JUDIT 1 - Guarani Bible with DC

Nabucodonosor Arfaxad ndive oñoraro vae

1Nabucodonosor doce año ma oiko mburuvicha guasurä Asiriaɨgua reta pe Nínive pe yave, Arfaxad oiko mburuvicha guasu ra Ecbatana pe.

2Jae oyapouka Ecbatana oñekëse vaerä ita pe. Metei ita ñavo güɨnoi metei jare treinta y cinco centímetro ipɨgüe jare pukugüe güɨnoi mókoi metro sesenta centímetro; jare ovapetea güɨnoi treinta y un metro y medio yé ɨvategüe, jare yandambusugüe güɨnoi veintidó metro y medio.

3Tëta guasu jöke ñavo omopüa oɨvate reta cuarenta y cinco metro ɨvategüe vae, ipɨgüe güɨnoi veintisiete metro vae.

4Öke reta ipɨgüe oyapo treinta y un metro y medio ɨvategüe jare dieciocho metro ipɨgüe, jae ko isundaro jëia yae vae reta ipuere vaerä oñesɨro oasa jokoropi.

5Jókuae ara rupi, mburuvicha guasu Nabucodonosor oñoraro mburuvicha guasu Arfaxad ndive ñuu guasu oï Ragues pe vae pe.

6Nabucodonosor ndive oñomoïru opaete ɨvɨtɨ rupi oiko vae reta, jare opaete ɨ̈aka reta Tigris, Éufrates jare Hidaspes jembeɨ rupi yogüɨreko vae reta jare mburuvicha guasu Arioc jee vae, Elam pegua iɨvɨ pegua reta vi. Jare jökorai, jeta tëta reta oñomoïru omborɨ vaerä Queleúd iñemuña reta.

7Jaema ruvicha guasu Asiria pegua Nabucodonosor omondo oenɨiuka opaete Persiaɨgua reta jare opaete kuaraɨ oikea kotɨ yogüɨreko vae reta: jaeramiño vi Cilicia pegua reta, Damasco pegua reta, Líbano pegua reta, Antilíbano pegua reta, jare opaete jembeɨ rupi yogüɨreko vae reta,

8Carmelo pegua reta, Galaad pegua reta, jare Galilea tuicha vae pegua reta, Esdrelón ñuu guasu pegua reta,

9opaete Samaria pegua reta, jare kuaraɨ oikea kotɨ tëta reta opɨta Jordán güi, ojo Jerusalén pe iyapɨ vae, jare Batané pegua reta vi, Quelús, Cadés, ɨupa ojo oya Egipto kotɨ vae, jare Tafnes pegua, Ramsés, jare opaete tëta reta oï Gosén pe vae

10Tanis kutɨ rupi jare Menfis güi kutɨ rupi, jare opaete Egipto pe oiko vae reta jare Etiopíaɨgua reta.

11Ërei opaete jokoropi yogüɨreko vae reta mbaetɨ oyapo mburuvicha guasu Nabucodonosor Asiria pegua jei vae mbaetɨ yogüɨraja omborɨ oñoraro, echa mbaetɨ okɨɨye reta chugüi, echa omae reta jese jae ko iñeïrumbae vae; oikura reta iñee jerajaa jare ombou reta ye köraiño etei.

12Jaema Nabucodonosor täta iyarasɨ jókuae tëta reta kotɨ, jare omee iñee Tumpa rovake jae iguapɨa güi oyepɨ vaerä opaete jókuae tëta reta oï Cilicia pe vae re, Damasco jare Siria, omboasa vaerä ikɨse jupi reta, jaeramiño vi moabita reta jare amonita reta, jare opaete Judeaɨgua reta jare opaete Egipto pegua reta opaetei ɨ jembeɨ rupi yogüɨreko vae reta.

Arfaxad iñamɨri vae

13Diecisiete año ma Nabucodonosor oiko mburuvicha guasurä yave, opüa opoko mburuvicha guasu Arfaxad re, oñoraro jae ndive jare omoamɨri. Opa ombosɨi isundaro reta, opaete kavayu regua reta ikäretou reta reve reve,

14oyemombae jëta reta re, ojo oväe Ecbatana pe jare opa oyemombae oɨvate reta re, opa opɨ̈ro joka reta jare jökorai tëta imbaeyekou opa oñono ñemomarai pe.

15Omondo Arfaxad oipɨɨ Ragues ɨvɨtɨ re jare oikutu imii pe, jökorai omokañɨtei.

16Jupivei oyerova yee isundaro reta ndive jare jae ndive oñemoïru vae reta ndive, jae ko sundaro jeta vae, jare jaema opaete isundaro reta ndive opoko oputuu reta jare oyemboapirai yogüɨreko irundɨ yasɨ rupi.