1CheYa, ndeporoparareko atairarita jekuae avei rupi;
chetairari rupi, jekuaekuae avei rupi amombeuta ndeporoparareko re
jare neñee rembopo avei vae re.
2Amoërakuata ndeporoparareko jae ko opambae vae;
mbaetɨi oyepoepɨ, ara mbaetɨi oyepoepɨ rami.
3Reyapo metei morogüɨrökuavee päve David ndive;
reñererökuavee nderembiokuai reiparavo vae pe, rere:
4“Neñemuña reta pe ameeta jekuae avei pegua
oporookuai vaerä nderendagüe pe.”
5CheYa Tumpa,
opaete araɨgua omboete jupigüe jare mɨakañɨ reta reyapogüe.
6Echa, ¿kia pa ara pe oime ndemboyovake vaerä, cheYa?
Imbaepuere vae reta güi, ¿oime pa kia ndemboyovake vaerä?
7Tumpa kɨɨyea araɨgua reta ipɨte pe,
tuicha yae opaete iyɨ́vɨri rupi ñogüɨnoi vae reta pe.
8CheYa Tumpa, Tumpa Imbaepuere yae ete vae,
¿kia pa nde rami?
Ndembaepuere yae ko cheYa,
añete vae pe reñeova etei reï.
9Nde renoi mbaepuere ɨguasu iñaro re,
remokïrii opüa yave iɨaparúa reta;
10repɨ̈ro mbaeporou ɨguasu rupigua Rahab re,
omanogüe re rami;
opa remoai moai nderovaicho reta ndembaepuere pe.
11Ndembae ko ara jare ɨvɨ;
nde ko reyapo ɨvɨ jare opaete mbaembae oï pɨpe vae.
12Nde ko reyapo ɨvɨtuguasu jare arayevɨ;
ɨvɨtɨ guasu Tabor jare Hermón
otairari reta nderee re.
13Ndeyɨva imbaepuere yae ko,
ndepo akatu ipɨ̈rata jare imbaepuere yae.
14Ndeguapɨa mborookuaía pegua oï jupi jare sɨmbi vae re;
mboroparareko jare añete vae ojo nderenonde.
15CheYa Tumpa,
oyerovia ko tëta ndemboete oyerovia katu reve vae;
nderemimbota rupi oguata vae,
16nderee re oyerovia avei ara ñavo,
oyembotuicha ndembae jupi re.
17Echa nde ko jae imbaepuere jare iyemboetea;
ndepɨakavi rupi rembotuicha orembaepuere.
18¡OreYa Tumpa nde ko jae oreyeopiaka!
¡Oreruvicha guasu jae ko Iyoambae Israel pegua!
19Jayave nemiari yepi nderembiokuai reta pe körai:
“Aiparavo metei jëia yae vae, chembae vae reta ipɨte pe,
ambotuicha yae jare amborɨ.
20¡Aväe cherembiokuai David!
Aiparavo cheasaite oñeñono tee vae rupi.
21Cheporomborɨ oiko aveita jae ndive.
Cheyɨva pe amomɨ̈ratata,
22jovaicho reta ngaraa oesapɨa,
jeko kavimbae reta ave ngaraa omoamɨri.
23Jaeño che amoamɨrita jovaicho reta chupe;
¡ayukata jókuae imotareɨa reta!
24Cheporoparareko jare cheñee añete vae oikota jae ndive,
cheree re imbaepuere tuicha yaeta.
25Imbaepuere añonota ɨguasu güive, ɨ̈aka Éufrates pe.
26Jae jeita cheve: ‘Nde jae cheRu,
cheTumpa, jare ita guasu rami chereepɨ vae.’
27Jare che amee eteta chupe oï vaerä cheraɨrɨpɨrä,
tuicha yae vaerä mburuvicha guasu reta ɨvɨ pegua güi.
28Cheporoparareko aveita ikotɨ,
jare cheporogüɨrökuavee päve oiko aveita jae ndive.
29Añonota iñemuña reta oiko avei vaerä,
iporookuaía oikota ara oiko avei vae rami.
30Ërei iñemuña reta oeya yave cheporookuai,
jare mbaetɨ oguata cheporookuai jei vae rupi yave.
31Omboeteä reta cheporookuai jare mbaetɨ oyapo reta yave,
32aiporaraukata jókuae ipɨapochɨ re,
jare ainupata ikavimbae oyapo vae re.
33Ërei ngaraa cheapɨ aiparareko David,
cheñee ambopo aveita chupe.
34Ngaraa cheakañɨ cheporogüɨrökuavee päve güi,
ngaraa vi aipoepɨ jaegüe.
35Añererökuavee cheree ikɨambae re vae,
ambopota ko David pe.
36Añonota iñemuña reta oiko avei vaerä,
iporookuaía oikota cheróvai kuaraɨ oiko avei vae rami.
37¡Yasɨ rami oikota jekuae avei rupi!
¡Oikota jekuae avei pegua, ara oiko ramboeve!”
38Ërei ngatu, reröɨro jare remombo
mburuvicha guasu nde reiparavogüe;
¡ndearasɨ chupe!
39Repɨ̈ro chugüi morogüɨrökuavee päve reyapo nderembiokuai ndive vae;
remombo chugüi ɨvɨ re
iñäka-regua oro pegua.
40Opaetei remboasavi ikësea reta chugüi;
¡reipoepɨ tëta guasu reta tëtagüerä!
41Opaete jokoropi oasa vae opaetei mbaembae güɨraja;
jëta-ɨpɨ rupigua reta opuka jese.
42Remee jovaicho reta imbaepuere yae vaerä;
remee jovaicho reta oyerovia yae vaerä.
43Jaimbepa reyapo ikɨsepuku reta,
mbaetɨ remborɨ ñeraro pe.
44Iyemboetea rembogüe chugüi;
iguapɨa mborookuaía pegua reitɨ chugüi ɨvɨ re.
45Oikopuku vaerägüe, remomichi chugüi,
jare reñono ñemomarai pe.
46CheYa Tumpa,
¿kërai yave regua pa chereeyata?
¿Jendɨ aveita ra ndearasɨ tata rami?
47Nemaendúa, ngaraa ko ɨma aikove aiko;
¿maera ra reyapoiño kuimbae?
48¿Oime ra kuimbae mbaetɨta omano vae?
¿Oepɨta ra jekove mano imbaepuere güi?
49CheYa,
¿ketɨ pa oime oï ndeporoparareko,
jókuae arakae nderee re ae rerökuavee David pe vae?
50CheYa, nemaendúa nderembiokuai reta oiporara ñemomarai vae re;
jókuae ñemomarai aiporara vi.
51CheYa Tumpa,
¡nderovaicho reta mbaetɨ oporomboete!
¡Jökorai mbaetɨ omboete reta nderembiparavo!
52¡Mbaemboete toiko ndeve cheYa jekuae avei rupi!
¡Amén! ¡Amén!
Who We AreWhat We EelieveWhat We Do
2025 by iamachristian.org,Inc All rights reserved.
