NÚMEROS 16 - Guarani Bible with DC

Coré ipɨapochɨ

1CoréJud 11. jae ko Izhar taɨ, Coat iñemuña, Leví iñemuña pegua, jare Rubén iñemuña pegua mboapɨ, jae ko Datán jare Abiram, Eliab taɨ reta, jare On, Pelet taɨ; kuae reta omboatɨ jeta vae,

2oñemopüa reta Moisés kotɨ, dosciento cincuenta kuimbae Israel iñemuña reta ndive; jae ko mburuvicha reta, oporomboarakuaa vae reta jare kuimbae jërakua yae vae reta.

3Yatɨ reta Moisés jare Aarón kotɨ, jei reta chupe körai:

—¡Joko peño mo pe reta! Echa opaete Israel iñemuña reta oñeñono tee vae ko, oime ko yandeYa oiko jae reta ipɨte pe. ¿Maera pa pe reta peñeñono mburuvicharä kuae tëta yandeYa imbae re?

4Moisés oendu yave kuae, oyetavatɨka jare itindɨasɨ ɨvɨ re;

5jare jei Coré pe jare opaete jupiegua reta pe:

—Pɨareve yandeYa oechaukata kia ko jae imbae vae,2 Ti 2.19. jare kia ko jae oñeñono tee chupeguarä vae, jae omaeñota oya jese jembiparavo.

6Kuae peyapo: Peipɨɨ ikäti kavi vae incienso oyeapɨ pɨpe vae reta, nde Coré jare opaete nderupiegua,

7jare peñono pɨpe tata, jare perökuavee ikäti kavi vae incienso yandeYa jóvai pɨareve; jare jókuae kuimbae yandeYa oiparavo vae, jókuae ko jae oñeñono tee chupeguarä vae. ¡Kuae ndive pepɨakatu mo Leví iñemuña reta!

8Moisés jei ye Coré pe:

—Peyeapɨsaka añave, Leví iñemuña reta:

9¿Mbaeä etei pa ko peve, Tumpa Israel pegua peñono tee opaete Israel iñemuña reta ipɨte güi vae, pereru ikotɨ peyeokuai vaerä chupe tupao guakapi pegua yandeYa imbae pe, jare peñono yatɨ vae reta jóvai peyeokuai vaerä chupe reta,

10jare omee ma ko ndeve reï vaerä köiño chugüi, jare opaete nderɨvɨ reta, Leví iñemuña reta nde ndive? ¿Peipota vi pa mbaravɨkɨ sacerdote pegua ave?

11Jáeramo nde jare opaete nderupiegua, yandeYa kotɨ oñemopüa vae reta ko; Aarón, ¿mbae pa jeko, peñeenguru vaerä ikotɨ?

12Jare Moisés omondo oenɨiuka Datán jare Abiram, Eliab taɨ reta; ërei ngatu jae reta jei:

—Ngaraa rojo joko pe.

13¿Mbaeä etei pa ndeve opa orereru ɨvɨ kavi güi vae, opa vaerä oreyukauka kuae ñuu pe, jare vi reyemombae oreré reyembotuicha reve?

14Jare mbaetɨ ave vi oremoinge ɨvɨ kavi pe, jare mbaetɨ remee oreɨvɨrä ani uvarupa yepe. ¿Jesambae rami pa kuae kuimbae reta reipota reraja? Ngaraa rojo.

15Jayave Moisés iyarasɨ yae ete, jare jei yandeYa pe:

—¡Agüɨye emae mbota güerugüe reta re! Mbaetɨ ko apɨ̈ro metei mburika ave yepe chugüi reta, jare metei vae pe ave mbaetɨ ayapo ikavimbae.

16Jaɨkue rupi Moisés jei Coré pe:

—Nde jare opaete nderupiegua, pɨareve peñeñono yandeYa jóvai; jare Aarón vi oïta joko pe;

17jare toipɨɨ metei ñavo vae, ikäti kavi vae incienso oyeapɨ pