1Che Pablo, pomoñera Cristo iñemomichi jare iporoaɨu rupi. Che aï pépɨri yave añemomichi, ërei mbaetɨ aï pépɨri yave chemiari peve aipoɨumbae reve.
2Ërei che pomoñera, agüɨye vaerä cheñeengeta aipoɨumbae reve aja yave pépɨri. Echa añeñono cheñeengeta vaerä amogüe pepɨte pe ñogüɨnoi vae pe, jókuae oyemongeta ore roiko oreremimbota ae rupiño vae reta pe.
3Añete ko ore yepe tëi kuae ɨvɨ peño, ërei mbaetɨ roiko kuae ɨvɨ pegua reta rami.
4Echa orerembiporu reta ñeraro pegua kuae ɨvɨ peguaä ko, Tumpa imbaepuere etei ko, orepuere vaerä romoamɨri jëguambae vae.
5Jökorai romboai yemongeta reta jare opaete pɨayembotuicha omboavai yaikuaa vaerä Tumpa vae. Jökorai opaete pɨayemongeta rogüɨrajata Cristo jei vae oyapo vaerä.
6Jare roïndaivi roiporarauka vaerä iñeereendumbae pe, ñee oendu katu regua.
7Pe reta pemae mbae oyekuaa vae reño. Kia oyemongeta jae ko Cristo imbae vae yave, toyemongeta vi ore jae ko Cristo imbae, jae reta rami.
8YandeYa omee oreve mbaepuere pombokuakuaa vaerä, mbaetɨ ko pomokañɨtei vaerä. Kuae mbaepuere rogüɨnoi vae jekuaeñotai ko amboete. Ngaraa chemara jese.
9Jáeramo agüɨye peyemongeta che aipota ko pomongɨɨye cherembikuatía reta rupi.
10Echa amogüe vae jei, cherembikuatía ipoɨ yae jare yavai oyeapo vaerä, jare che etei aï ípɨri yave mbaeä etei jare cheñee mbegüe.
11Ërei jökorai jei vae toikuaa kuae: Roikuatía vae rupi ñee romondo rami, jökoraita vi royapo roï etei ma pépɨri yave.
12Echa ore mbaetɨ roipota roñeenɨi ani royemboyovake jókuae oyemboete jae reta aeño vae reta ndive. Ërei jae reta oñojäa yemongeta oñono iyeupe vae rupi aeño. ¡Mbaetɨ ko iyarakuaa reta!
13Ërei ore ngaraa oasa ete royemboete, jaeño Tumpa omee oreve royapo vaerä vae rupi. Jae ko omee oreve rojo vaerä pépɨri.
14Oasa ete ko roeta peve, mbaetɨ reve rojo pépɨri, ërei ore räri ko rogüɨraja peve ñee ikavi vae Cristo regua.
15Mbaetɨ ko royembotuicha mbaravɨkɨ ambuae re. Ërei roipota okuakuaa vaerä peporogüɨrovia, royapo vaerä jeta mbaravɨkɨ pepɨte rupi, Tumpa oipota royapo vaerä vae rupi,
16orepuere vi romoërakua ñee ikavi vae perëta kutɨ rupi ñogüɨnoi vae reta pe. Echa mbaetɨ etei roipota roike ïru vae oyapo ma vae pe, agüɨye vaerä royemboete ïru vae oyapogüe re.
17Ërei kia ikɨ̈reɨ oyemboete vae, toyemboete yandeYa re.Jer 9.24.
18Echa mbaetɨ ko tuicha, jae aeño oyembotuicha vae. Jaeño ko tuicha, yandeYa ombotuicha vae.
Who We AreWhat We EelieveWhat We Do
2025 by iamachristian.org,Inc All rights reserved.
