JEREMÍAS 30 - Guarani Bible with DC

Tumpa güɨrökuavee tembipɨɨ reta oyerova yeta vae

1YandeYa jei Jeremías pe körai:

2“Che, Israel iTumpa jae: Eikuatía metei tembikuatía pe opaete jae ndeve vae,

3echa oväeta ara, aru ye vaerä chembae vae reta Israel jare Judá pegua reta, tembipɨɨrä ñogüɨnoia güi. Aru yeta yogüɨreko vaerä ɨvɨ, che amee iñemuñagüe reta imbaerä vae pe.”

4Jae kuae ñee reta yandeYa jei Israel jare Judá regua vae.

5Jei körai:

“¡Aendu täse kɨɨye pegua,

mbaetɨ mbɨakatu pegua!

6Peparandu, ¿ipuere yera

metei kuimbae imembɨ?

Ërei maera pa aecha kuimbae reta oyeetepoka,

kuña imembɨ oa oï vae pe jasɨ vae rami,

jare opaete jovaiyu ñogüɨnoi.

7¡Oyearo ma ara yavaetegüe,

mbaetɨi jókuae nunga ara tenonde rupi!

Ara mbɨatɨtɨ pegua ko Jacob iñemuña reta pe,

ërei che aroasayepe retata.

8Che, peYa Imbaepuere yae ete vae jae:

Ayorata chembae vae reta tembipɨɨ güi,

jare ngaraa ye ma ketɨgua reta jembipɨɨrä yogüɨreko.

9Oyeokuai retata che iYa, Tumpa pe,

jare David iñemuña amopüata juvicha guasurä vae pe.”

YandeYa güɨroasayepeta imbae vae reta(Jer 46.27-28)

10YandeYa jei:

“Cherembiokuai Jacob iñemuña reta, agüɨye pekɨɨye;

Israel iñemuña reta, agüɨye pekɨɨye,

echa nde jare neñemuña reta ayorata

jókuae mombɨrɨ oyererajaa güi.

Yogüɨreko yeta mbɨakatu pe,

mbaetɨta kia omongɨɨye,

yogüɨreko pɨagüiveta.

11Che, peYa jae:

Aï pe ndive pogüɨroasayepe vaerä.

Amboaita opaete tëtaguasu reta

jókuae opa pomoai moaia rupigua.

Ërei pe mbaetɨta pomboai;

jaeño aiporaraukata peve pereko oï rupi;

ngaraa poeya peiporarambae.”

12YandeYa jei:

“Pepere ipöambae ko,

pembaerasɨ reta mbaetɨ ipöa.

13Mbaetɨ kia oyemoambeko peré;

mbaetɨ kia oipoano pepere,

mbaetɨ moa chupegua.

14Opaete pepotase vae iñakañɨ pegüi;

mbaetɨ ma oyemoambeko reta peré.

Che ko pombopere, tovaicho ombopere jovaicho rami,

aiporarauka ete kavi peve, jeta ikavimbae peyapo jeko pegua,

jare peyoa jeta yae jeko pegua.

15¿Maera pa peroäse pepere?

Pembaerasɨ ipöambae ko.

Ikavimbae jeta peyapo jeko pegua,

jare peyoa jeta yae vae jeko pegua,

körai poapo.

16Ërei opaete pemboai vae, oyemboaita,

jare opaete perovaicho oyererajata tembipɨɨrä iɨvɨ güi;

amboaiukata jókuae pemboai vae,

opaete jókuae opɨ̈ro mbae pegüi vae,

oñepɨ̈rota vi mbae chugüi reta.

17Ërei pombogüerata,

aipoanota pegüi pepere reta,

perovaicho reta jei tëita peve:

‘Sión oyemombo oï,

mbaetɨ kia oyemoambeko jese.’

Che peYa ko jae kuae.”

18YandeYa jei:

“Aru yeta tembipɨɨ güi Jacob iñemuña reta,

aiparareko yeta iɨvɨ;

omopüa pɨau yeta tëta guasu oyemboaigüe,

jare mburuvicha guasu jo, jendagüe pe.

19Chugüi reta oëta tairari yasoropai pegua,

jare yerovia katu pegua mbuka reta.

Ngaraa iñemuña reta jagüe, echa che amoñemuñaukata.

Ngaraa oñereröɨrouka reta, echa che amboeteukata.

20Israel iñemuña reta tenonde yave ramita,

jare chemboete reta yeta metei rami;

che aiporaraukata, opaete oiporarauka chupe vae reta pe.

21Ipɨte reta güi oëta juvicharä:

Oporookuai vae oëta ipɨte reta güi aeño.

Amboyemboyaukata cheyé,

echa, ¿kia pa ikɨ̈reɨta oya vaerä cheré?

22Yogüɨrekota chembae retarä

jare che aikota iTumparä.

Che peYa ko jae kuae.”

23YandeYa iyarasɨ ama ɨvɨtuai reve vae rami ko,

ama ɨvɨtuai reve rami oyepɨu iyoa vae reta re.

24YandeYa iyarasɨ ngaraa oasa,

jae oipota vae, opa oyapo regua.

Oväeta ara peikuaa vaerä kuae mbaembae reta.