RUT 3 - Guarani Bible with DC

Rut jare Booz mbaembopiriría renda pe

1Jókuae güire Noemí jei Rut pe:

—Chemembɨ, che taeka nemerä, reiko kavi vaerä.

2Booz jae ko orerëtara, jembiokuai kuña reta ndive nde reiko vae, kuae pɨ̈tu ojota kó pe ombaemboveve, omboyao vaerä cebada ipiregüe güi.

3Jayave eyau, eñemokäti kavi, jare emonde nderemimonde ikavi vae, jare ekua jokotɨ mbaembopiriría renda pe; ërei agüɨye eyeechauka chupe, jae opa regua okaru jare oɨu.

4Jare emae kavi jese ketɨ ra oyapakuata oke vae, javoi ekua eipea itɨma, jare eyapakua joko pe; jare jae jeita ndeve mbae ko reyapota vae.

5Jare Rut jei chupe:

—Tayapo opaete nde cheokuai vae.

6Jayave ojo kó kotɨ jare oyapo opaete imesɨgüe oyókuai rami.

7Jare Booz opa ma okaru jare oɨu yave, oyerovia katu reve ojo oyapakua oke mbaeatɨ iyɨpɨ pe. Jayave Rut kïrii ngatu ou oipea chugüi itɨma jare oyapakua joko pe.

8Jare pɨare mbɨte ma yave, jókuae kuimbae güɨramoiño osareko jare oyere yave oñeiämondo, echa metei kuña oyapakua oï itɨma rupi.

9Jayave Booz oparandu chupe:

—¿Kia pa nde?

Jare Rut jei chupe:

—Che ko Rut nderembiokuai, nde ko cheme amɨri jëtaragüe, emenda che ndive.

10Jayave Booz jei:

—¡YandeYa tiporerekua nderé! Ikavi vae ko reyapo tenonde reyapo vae güi. Ndepuere tëi reeka kuimbae taɨrusu vae, oikokatu vae ani ramo paravete vae.

11Ërei, añave agüɨye ekɨɨye; tayapo nde ndive nde rere vae, echa opaete cherëtaɨgua reta oikuaa nde ko jae metei kuña jeko kavi yae vae.

12Mase, añete che ko jae jókuae kuimbae jëtara,Rt 2.20. ërei oime ko ïru ma köiño chugüi vae.

13Añave neköe kuae pe, pɨareve yaikuaata jae oipotata ra ndemboepɨ vae, oipota yave tandemboepɨ; ërei mbaetɨ yave oipota ndemboepɨ, che romboepɨta. YandeYa jee re kuae jae ndeve, añave eputuu köe regua.

14Jare oke güire itɨma rupi köe regua, Booz opüa ndei köe kavi mbove; echa jei: “Agüɨye toikuaa metei ave, kuae kuña ou ko kuae kó pe vae.”

15Javoi jei chupe:

—Eru reñeapeva pɨpe vae, jare eipɨɨ. Jare jae oipɨɨ ramboeve, Booz oñono pɨpe cebada cuarenta kilo oasa, javoi ombovoɨ; jare ojo tëta guasu kotɨ.

16Jare ou ye ma oväe yave, imesɨgüe oparandu chupe:

—¿Kërai pa reguata chemembɨ?

Jare omombeu chupe opaete jókuae kuimbae ndive imiari vae.

17Jare jei:

—Kuae cebada omee cheve, jei cheve reve: “Agüɨye vaerä ndepogüɨrai reyerova ye nemesɨgüe kotɨ.”

18Jayave Noemí jei:

—Chemembɨ, eäro añave, yaikuaa regua këraita ra oyeapo kuae teko vae; echa jókuae kuimbae ngaraa ikuérai opa oyapo kavi regua kuae teko.