SABIDURÍA 16 - Guarani Bible with DC

Egipto yamboyovake Israel ndive vae pïte reta jare inambu reta

1Jókuae ramo ko Egiptoɨgua täta oiporara,

echa chupegua reta ramo,

mbae oikovegüe yavaete katu vae rupi,

jare oiporara reta mbae jetagüe vae reta rupi.

2Ërei, nerëta ipo reta pe, reiporarauka vaerägüe chupe reta, remborɨ reta jare,

remboangapɨɨ reta vaerä,

remee chupe reta tembíu jae reta oikuaambae vae: Inambu reta.

3Jare Egiptoɨgua reta, yepe yɨmbɨaɨ ñogüɨnoi, oasa chugüi reta yɨmbɨaɨ

oecha yave mbae yavaetegüe reta

rembou chupe vae.

Ërei, nerëta ipo reta,

ndei mbovɨ ara oiporara reta mbove,

jou reta tembíu oecha mbae yogüɨreko vae.

4Jupi vi imbaeyuvanga vae reta pe

ou vaerä yɨmbɨaɨ tätagüe vae,

ërei, nerëta ipo reta michi peguaño ko oiporara

jókuae jovaicho reta oiporara vae güi.

Tuku reta jare mboi jiero iyu vae pegua vae

5Nerëta ipo reta re

mbae täta imbayachi vae reta opoko yave

jare mboi reta opoko oporoyuka oporosuu vae rupi yave,

ndearasɨ vae mbaetɨ ko ɨma pegua.

6Michi remongɨɨye reta, oikuaa reta vaeräño,

jare remee ye vi chupe reta metei mbae oasayepe vaerä,

imaendúa reta vaerä vi ndeporookuai jeigüe vae pe.

7Kia ñavo omae jókuae oyeechauka oï vae pe yave, oasayepeta,

jókuae oyekuaa oï vae pe omae güiñoä oasayepeta vae,

jaeño ma ndeve ko yasoropai, echa nde ko jae yemboasa remee opaete pe vae.

8Jare jökorai nde reechauka orerovaicho reta pe

ndeñoi eiko jae opaete mbae güi reporomboasa vae.

9Jae reta tuku jare ñatíu oichuu vae güiño omano,

mbaetɨ reve oväe reta mbae pe oñepoano vaerä oasayepe vaerä.

Jare jökorai chupegua reta ñomai jókuae tembiporara ou vae.

10Ërei, nderaɨ reta, mbaetɨ iñamɨri

yepe mboi täta imbayachi vae oichuu reta,

echa ndeporoparareko omborɨ reta jare oasayepe reta.

11Jae reta mboi oichuu ërei jarembae okuera reta ye

jae ko imaendúa reta vaerä neñee jeigüe vae pe,

agüɨye vaerä iñakañɨ reta chugüi

ani ramo oikuaambae rami oiko reta ikavi vae reyapo chupe reta vae güi.

12Oipotagüe ñanaä ko ani ramo yembosova peä ko,

okuera reta,

neñee peño ko, Tumpa, opaete vae okuera.

13Echa nde oime renoi mbaepuere tekove re jare mano re,

nde oremondo mano oïa pe, jare ore rekɨɨye joko güi.

14Jare kuimbae, ipɨa pochɨ vae rupi,

ipuere vi oekɨ tekove, añete ko jókuae,

ërei ngaraa ma ipuere omee ye tekove

jare ngaraa ma ipuere ombou ye tekove

mano oekɨ vae.

Mbae oiko aeño ɨvɨ re vae jare maná

15Ngaraa kia ipuere oasayepe ndepo güi.

16Iporopararekombae reta, oipotambae ndekuaa vae reta,

oiporara reta ndeyɨva tätagüe vae iporonupa pe,

oñemuñauka reta ama oikombae joko pe vae pe,

amandau jare ara-ñeengata tätagüe vae pe,

jare opa ókai reta tataendɨ pe.

17Jare mbae ma oporomopɨakañɨ vae jae ko

ɨ, jae ko opaete mbae ombogüe vae,

jókuae pe tata ma ete oyembotuicha.

Echa ko opaete ɨvɨ rupi oï vae oepɨ jupi vae reta.

18Amo yave tataendɨ michi pe ogüeäi,

agüɨye vaerä ókai jókuae mbae reta yogüeru oporopararekombae reta kotɨ yave,

jókuae jae ko jae reta oikuaa vaerä, oecha jókuae mbae ou vae yave,

Tumpa imbaejupi ko ou chupe reta vae.

19Amo yave, ɨ mbɨte pe ave,

tata tuicha jendɨ oipotagüe tata rami,

opa vaerä omokañɨtei jókuae tëtaguasu temitɨ güɨnoigüe.

20Ërei, nerëta ipo reta pe,

remee jou vaerä araɨgua reta jembíu.

Mbaetɨ reve mbae oyapo reta,

ara güi etei rembou chupe reta

mbɨyape jaema oyeu vaerä vae, jare opaete vae oyueta vae

jare opaete vae pe ikavita ko vae.

21Kuae tembíu remee chupe reta vae

omboyekuaa nde täta ndepɨakavi nderaɨ reta pe vae:

kia ñavo jókuae tembíu jou vae jou oyúe reve

jare opaete vae pe ikavi.

22Jare vi, yepe iroɨ oñemotätagüe rami,

mbaetɨ ko tɨkui tata pe.

Jare jökorai oikuaa reta

tata jendɨ oï amandau pɨte rupi vae

jare opiriri riri ama rupi vae

opa omokañɨtei tovaicho reta jemitɨ chugüi,

23jókuae tata ye ogüeäi ma yave

jupi rupi oiko vae reta oiporu oyemongaru vaerä pɨpe.

24Echa nderembiapogüe reta, oyeokuai ndeve, nde iyapoa pe,

oñemopüa täta rupi oiporarauka vaerä jeko kavimbae reta pe,

jare oyembogüɨ nderé güɨrovia vae reta kotɨ.

25Jökorai oasa, jókuae ara,

jae, oyepoepɨ ete kavi yave,

oyeokuai ndeporerekua pe, opaete vae omongaru vaerä,

omoɨ̈vata vaerä ndekotɨ oyeko vae reta,

26oikuaa vaerä nderaɨ reaɨu vae reta, Tumpa,

temitɨ ɨvɨ re oë vaeñoä ko

omongaruta kuimbae,

neñee vi ko omoingoveta nderé güɨrovia vae reta.

27Maná, tata mbaetɨ ipuere opa omokañɨ,

ërei kuaraɨasɨ opa omondɨkui,

28jare nerëta ipo reta oikuaa vaerä

opüa ndei köe ngatu mbove oyapo vaerä yasoropai ndeve,

jare oyerure vaerä ndeve ndei kuaraɨ oë mbove,

29jare ipɨapochɨ vae iyemongeta

opata ko tɨkui ɨsápɨi iroɨ iara pe oï vae rami

jare oguatata ɨ ikavimbae rami.