EZEQUIEL 46 - Guarani Bible with DC

Mburuvicha reta jare tëta pegua reta mbae oyapota arete pe vae regua

1Che peYa Tumpa jae körai: Tupao joka michi vae jöke kuaraɨ oëa kotɨ omae vae oyeokendata oï ova ara rupi mbaravɨkɨ iara pe, ërei ara mbutuu pegua pe oyepeata, oyepeata vi yasɨ pɨau iarete pe.

2Mburuvicha oiketa tupao joka tuicha vae jöke rupi, oyemboɨta oï öke pe sacerdote reta omee ramboeve mɨmba oyeyukagüe opaetei oyeapɨ vae jare mbota yembopɨakatu pegua. Jae ombaemboeteta öke pe; jaɨkue rupi oëta. Ërei öke mbaetɨta oyeokenda kaaru regua.

3Jaeramiño vi opaete vae reta omboeteta yandeYa, öke jóvai, ara mbutuu pegua pe jare yasɨ pɨau iarete pe.

4Mburuvicha omeeta mɨmba oyeyukagüe opaetei oyeapɨ vae yandeYa pe, ara mbutuu pegua pe vae reta jae ko: Ova vecha kuimbae taɨrusu jete kavi vae jare metei vecha kuimbae jete kavi vae.

5Metei vecha kuimbae ñavo ndive oñemeeta metei efa mbota temitɨ jäɨgüe; jare vecha kuimbae taɨrusu vae ñavo ndive oñemeeta ipueregüe rupi; jare efa ndive metei hin olivo iasaite.

6Ërei yasɨ pɨau pe, metei toro taɨrusu jete kavi vae guaka reta ipɨte güi, ova vecha kuimbae taɨrusu vae jare metei vecha kuimbae; kuae reta jete kavi vae päve.

7Metei toro taɨrusu vae ñavo ndive jare vecha kuimbae ñavo ndive oñemeeta metei efa temitɨ jäɨgüe, ërei vecha kuimbae taɨrusu vae ñavo ndive oñemeeta ipueregüe rupi. Jare metei efa temitɨ jäɨgüe ndive oñemeeta metei hin olivo iasaite.

8Mburuvicha oike yave, oiketa tupao joka tuicha vae jöke rupi jare jokoropi yeño oëta.

9Ërei ngatu jókuae opaete vae reta oike yave yandeYa jóvai aretea pe; öke ɨvɨtuguasu kotɨgua rupi oike vae oëta öke arayevɨ kotɨgua rupi; jare öke arayevɨ kotɨgua rupi oike vae oëta öke ɨvɨtuguasu kotɨgua rupi. Mbaetɨta oë ye jókuae oikea rupi yeño, oëta ojo jovaicho kotɨgua öke rupi.

10Mburuvicha oiketa jókuae opaete vae oike yave, jare oë yeta jae reta ñogüɨnoe yave.

11Arete reta rupi jare yemboatɨ guasu reta mbaemboete pegua rupi oñemeeta metei efa temitɨ jäɨgüe toro taɨrusu vae ñavo ndive, jökorai vi vecha kuimbae ñavo ndive; jare vecha kuimbae taɨrusu vae ndive oñemeeta ipueregüe rupi, jare metei efa temitɨ jäɨgüe ndive metei hin olivo iasaite.

12Ërei mburuvicha omee yave mɨmba oyeyukagüe opaetei oyeapɨ vae ani ramo omee yave mbota yembopɨakatu pegua, oyepeata chupe öke kuaraɨ oëa kotɨ omae vae, javoi omeeta mɨmba oyeyukagüe opaetei oyeapɨ vae jare mbota yembopɨakatu pegua, ara mbutuu pegua pe oyeapo rami; javoi oë yeta; oë güire oyeokenda yeta öke.

Mbota ara ñavo oñemee vae

13Ara ñavo ndeimbove yave, oñemeeta mɨmba oyeyukagüe opaetei oyeapɨ vae, metei vecha kuimbae taɨrusu vae año vae, jete kavi vae.

14Jókuae ndive oñemeeta vi ndeimbove ñavo yandeYa pe mbota, chiu kilo rupi temitɨ jäɨgüe jare metei litro rupi olivo iasaite oyemboyeata trigokúi ndive vae. Kuae mbota toñemee avei cheve; jae ko mborookuai jekuae avei pegua.

15Jayave vecha kuimbae taɨrusu vae oyeyuka oñemee vae jare mbota temitɨ jäɨgüe jare olivo iasaite, toñemee avei ndeimbove ñavo, mɨmba oyeyukagüe opaetei oyeapɨ vaerä.Mburuvicha mbae oyapo vaerä iɨvɨ ndive

16Che peYa Tumpa jae körai: Mburuvicha omboyao yave iɨvɨ taɨ reta pe, toiko jae reta imbaerä; topɨta ete jae reta imbaerä jókuae ɨvɨ.

17Ërei omboyao iɨvɨ jembiokuai pe yave, opɨtata jae imbaerä año yeyora pegua oväe regua,Lv 25.10. javoi opɨta yeta mburuvicha imbaerä; jókuae opɨtata taɨ reta imbaerä.

18Mburuvicha agüɨye topɨ̈ro kia nunga vae iɨvɨ. Taɨ reta iɨvɨrä omeeta yave, tomboyao chupe reta iɨvɨ ae güi; jökorai agüɨyeta metei güi ave oñepɨ̈ro iɨvɨ.”

Tupao pegua mbae iyemboyɨa

19Jaɨkue rupi jókuae kuimbae chereraja öke iyɨke rupi yaikea rupi, cuarto oñeñono tee sacerdote reta peguarä vae pe; kuae cuarto reta omae ɨvɨtuguasu kotɨ jare aecha joko pe jugua pe metei mbaemboyɨ renda, kuaraɨ oikea kotɨ;

20jare jei cheve: “Kuae pe ko jae sacerdote reta omboyɨta mbota mbaeyoa regua jare mɨmba oyeyukagüe Tumpa iñɨ̈ro vaerä mbaeyoa re vae; joko pe omboyɨ retata mbota, agüɨye vaerä güɨnoe reta tupao joka tuicha vae pe. Jökorai opaete vae re agüɨye vaerä ova ñeñono tee.”

21Javoi cherenoe tupao joka tuicha vae kotɨ jare chereraja oka iekina ñavo rupi, irundɨ ekina rupi. Jare ekina ñavo aecha oime oka.

22Tupao joka tuicha vae iekina ñavo rupi oka oï vae, oñekëse kavi; metei oka ñavo güɨnoi veinte metro pukugüe jare quince metro ipɨgüe;

23kuae reta oñekëse ñogüɨnoi jare ikësea igüɨ rupi oyere güɨnoi tataupa.

24Jayave jei cheve: “Kuae ko jae mbaemboyɨa, tupao pegua ombaemboyɨ vae reta omboyɨ vaerä opaete vae mbota reta oñemeegüe.”