨ̈ta jare pɨ̈taasɨ vae jare jeta ïru mbaeyekou reta.
24Yogüeru oväe yave, Israel-ɨgua reta oyemongoi jare omee yasoropai Tumpa pe, echa jae ipɨakavi, jare iporoaɨu mbaetɨ iyapɨ.
25Jókuae ara tuicha yae Israel pegua echa oporomoamɨri.
26Tëta ambuaeɨgua reta oasayepegüe ojo imiari Lisias pe kuae oasa vae re.
27Jare jae, oendu yave ipɨa jopa opɨta, echa mbaetɨ oë kavi chupe iyemongeta Israel kotɨ mburuvicha guasu oyókuai rami.
Lisias omboɨpɨ güɨropüa teko(2 Mac 11.1-12)28Ïru año pe, Lisias omboatɨ sesenta mil sundaro ɨvɨ rupigua reta güi jare cinco mil kavayu regua reta güi oñoraro vaerä Israel-ɨgua reta ndive.
29Yogüeru oväe Idumea pe jare oyembojeyupa reta Bet-sur pe. Judas oë jape pe diez mil kuimbae reta ndive.
30Oecha yave kuae ejército imbaepuere yae, oyerure körai: “Ndetuicha vae ko nde, Israel oepɨ vae, jarusu vae Goliat remoamɨri nderembiokuai David ipo rupi jare filisteo reta iejército reñono Jonatán ipo pe, jae ko Saúl taɨ, jare vi jembiporu ivoɨka pe.
31Jökoraiño vi, emee nerëta Israel ipo pe kuae ejército, jae reta, opaete ikavayu ndive, opɨta vaerä ñemomarai pe.
32Emongɨɨye reta, emboai chugüi ipɨayemboete mɨ̈rata omee chupe vae, jare eipɨso eñono reta ñemoamɨri pe.
33Opa eipɨaka reta nderaɨu vae reta ikɨsepuku guasu pe, opaete ndekuaa vae reta oyemongoi vaerä ndeve mbaemboete pegua pe.”
34Jökorai omboɨpɨ reta ñoraro, jare cinco mil rupi Lisias isundaro reta oa Israel-ɨgua reta ipo pe.
35Lisias oecha ma yave iejército iñamɨri jare Judas isundaro reta ndive jëia yae, echa yogüeru jäta ngatu reve oñono vaerä jekove etei mano ipo pe, jae ojo Antioquía kotɨ oipɨɨ ye jeta ñoraro regua reta ou ye vaerä Judea kotɨ.
Oyemboɨpɨ ye mbaemboete tupao pe(2 Mac 10.1-8)36Judas jare jëtara reta jei oyoupe: “Opa ma yande rovaicho reta ñamoamɨri, añave yaja yaikɨayoe jare yamboeteuka ye yande tupao.”
37Opaetei ejército reta oyomboatɨ oyeupi vaerä ɨvɨtɨ Sión re.
38Joko güi oecha reta itupao oyemboai vae, mɨmba oyeyuka oyeapɨ jese vae oñemomarai, öke reta opa ókai; joka rupi opa ma ñana oë, ɨvɨtɨ ani kaa rupi rami; o reta opa oyemboai.
39Jayave omondoro reta jemimonde, oechauka vaerä jasɨ katu reve ipɨatɨtɨ, oñemona reta tanimbu pe,
40jare oñaɨvɨ reta jesɨva omboya regua ɨvɨ re. Joko güi mimbɨguasu ipu rupive, jäsémbai reta Tumpa kotɨ.
41Jaema voi etei Judas omee ñee isundaro reta okua vaerä jókuae tëta mí re, jae oikɨayoe ramboeve tupao.
42Oiparavo sacerdote reta jeko ikɨambae vae, mborookuai güi opiambae vae,
43oikɨayoe vaerä vaerä tupao jare güɨrosɨrɨ vaerä ita oyemongɨa vae ïkotɨa.
