DANIEL 10 - Guarani Bible with DC

Daniel oecha ɨ̈aka jembeɨ pe vae

1Ciro mboapɨa año ma oiko mburuvicha guasurä Persia pe yave, Daniel, Beltsasar jee vae pe ou ñee; jókuae ñee oendu vae añetete vae ko, jare yavai yae vae ko; ërei jae oikuaa mbae ko oipota jei jókuae oecha vae.

2“Jókuae ara rupi che Daniel, chepɨatɨtɨ aiko mboapɨ semana rupi.

3Mbaetɨ jau tembíu jëe ngatu vae, mbaetɨ jau soo ani vino ave yepe, mbae ikäti kavi vae ave mbaetɨ añono cheyé mboapɨ semana rupi.

4Tenondegua yasɨ veinticuatro araa pe, che aï ɨ̈aka guasu Hidekel jembeɨ pe.

5Amopüa cheäka amae, jare ko aecha metei kuimbae jemimonde lino pegua vae jare ikuakuaa oro kavi Ufaz pegua rami.

6Jete jembipeasɨ ita ikavi vae berilo rami, jova jendɨasɨ ama-vera rami, jesa reta tata jendɨ rami, iyɨva jare ipɨ reta jiero iyu vae oyemboembipeasɨ vae rami, jare iñee jɨapu, jeta vae iñee jɨapu oyeendu rami.

7Che, Danielño aecha jókuae oyekuaa cheve vae, jare mbaetɨ oecha jókuae kuimbae reta ñogüɨnoi che ndive vae, echa okɨɨye yae reta, opa otekuarai jare opa oñemi reta.

8Cheño ete apɨta, jare aecha kuae mɨakañɨ guasu oyekuaa cheve vae, jare mbaetɨ etei cherete ipɨ̈rata, opaetei cherëogüe, mbaetɨ etei chepuere.

9Ërei aendu iñee; jare aendu ramboeve iñee reta amano tëi, aa ɨvɨ re cherova kotɨ rupi.

10Jupivei chepɨɨ vae jare chemopüa cheñono chetava re, apoko reve aï ɨvɨ re.

11Javoi jei cheve: ‘Daniel, Tumpa jembiaɨu, eendu kavi kuae ñee reta jaeta ndeve vae: Epüa eyemboɨ; echa chembou ndekotɨ vae.’

Imiari che ndive ramboeve apüa ayemboɨ arɨrɨi reve.

12Jayave jei cheve: ‘Daniel, agüɨye ekɨɨye; echa jókuae ara voi nde reipota reikuaa mbaembae yavai yae vae jare vi reñemomichi neTumpa jóvai rupive jae oendu ndeve ndeyerure, jáeramo che ayu.

13Ërei ɨvɨ Persia re mburuvicha oyangareko vae cheopia veintiuno ara rupi; ërei araɨgua Miguel,Jud 9; Ap 12.7. metei mburuvicha tenondegua ete ou chemborɨ vaerä; jökorai aiko mburuvicha guasu reta Persia pegua ñogüɨnoia pe.

14Ayu aikuaauka vaerä ndeve kërai nerëta oasata kuri vae; echa jókuae reecha vae, jókuae ara rupi oyeapo vaerä ko.’

15Kuae ñee reta jei oï cheve ramboeve, cheäkatindɨ aï jare mbaetɨ etei cheñee amoë.

16Güɨramoiño metei kuimbaeecha vae opoko cheyuru re. Jayave jae jókuae cheróvai oyemboɨ oï vae pe: ‘Cheya, kuae aecha vae chembopɨatɨtɨ yae jare mbaetɨ etei chepuere.

17¿Këraita pa chepuere chemiari nde ndive, chepuerembae reve jare opaetei cherëogüe aï vae?’

18Jókuae kuimbaeecha vae jekuae cheätai ye, chemomɨ̈rata pɨau ye,

19jare jei cheve: ‘Agüɨye ekɨɨye, agüɨye ndepɨatɨtɨ. Tumpa jembiaɨu; ¡eñemoäta ngatu jare agüɨye eyembopɨtu!’

Chemomiari ramboeve, ayandu chetäta ye jare jae: ‘Nemiari cheya, echa chemomɨ̈rata ye ma.’

20Jayave jei cheve: ¿Reikuaa pa maera ayu aväe ndeve? Echa añave aja yeta añeraro vaerä araɨgua ɨvɨ Persia re oyangareko vae ndive. Opa añeraro jae ndive yave, outa vi araɨgua ɨvɨ Grecia re oyangareko vae.

21Añave amombeu kavita ndeve tembikuatía añetete vae pe oyekuatía oï vae: Jae reta ndive añeraro yave jaeño chemborɨ araɨgua Miguel,Jud 9; Ap 12.7. mburuvicha tenondegua ete ɨvɨ Israel pegua.