RUT 1 - Guarani Bible with DC

Elimelec oyakavo ɨvɨ Moab pe

1Arakae mburuvicha oporoepɨ vae reta yogüɨreko yave, oiko karuai jókuae ɨvɨ pe, jare metei kuimbae tëta Belén pe oiko vae ɨvɨ Judá pe, ojo oñemoëta ɨvɨ Moab pe jembireko ndive jare mókoi taɨ reta.

2Jókuae kuimbae ko jee Elimelec, jare jembireko jee Noemí; jare taɨ reta jee Mahlón jare Quelión, Efrataɨgua reta, ɨvɨ Judá pe oï vae. Yogüɨraja oväe ɨvɨ Moab pe jare joko pe oñemoëta reta.

3Jare omano Elimelec, Noemí ime, jare opɨta mókoi imembɨraɨe reta ndive.

4Kuae reta omenda kuña Moab pegua reta ndive; metei jee Orfa jare ïru jee Rut; joko pe yogüɨreko payandepo año.

5Jare omano vi Mahlón jare Quelión; jökorai Noemí opɨta iyangarekoambae, imembɨraɨembae jare imembae.

Noemí jare Rut yogüɨraja Belén pe

6Jayave oyemongeta oyerova ye vaerä imembɨtatɨgüe reta ndive ɨvɨ Moab güi; echa jërakua chupe, Tumpa iporomborɨ rupi oime ye ma tembíu jókuae jëtagüe pe.

7Jayave oë jókuae oikosea güi, mókoi reve imembɨtatɨgüe ndive, jare omboɨpɨ reta oguata yogüɨraja vaerä ɨvɨ Judá kotɨ;

8jare Noemí jei imembɨtatɨgüe reta pe:

—Pekua ye pesɨ pɨri; yandeYa togüɨnoi mboroparareko pekotɨ, pe reta peyangarekose chemembɨ amɨri reta re jare cheré rami.

9YandeYa tomee peve peiko kavi ye vaerä peme jëta pe.

Javoi oovapɨte imembɨtatɨgüe reta, jare jae reta opoko oyaeo,

10jare jei reta chupe:

—¡Ngaraa! ¡Ore rojota ko nde ndive ndeɨvɨ kotɨ!

11Jare Noemí jekuae jei ye:

—Pekua ye chemembɨ reta, ¿maera pa peota cherupíe? Mbaetɨta ma che chemembɨ ye ipuere vaerä yogüɨreko pemerä.

12Pekua ye chemembɨ reta; echa che, chetɨ̈aro ma ko cheme ye vaerä. Yepe tëi mona jae cheyeupe: Chepuereño amenda ye chemembɨ vaerä,

13¿peärota pa opa okuakuaa regua? ¿Peärota pa pekueraimbae reve jae reta peaɨu jeko pegua? Ngaraa ko pepuere chemembɨ reta; che ko anoi mbɨatɨtɨ tuicha yae pegüi, echa yandeYa ombou cheré aiko vaerä jasɨ katu rupi.

14Jare jae reta jekuae oyaeo ye. Jökorai Orfa oñemokɨ̈reɨ oyerova ye vaerä jare oovapɨte imesɨgüe jare ojo, ërei Rut opɨta jae ndive.

15Jare Noemí jei chupe:

—Mase, ko chemembɨtatɨ oyerova ye ma jëta kotɨ jare itumpa reta kotɨ; nde ekua vi jaɨkue.

16Ërei Rut jei chupe:

—¡Agüɨye chemoñera roeya vaerä jare asɨrɨ vaerä ndegüi! Nde reoa rupi, che taja, jare kerupi nde reikoa pe, che taiko vi; nerëta toiko cherëtarä, jare neTumpa toiko vi cheTumparä.

17Nde remanoa pe, che tamano jare joko pe tañeotɨuka; yandeYa täta toiporarauka cheve asɨrɨ ko ndegüi yave, jaeño mano ipuere yandembosɨrɨ oyougüi.

18Jayave Noemí oecha Rut ikɨ̈reɨ yae ojo jupíe, jókuae güire mbaetɨ ye mbae jei chupe,

19jayave mókoi reve yogüɨraja Belén kotɨ. Jare opa ma yogüɨraja oväe Belén pe yave, opaete tëta guasu pegua reta ipɨakañɨ, jae ou oväe jeko pegua, jare jei reta:

—¿Jaeä pa ko kuae Noemí?

20Jare Noemí jei chupe reta:

—Agüɨye mo chereenɨi Noemí pe, chereenɨi Mara pe, echa Imbaepuere yae ete vae cheñono mbɨatɨtɨ tuicha yae pe.

21Che aja kuae güi yerovia ndive, ërei yandeYa chemboyerova ye chepogüɨrai. ¿Maera pa chereenɨita Noemí pe? Echa ko Imbaepuere yae ete vae oiporarauka cheve jare chembopɨatɨtɨuka.

22Körai Noemí oyerova ye ɨvɨ Moab güi imembɨtatɨgüe Rut ndive; jare yogüeru oväe Belén pe, cebada oyemboɨpɨ ma oyepoo yave.