44Joko pe oyemongeta reta räri yogüɨreko mbae ko oyapota jókuae mɨmba oyeyuka oyeapɨ jese vae mbaeyuka renda oyemongɨa vae ndive,
45jökorai yave oyemongeta reta opaetei vaerä omboai, agüɨye vaerä kia omboeko reta kuri, echa ko itumpa ambuae vae reta omongɨa ma. Jáeramo opa omboai reta kuae mɨmba oyeyuka oyeapɨ jese vae
46jare güɨraja reta oeya jókuae ita reta tupao iyapɨte re, oñovatu kavi oñono, ou regua metei ñee imoërakuaa jei chupe reta mbae ko oyeapota jae ndive kuri.
47Joko güi oekɨ reta ita oñeopambae, mborookuai jei rami, jare oyapo ye pɨau reta tenondegua mɨmba oyeyuka oyeapɨ jese vae rami etei.
48Omopüa pɨau reta ye tupao, oyapo kavi reta japɨpe jare oikɨayoe reta joka.
49Oyapo pɨau ye reta karuarɨru ikɨambae vae jare oñono ye mbaemboetea renda pe mechero jenda, mɨmba oyeyuka oyeapɨ jese vae incienso regua jare vi karúa renda mbɨyape Tumpa pegua jendarä.
50Oapɨ reta incienso mɨmba oyeyuka oyeapɨ jese vae iárambo jare omoendɨ reta mechero jendɨ avei vaerä mbaemboetea renda pe.
51Oñono reta mbɨyape karúa iárambo jare oupi reta cortina, jare jökorai opa omboapɨ reta iparavɨkɨ.
52Ara veinticinco chaúa yasɨ pe (kuae ko oenɨi reta Quisleu yasɨ) ciento cuarenta y ocho año pe, opüa reta ndeimboveasɨ
53jare güɨrökuavee reta, mborookuai jei rami, tembiyuka mɨmba oyeyuka oyeapɨ jese vae ipɨau vae iárambo.
54Metei año kavi ma oasa itumpa mbuae vae reta omongɨa güire mɨmba oyeyuka oyeapɨ jese vae yave, jókuae ara etei, omongarai reta yemongoi pe, arpa raɨ, arpa jare platillo reta pe.
55Opaetei tëta oa itava re ɨvɨ pe jare oñaɨvɨ reta ɨvɨ re oa regua omboete vaerä Tumpa jare oyapo vaerä yasoropai opaete iporomborɨ jae reta ndive.
56Juri ara omboarete reta mɨmba oyeyuka oyeapɨ jese vae iñemongarai jare ombaeyuka reta ombopota vaerä Tumpa jare omee vaerä yasoropai chupe.
57Omboaruanda reta mbaemboetea joguambɨ oro pe jare yeopiaka ipöra vae pe, yaike jupi vae oyapo kavi, o reta opa omojöke.
58Opaete tëta oyerovia, echa oyeyora reta ma itumpa ambuae vae reta ipo güi.
59Judas jëtara reta jare opaete Israel ndive oyemongeta reta omboete vaerä año ñavo vɨakatu jare yerovia reve mbota renda ipɨau juri ara rupi, mokoipa pandepo ara güive Quisleu yasɨ ñavo.
60Jókuae ara rupi omopüa reta ɨvɨtɨ Sión iyɨ́vɨri oguambɨ guasu jare omomɨ̈rata kavi reta, agüɨye yé vaerä ma itumpa ambuae vae reta oya jokoropi oporomongɨa, tenonde yave rami.
61Judas oñono jokoropi järoarä oepɨ vaerä ɨvɨtɨ Sión, jare omomɨ̈rata Bet-sur tëta guasu iyeopiaka kavi opɨta vaerä Idumea kotɨ.
Who We AreWhat We EelieveWhat We Do
2025 by iamachristian.org,Inc All rights reserved.
