JOSUÉ 15 - Guarani Bible with DC

Judá iɨvɨ

1Judá iñemuña reta omboresive ɨvɨ suerte rupi, jëtara ñavo rupi vae, ojo oväe Edom jembeɨ pe, jare arayevɨ kotɨ güɨnoi jembeɨrä ñuu Zin,

2arayevɨ kotɨ jembeɨ oï vae jae ko ɨguasu Jembochɨ vae jembeɨ güive, ɨguasu oyemboɨpɨ arayevɨ kotɨgua vae güive,

3jare oë arayevɨ kotɨ Acrabim ikúa rupi, oasa ojo Zin kotɨ, jare oyeupi ye arayevɨ kotɨ güi Cades-barnea kotɨ, oasa Hezrón rupi, jare oyeupi Adar kotɨ rupi oyere Carca kotɨ,

4joko güi oasa Asmón kotɨ jare oë ɨ̈aka Egipto pegua rupi, jare iyapɨ ɨguasu pe. Kuae ko jae ɨvɨ jembeɨ arayevɨ kotɨ rupi.

5Ɨvɨ jembeɨ kuaraɨ oëa kotɨgua jae ko Ɨguasu Jembochɨ vae, jare jembeɨ ɨvɨtuguasu kotɨgua oyemboɨpɨ Ɨguasu Jembochɨ vae pe ɨ̈aka Jordán ou oyeaa pe,

6jare oyeupi Bet-hogla rupi, oasa Bet-arabá güi ɨvɨtuguasu kotɨ, kuae güi oyeupi Rubén taɨ Bohán iyeita oïa kotɨ;

7javoi oyeupi ɨvɨtɨ päu Acor güi Debir kotɨ, jare ɨvɨtuguasu kotɨ Gilgal kotɨ, Adumín ikúa jóvai oï vae, ɨ̈aka raɨ güi arayevɨ kotɨ oï vae; joko güi oasa ye ɨesaɨ En-semes rupi, jare oë ɨesaɨ Rogel rupi;

8jare oyeupi ɨvɨtɨ päu Hinom rupi Jebús güi arayevɨ kotɨ, jae ko Jerusalén. Javoi oyeupi ɨvɨtɨ iyapɨte rupi, ɨvɨtɨ päu Hinom jóvai, kuaraɨ oikea kotɨ oï vae rupi, kuae oï ɨvɨtɨ päu Refaim güi ɨvɨtuguasu kotɨ,

9jare oyere ɨvɨtɨ iyapɨte güive ɨesaɨ Neftoa kotɨ, jare oë ojo ɨvɨtɨ Efrón pe tëta guasu reta ñogüɨnoia pe, joko güi oyere Baala kotɨ, jae ko Quiriat-jearim.

10Baala güi ɨvɨ jembeɨ oyere kuaraɨ oikea kotɨ, ɨvɨtɨ Seir kotɨ, jare oasa ɨvɨtɨ Jearim iyɨ́vɨri rupi ɨvɨtuguasu kotɨ, jae ko Quesalón, jare ogüeyɨ Bet-semes kotɨ, jare oasa Timna kotɨ,

11javoi oë ɨvɨtɨ ikúa rupi, Ecrón güi ɨvɨtuguasu kotɨ, jare oyere Sicrón kotɨ, jare oasa ɨvɨtɨ Baala rupi, jare oë Jabneel rupi ojo iyapɨ ɨguasu pe.

12Ɨvɨ iyapɨ kuaraɨ oikea kotɨ jae ko Ɨguasu Mediterráneo jee vae. Kuae ko jae Judá iñemuña reta iɨvɨ jembeɨ, omboyao reta iyeupe jëtara ñavo ñavo rupi vae.

Caleb opïro Hebrón jare Debir(Jue 1.10-15)

13Josué omee Caleb, Jefone taɨ pe Judá iñemuña reta iɨvɨ pe. YandeYa oyókuai rami omee chupe tëta guasu Arba jae ko Hebrón. Arba jae ko Anac tu.

14Caleb güɨnoe omombo joko güi mboapɨ Anac iñemuña reta: Sesai, Ahimán jare Talmai.