PROVERBIOS 14 - Guarani Bible with DC

1Kuña yarakuaa vae, omopüa kavi jorä;

ërei kuña yarakuaambae, jae etei opa omboai.

2Jupi rupi oiko vae, oipoɨu yandeYa güi;

ërei jeko kavimbae, güɨröɨro.

3Yarakuaambae, oyembotuicha iñee rupi;

ërei yarakuaa vae, oyeandu reve iñee omoë.

4Mbaetɨ güeye yave, avatío mbaetɨ ipo;

ërei güeye pe oyeparavɨkɨ yave, oime jeta mbaagüɨye.

5Mbae oecha kavi etei vae, iyapuä imiari;

ërei mbaetɨ oecha vae, iyapu imiari.

6Oporoyóyai yóyai vae, oeka arakuaa katu,

ërei mbaetɨ ipuere oväe;

ërei yarakuaa katu vae pe, mbaetɨ etei yavai.

7Eyembosɨrɨ kuimbae yarakuaambae güi,

echa ngaraa reendu chugüi arakuaa.

8Kuimbae yarakuaa vae, iyarakuaa rupi oikuaa jeko,

ërei ipokimbae reta, oyembotavɨ iyarakuaambae rupi aeño.

9Yarakuaambae reta, iyoa yave opuka pukaño;

ërei jupi vae reta, ipɨakatu oyoe.

10Yande aeño yaikuaa yandeyegua,

yandepɨatɨtɨ yave ani yayerovia yave.

11Iyoa vae reta jo opata okañɨtei;

ërei jupi vae reta jo oiko kavi aveita.

12Kuimbae pe, oime tape ikaviecha vae;

ërei tape kañɨtei kotɨ ojo vae ko.

13Opuka tëi yave ave jasɨ ipɨa pe,

jare iyerovia katu, iyapɨ mbɨatɨtɨ pe.

14Yarakuaambae, ikueraita jeko reta güi;

ërei kuimbae jeko kavi vae, oyeroviata jeko reta re.

15Yarakuaambae, güɨrovia opaete mbaembae;

ërei oyeandu reve kavi oiko vae, omae kavi kërai oiko vaerä.

16Yarakuaa katu vae, oipoɨu ikavimbae güi jare oyembosɨrɨ chugüi,

ërei yarakuaambae, mbaetɨ etei mbae güi oipoɨu.

17Iyarasɨ katu vae, oyapo rai voi mbae;

kuimbae ipɨapochɨ vae, oñemotareɨukata ko.

18Iyarakuaambae reta, yogüɨrekota yarakuaambae;

ërei yarakuaa vae reta, yogüɨrekota arakuaa katu rupi.

19Jeko kavimbae reta, oyetavatɨkata jeko kavi vae reta jóvai;

iyoa vae reta, yogüɨrajata jupi vae reta jöke pe.

20Paravete vae, ivɨa-ïru ave ko omotareɨ;

ërei oikokatu vae, jaɨúa yae ko.

21Japicha güɨröɨro vae, iyoa ko;

ërei paravete vae reta oiparareko vae, oyerovia ko.

22Ikavimbae reño oyemongeta reta vae, oyavɨ ko;

ërei ikavi vae reño oyemongeta reta vae,

yogüɨrekota mboroparareko rupi jare mboromboete rupi.

23Opaete mbaravɨkɨ reta güi, oime ko mbae oyekuaa;

ërei ñeegüeño vae, güeru mbaravete.

24Yarakuaa vae reta iyemboetea, jae ko imbaeyekou;

ërei yarakuaambae reta pe, arakuaambae.

25Mbae oecha kavi vae, oepɨ ïru vae ñeapo pe;

ërei oechambae, iyapu imiari.

26YandeYa güi oipoɨu vae, mɨ̈rata ko,

jae ko taɨ reta iñepɨ̈roa.

27YandeYa güi yaipoɨu vae, tekove katu ko,

mano güi yandereepɨ vae ko.

28Mburuvicha guasu jeta vae re oporookuai vae, iyemboetea yae ko;

ërei mbaetɨ jeta vae re oporookuai vae, ipɨtu ko.

29Mbaetɨ iyarasɨ raivi vae, yarakuaa yae ko;

ërei iyarasɨ rai voi vae, mbaetɨ ko yarakuaa.

30Ipɨakatu avei vae, tekove katu ko jete peguarä,

ërei oporomotareɨ vae, yaratita rami ko ikägüe reta pe.

31Paravete vae güɨrekoasɨ katu vae, ikavimbae ko oyapo Iyapoa kotɨ;

ërei omboete ko, paravete vae re güɨ noi mboroparareko vae.

32Iyoa vae, oyemboai jeko kavimbae pe aeño;

ërei kuimbae jupi vae, oyeepɨ jeko kavi rupi.

33Oyeandu reve oiko vae, ipɨa pe oï arakuaa,

ërei yarakuaambae reta, mbaetɨ oikuaa arakuaa.

34Mbae jupi vae, ombotuicha tëtaguasu;

ërei mbaeyoa, ñemomarai ko tëtaguasu reta peguarä.

35Mburuvicha guasu ipɨa kavi, oyeokuai kavi chupe vae pe,

ërei iyarasɨ, jeko kavimbae kotɨ.