JUECES 19 - Guarani Bible with DC

Levita jare jembireko

1Jókuae ara rupi, ndei vɨteri oime mburuvicha guasu Israel pe yave, oiko metei levita ketɨgua mombɨrɨ Efraín pegua ɨvɨtɨ re, jae güɨreko jembirekorä metei kuña Belén, Judá pegua.

2Ërei jókuae kuña jeko kaviä chupe, jare ojo chugüi tu jëta pe, Belén Judá pegua pe, joko pe oiko irundɨ yasɨ,

3jókuae levita ojo oeka omomiari vaerä mboroaɨu ndive güeru ye vaerä jupíe. Güɨraja vi jupíe metei jembiokuai, jare mókoi mburika; jare jókuae kuña omoinge ime tu jo pe.

4Kuña tu oyerovia reve omboresive, jare oparea chupe opɨta vaerä ípɨri; levita jare jembiokuai opɨta reta mboapɨ ara kuña tu jo pe, okaru reta jare jou reta vino jare oke reta joko pe,

5jare irundɨa ara pe ndeimbove yave opüa reta oyupavo yogüeru vaerä. Ërei jaema yogüeruta yave, kuña tu jei jovaya pe:

—Ekaru räri kërai yepe, nepɨ̈rata vaerä, javoi ekua kuri.

6Jare mókoi reve oguapɨ okaru jare jou reta vino, jare kuña tu oiporu opɨta ye vaerä jókuae pɨ̈tu.

7Yepe tëi levita opüa ojo vaerä, ërei jovaya omoñera yae ramo opɨta ye jókuae pɨ̈tu.

8Pandepoa ara pe, levita opüa ndeimboveasɨ ojo vaerä, ërei jovaya jekuae omoñera ye okaru vaerä, jare kuaraɨ ñapɨa yave ojo vaerä. Jayave okaru päve reta kaaruasɨ regua.

9Javoi levita opüa ma ojo vaerä jembireko jare jembiokuai ndive yave, jovaya omombeu chupe kaaruasɨ yae ma ko vae, jare oparea ye chupe jókuae pɨ̈tu opɨta vaerä oyerovia reve, jare ndeimboveasɨ oë vaerä ojo.

10Ërei levita mbaetɨ ma oipota opɨta ye jókuae pɨ̈tu, oyupavo jare yogüeru jembireko jare jembiokuai ndive, jare mókoi imburika ndive. Jebús jóvai ma ñogüɨnoi yave, jae ko Jerusalén,

11tembiokuai jei levita pe:

—¿Mbae pa rere yapɨta vaerä kuae pɨ̈tu kuae jebuseo reta jëta pe?

12Ërei levita jei chupe:

—Ngaraa yaja tëta Israel iñemuñambae pɨri. Yaasaño chugüi Gabaa kotɨ,

13yaja yapɨta Gabaa pe ani Ramá pe.

14Oasa reta, jare kuaraɨ oike ma yave yogüɨraja oväe Gabaa pe, Benjamín iñemuña reta jëta pe.

15Jayave opia reta tape güi oike tëta Gabaa pe oputuu vaerä jókuae pɨ̈tu, jare yogüɨraja oguapɨ jókuae tëta guasu joka pe, echa mbaetɨ kia omee jo chupe reta oputuu vaerä.

16Jare ko metei ndechi ou oiko kaaruasɨ yave iparavɨkɨa güi, jae ko ketɨgua Efraín pegua ɨvɨtɨ kotɨ güi ou vae, jae oiko Gabaa pegua reta ipɨte pe, Gabaa pegua reta jae ko Benjamín iñemuña reta.

17Jókuae ndechi oecha yave oguata oiko vae tëta guasu joka pe, oparandu chupe:

—¿Ketɨ güi pa reyu, jare ketɨ pa reo?

18Jare levita jei chupe:

—Belén Judá pegua güi ko royu roasa koropi rojo vaerä mombɨrɨ Efraín pegua ɨvɨtɨ kotɨ che aikoa pe. Aja Belén Judá pegua pe, añave ayu aja cherëta kotɨ, ërei mbaetɨ roväe kia jo pe roputuu vaerä.

19Oime rogüɨnoi kapii jare atiɨgüe chemburika reta peguarä, jare tembíu jare vino cheveguarä, cherembireko peguarä jare cherembiokuai peguarä, mbaetɨ etei mbae oata oreve.

20Jare jókuae ndechi jei chupe:

—Chemboyerovia yae kuae reyu vae. Che tayemoambeko opaete reipota vae re. Ngaraa amaeño repɨta reke kuae oka pe.

21Jare ndechi güɨraja reta jo pe, jare omongaru mburika reta, jare jae reta oyoe ipɨ, okaru jare jou reta vino.

22Ërei ovɨakatu yae ma ñogüɨnoi yave, mbovɨ kuimbae jeko ikavimbae jókuae tëta pegua reta oimama o, jare omboɨpɨ okua reta öke re, jare jei reta jókuae ndechi o iya pe:

—¡Enoe kuimbae ndembouparä renoi vae! ¡Orekɨ̈reɨ mbae royapo chupe!

23Ërei o iya oë jei chupe reta:

—¡Agüɨye cherëtara reta! Pomoñera ¡Agüɨye peyapo ikavimbae yae vae kuae kuimbae pe, chemboupa pe!

24Mase, joko oï cherayɨ mbaetɨ etei oasa kuimbae ndive vae. Jare ko vi oï kuae kuimbae jembireko. Tanoe peve peremimbota peyapo vaerä chupe. Ërei kuae kuimbae pe agüɨye peyapo ikavimbae yae vae.

25Ërei jókuae kuimbae reta mbaetɨ oyeapɨsaka ndechi re. Jayave jókuae levita oipɨɨ jembireko jare güɨnoe chupe reta ikatu pe. Jare oyapo reta ipɨa jemimbota chupe opaete jókuae pɨ̈tu köe regua, jare oeya reta köeta yave.

26Köe ma ou yave kuña ou ndechi jo jöke pe, ime oïa pe, jare omano oa, joko pe iköe.

27Jare ndeimbove ime opüa oipea öke oë ojo vaerä yave, oecha jembireko oï öke pe, ipo reta güɨnoi reve öke pe etei.

28Jayave jei chupe:

—Epüa jare yaja mo.

Ërei jae mbaetɨ iñee omoë. Jayave jae oupi jare oñono jëogüegüe imburika re, jare ojo jëta kotɨ.

29Ojo oväe jëta pe yave oipɨɨ metei kɨse jare opa omboyao yao jembireko jëogüegüe iyoapɨa pɨa rupi, oyapo doce yemboyao, jare omondo opaete Israel iñemuña reta iɨvɨ rupi.

30Opaete jókuae oecha vae, jei reta:

—Israel iñemuña reta oë ɨvɨ Egipto güi güive, mbaetɨi oyeapo ani oyeecha kuae nunga. Yayemongeta kuae re, jare yaiparavo mbae ra yayapota vae.