ISAÍAS 24 - Guarani Bible with DC

YandeYa iporojäa opaete ɨvɨ re

1Mase, yandeYa opata oikuavo kuae ɨvɨ,

opaeteita omboai jare güɨrokomegua,

jare opata omoai moai pɨpegua reta.

2Jökoraita oasa opaete tëta pegua reta:

Sacerdote reta, ani sacerdotembae reta ndive,

tembiokuai kuimbae ani iya,

tembiokuai kuña ani iya kuña,

ombaegua vae ani omaemee vae,

ombaeporuka vae ani ombaeporu vae,

ipía vae ani oporombopiauka vae.

3Ɨvɨ opaeteita oyemboai opɨta,

opaeteita oñerenoe mbae chugüi.

Echa jökorai ko omoërakua yandeYa.

4Opa oyemboai ɨvɨ, opa okañɨtei,

opaetei ɨvɨ oikomegua,

opaetei tëtaguasu reta ɨvɨ pegua imbaerasɨ ñogüɨnoi.

5Ɨvɨ opa oikomegua pɨpe yogüɨreko vae reta jeko pegua,

echa mbaetɨ oyapo reta Tumpa iporookuai,

mbaetɨ oendu reta mborookuai reta jei vae,

oyavɨ reta morogüɨrökuavee päve opambae vae kotɨ.

6Jáeramo, yepopeyu opa omokañɨtei ɨvɨ,

jaenunga vi pɨpegua reta.

Jáeramo, ɨvɨ pegua reta mbovɨ yae opɨta.

7Vino mbaetɨ ma jeta, opa imbaerasɨ temitɨ uva reta,

oyerovia katu yepi vae reta, opa ipɨatɨtɨ.

8Osondo yerovia katu angúa raɨ reta jare arpa reta pegua,

osondo oyombokepegua iyapirai vae reta.

9Mbaetɨta ma okau reta tairari ndive;

vino irota iua reta pe.

10Tëta guasu opa oñererokomegua ikavimbae pe,

mbaetɨ ma yandepuere yaike metei o japɨpe ave.

11Kuimbae reta oyaeo kaye rupi vino mbaetɨ ramo;

opa okañɨ yerovia katu tëta güi,

oñerenoe oyemombo yerovia katu kuae ɨvɨ güi.

12Opa oyemboai opɨta kuae tëta guasu,

opa oñemopë öke reta.

13Jökoraita opaete tëta guasu reta kuae ɨvɨ pe,

ɨvɨra olivo ia oñemokana oyeitɨ rami,

uva opa ma oyepoogüe re kia oyevɨka rami.

14Omomaragüe reta osapukaita oyerovia reve,

kuaraɨ oikea kotɨ güi otairari retata,

oecha reta yave yandeYa imbaepuere, tuicha yae ko vae.

15Opaete kuaekuae re pemboete yandeYa, kuaraɨ oëa kotɨgua reta,

ɨguasu päu rupigua reta pemboete yandeYa, Tumpa Israel pegua.

16Ɨvɨ iyapɨ kotɨ güi roendu otairari reta yandeYa pe körai:

“¡Toyemboeteuka Jupi yae vae!”

Ërei che jae: “¡Atataɨ, maera pa ko jökorai mbatee!”

¡Jupimbae reta oyapo ikavimbae yae vae!

17Ɨvɨ pegua reta, jevae ñana rupigua oñemoña vae ramita,

oimeta ñuai ani ɨvɨkua japerä pe.

18Ojoyepe tëigüe,

oata ɨvɨkua pe,

jare ɨvɨkua güi oë tëi vae oata ñuai pe.

Ama tuicha yaeta oa ara güi,

okanata ɨvɨ iguapɨka reta.

19Ɨvɨ okanata täta yae, opaeteita oyemboai,

okanata jare opaeteita jaɨ jaɨ.

20Okanata ɨvɨ, mbae oñemokana rami,

okanata metei tapɨi iyagüɨ oïeiño vae okana rami.

Iyoa jeta yae ma jese,

güɨrogüɨapita jare ngaraa ye ma opüa.

21Jókuae ara yandeYa oiporaraukata ara ipo reta pe ara pe,

jare ɨvɨ pe mburuvicha guasu reta;

22opata omboatɨ oyokenda metei tembipɨɨrɨru pe,

jare joko pe oyeokendata opɨta,

jare oinupata ɨma ara ma oasa yave.

23Jare yandeYa Imbaepuere yae ete vae oguapɨ mburuvicha guasurä ɨvɨtɨ Sión re, Jerusalén pe yave,

yasɨ jare kuaraɨ ngaraa ma oesape,

jare tëta imbae pegua tenondegua reta oecha iyemboetea.