2 SAMUEL 17 - Guarani Bible with DC

Ahitofel jare Husai oporomboarakuaa

1Kuae jaɨkue rupi Ahitofel jei Absalón pe:

—Añave emaeño taiparavo doce mil kuimbae, jare kuae pɨ̈tu voi taë taɨkuemoña David.

2Jare jae ikangɨ oï yave iparanoe taë chupe, tamongɨɨye jare totekuarai opaete jupiegua reta. Jayave tayuka mburuvicha guasu jaeño pe.

3Jökorai opa ye taru ndekotɨ opaete vae reta, echa nde reeka metei kuimbae jekoveño. Jare opaete vae ipɨakatuta opɨta.

4Kuae yemongeta ikavi yae Absalón pe jare Israel iñemuña itenondegua reta pe.

5Ërei Absalón oyókuai oenɨi reta vaerä vi arquita Husai mbae ra jae jeita vae.

6Jare Husai ou ma yave, Absalón jei chupe:

—Körai Ahitofel oyemongeta. ¿Yayapota pa ani mbaetɨ pa? ¿Nde pa mbae rere?

7Jayave Husai jei Absalón pe:

—Kuae yemboarakuaa Ahitofel omee añave vae mbaetɨ ikavi.

8Nde reikuaa ko kërai nderu jare isundaro reta jëia yae ko, iyarasɨ yae ko añave aipo ñogüɨnoi reta, mbaemɨmba kaa rupigua imembɨ oñepɨ̈ro chugüigüe rami. Jare nderu ko, kuimbae ñeraro regua, ngaraa oke jupiegua reta ndive.

9Añave voi oime ko aipo oñemi oï kia nunga ɨvɨkua pe, ani oipota rupi. Jare ïru mbae jae ko, ndesundaro reta güi omano yave mbovɨ, oendu vae reta jeita: “Absalón jupiegua reta opa ñamɨri.”

10Jökorai yave kuimbae jëia yae yagua rami vae ave ko ipɨtu yaeta; echa opaete Israel pegua reta oikuaa ko nderu jare jupiegua reta, jëia yae vae reta ko.

11Jayave, che romboarakuaata vae jae ko oñemoïru vaerä nde ndive opaete Israel iñemuña reta, Dan güive Beerseba kotɨgua reta vi, jare nde etei ekua ñeraro pe, jókuae jeta ɨvɨkuitï ɨ jembeɨ pe rami ñogüɨnoi vae reta jenonde.

12Jayave ñaporepeña nderu re, jae kia pe oïa rupi, yaata iárambo ɨsápɨi oa ɨvɨ re rami, mbaetɨta yaeya jekove ndive, jae yepe ani isundaro reta yepe metei ave.

13Jare oñepɨ̈ro tëi metei tëta guasu pe yave, opaete Israel iñemuña reta yarajata tɨmasa, pɨpe yambotɨrɨrɨ vaerä jókuae tëta, yaraja regua yaitɨ ɨ̈aka raɨ pe, mbaetɨta yaeya metei ita ave.

14Jayave Absalón jare opaete Israel iñemuña reta pe ikavi yae jókuae Husai jei vae, Ahitofel tenonde jei tëi vae güi. Echa yandeYa oyemongeta güɨrokomegua vaerä Ahitofel iporomboarakuaa, jupi rupi jei tëi vae, yandeYa güeru vaerä mbaesusere Absalón re.

15Javoi Husai omombeu sacerdote Sadoc jare Abiatar pe, Ahitofel omboarakuaa Absalón jare Israel iñemuña itenondegua reta vae, jare vi jae jei chupe reta vae,

16jökorai ipuere vaerä jarembae pegua omombeu reta David pe, oasa voi vaerä ɨ̈aka Jordán jovaicho kotɨ, agüɨye vaerä opɨta jókuae pɨ̈tu ñuu rupi tape oasaa rupi, agüɨye vaerä oyuka reta, jae ani jupiegua reta yepe.

17Jonatán jare Ahimaas ñogüɨnoi ɨesaɨ Rogel jee vae pe, metei kuñatai tembiokuai ojo omombeu chupe reta, echa jae reta mbaetɨ oipota oyeechauka yogüeru ramboeve tëta guasu pe; jayave jae reta yogüɨraja omombeu mburuvicha guasu David pe.

18Ërei metei kunumi oecha reta, jae ojo omombeu Absalón pe; ërei jae reta yangeko oguata jare yogüɨraja oväe metei kuimbae jo pe, Bahurim pe; jókuae kuimbae güɨnoi metei ɨvɨkua joka pe, pɨpe ogüeyɨ reta.

19Jare jókuae kuimbae jembireko oipɨɨ metei asoya jare oipɨso jókuae ɨvɨkua re, jare omoai iárambo trigo oyembopiririgüe; kuae regua mbaetɨ kia ave oikuaa.

20Jare Absalón jupiegua reta opa yogüɨraja oväe jókuae kuña jo pe yave oparandu reta chupe:

—¿Jama pa Jonatán jare Ahimaas?

Jókuae kuña jei chupe reta:

—Kuae rupi opa oasa reta ɨ̈aka kotɨ.

Jayave Absalón jupiegua reta opa yogüɨraja oeka, ërei oyerova reta ye Jerusalén kotɨ mbaetɨ oväe reta jeko pegua.

21Jare opa ma yogüɨraja ye jekaa reta yave ñogüɨnoe ɨvɨkua güi Jonatán jare Ahimaas, jare yogüɨraja omombeu reta David pe, oasa vaerä ɨ̈aka jarembae pegua, omombeu chupe Ahitofel mbae ko jei ikotɨ reta vae.

22Jayave David jare opaete jupiegua reta opa oasa ɨ̈aka Jordán ndei köe mbove; mbaetɨ metei ave oasambae.

23Ërei Ahitofel oecha mbaetɨ jae iporomboarakuaa oyeapo yave, oyokua imburika jare ojo jëta guasu kotɨ, jare opa oñono kavi jo pe opaete mbaembae teko reta yave oyeyuvɨ, jökorai omano, jare oñotɨ reta iñemuñagüe reta jɨvɨa oïa pe.

David ojo oväe Mahanaim pe

24David ojo oväe tëta Mahanaim pe yave, Absalón oasa vi ɨ̈aka Jordán opaete jupiegua Israel iñemuña reta ndive.

25Absalón yepe oñono Amasa sundaro reta juvicharä Joab jekovia pe. Amasa ko jae Itra jee vae taɨ, jae ko metei kuimbae Israel pegua, jae omomembɨ Abigail, Nahas tayɨ; Abigail ko jae Sarvia ipɨkɨɨ, Joab ichɨ.

26Javoi Absalón jare Israel iñemuña reta oyembojeyupa ɨvɨ Galaad pe,

27jare David ojo oväe tëta Mahanaim pe yave, oë oövaiti Sobi, Nahas taɨ, tëta Rabá, Amón iñemuña reta jëta pegua; Maquir, Amiel taɨ, tëta Lodebar pegua; jare Barzilai tëta Rogelim ɨvɨ Galaad pegua.

28Güeru reta David pe jare jupiegua reta pe jeta tupa, tasa, ɨvɨ yapepo, trigo, cebada, mbae ikuigüe, mbae jäɨ oyeimbegüe, haba, lenteja, garbanzo oyeimbegüe,

29ei, mbaekɨra, vecha, kesu, jou reta vaerä; echa oyemongeta reta yɨmbɨaɨ yae ko, jare iɨuve jare ikangɨ ko yogüeru reta ñuu kotɨ güi.