SABIDURÍA 7 - Guarani Bible with DC

1Che jae vi ko metei kuimbae omanota kuri vae,

jare ayu, opaete vae rami,

tenonde kuimbae oiko vae ɨvɨ güi oyeapo vae güi.

Chesɨ jɨe pe oyemboɨpɨ oyeapo chesoo;

2payandepo yasɨa pe añemotäta ma

jae jugüɨ pe,

ayapo yasoropai cheru omeegüe pe

jare yerovia mbaɨu rupi ou vae pe.

3Aa ma yave jaema chepɨ̈túe kuae ɨvɨtu pe ma,

jare jaema aï kuae ɨvɨ pe opaete pegua oï vae pe;

jare opaete vae rami, aa rupive apoko ayaeo.

4Cheoma reta ñeomaa pe jare chembokuakuaa reta mboroaɨu ndive.

5Metei mburuvicha guasu ave ko mbaetɨ ambuaeyee ou.

6Metei vae tape rupiño ko opaete vae yayu yaike kuae tekove pe,

jare metei tape rupiño vi opaete vae ñae yeta chugüi.

Mboroaɨu arakuaa regua

7Jókuae ramo ko ayerure Tumpa kotɨ jare omee cheve chepɨarakuaa vaerä;

aiporu chupe tekove arakuaa pegua vae, jare jae omee cheve.

8Che aipota tëi mburuvicha reta ipo pegua ɨvɨraecha vae jare iguapɨa renda;

jaema kuae ndive amboyovake ma yave, mbaeyekou mbaeä yepe.

9Metei ita jepɨ vae ave mbaetɨ omboyovake cheve kuae,

jare opaete oro reta ñañono jóvai yave ɨvɨkuitï ramiñota ko oyekuaa,

jare korepoti ko mbae jepɨ yae vae ërei tuyuapo ramiño ko.

10Jókuae ramo che täta ko aɨu ma cherete güi jare mbae ipöra vae güi;

aipotaecha anoi araembipe pe,

echa ko jae jembipegüe ogüeä ma.

11Jare jupi vi ou cheve opaete mbaembae reta,

echa güeru cheve mbaeyekou tuicha vae;

12jaema aiko kavi yae ko opaete jókuae mbaembae reta re, echa ko arakuaa oyangareko jese,

yepe mbaetɨ aikuaa kia ko jae opaete kuae reta iyɨpɨ vae.

13Aja anoi chepɨapochɨmbae reve, jare opaete ndive ayekou jese aporomotareɨmbae reve;

mbaetɨ aikuaku anoi cheyeupegua aeño kuae mbaeyekou.

14Kuimbae reta pe arakuaa jae ko mbaeyekou opambae vae:

kia ñavo oikatu omboembiapo vae, oyemboya ko Tumpa re,

echa jae, iporomboe rupi, oechauka kia ko jae vae.

Iyarakuaa vae oeka ko Tumpa iporomborɨ

15Tumpa tomee cheve chemiari vaerä chepɨarakuaa reve

jare che yemongeta reta toiko jupi rupi jae iporombopota ra,

echa jae ko omee arakuaa

jare oyangareko iyarakuaa vae reta re.

16Jae ipo pe ko ñaï yande reta jare yandeyemongeta reta,

ani ramo opaete yandepɨarakuaa reve yaiko vae.

17Jae ko omee cheve arakuaa añetegüe vae aikuaa vaerä mbaembae reta,

aikuaa vaerä kërai ko oyeapo kuae ɨvɨ vae

jare kërai ko oiko jese opaete mbaembae reta vae;

18aikuaa vaerä mbae iyɨpɨ, iyapɨ jare ara reta mbɨte,

kuaraɨ kërai ko oiko vae jare mbae iara ara reta kërai yave ko oyepoepɨ vae;

19kërai ko año oasa vae jare yasɨtata reta kërai ko oï vae;

20kërai ko opaete mbae kuae ɨvɨ re oikove oï vae reta vae

jare mbae pochɨ vae reta kërai ko jeko vae,

oime espíritu reta oiko vae kërai ko imbaepuere vae jare kuimbae reta kërai ko iyemongeta vae;

kërai ko ñana reta ɨvɨra reta opa oyoavɨ vae jare japogüe reta mbaerä ko ikavi vae.

21Opaetei aikuaa, mbae oñeomi oiko vae reta jare mbae oyekuaa mbae reta,

echa arakuaa ko jae, opaete jókuae iyapoa, jae ko oikuaauka cheve.

Arakuaa kërai yambotuicha vae

22Arakuaa pe oime ko oï metei espíritu iyarakuaa katu yae vae, ikɨambae vae,

jaeiño vae, oyepoepɨ avei vae, ipokoambae vae, oipota rupi ojo vae, ikavi vae, oyeambae vae,

jësaka vae, iyeopiakambae vae, ikavi vae oaɨu vae, oasavuku avei vae,

23jaeiño oiko vae, iporoparareko vae, ovɨa kuimbae re vae,

täta oyemboɨ vae, jëguambae vae, oñerambae vae,

opaete mbae oyapo vae jare opaete pe oïndaivi vae,

oipotagüe espíritu rupi oiketa vi,

ipɨarakuaa vae rupi, oyeambae rupi, jare oime ipokoambae ete rupi vi.

24Arakuaa omɨi ko jare ma omɨi kavi mbae omɨi vae güi,

jare, jae oyeambae jeko pegua oipotagüe rupi oike,

25echa ko Tumpa imbaepuere ipɨ̈túe ramiño ko

jare Tumpa opaete mbae rupi ipuere imbaeyekou ikɨambae imboyekuaa ko;

jókuae ramo ko, ngaraa mbae ikɨa vae ipuere oike jese.

26Tembipe opambae vae oesapegüe ko,

epeo ikɨambae Tumpa jembiapo pegua ko

jare iporoparareko imboyekuaa ko.

27Jaevaeño ko, ërei ngatu, opaete mbae re ipuere;

jae mbaetɨ oyepoepɨ reve, opa katu mbae ombopɨau,

jare arakae güive oike tekove ikɨambae reta rupi,

oyapo Tumpa ichëirä, imiari reta vaerä Tumpa jee re,

28jare mbaetɨ yé ko mbae ma ipöra Tumpa pe vae

jae ko kuimbae oiko iyarakuaa reve vae.

29Jae ko ma jembipe kuaraɨ güi

ani ramo opaete yasɨtata reta güi;

ara ndive yamboyovake jembipegüe yave, jae ko ma jembipe,

30echa tembipe jaɨkue ko ou pɨ̈tu,

jaema arakuaa re ngaraaí ipuere mbae ikavimbae.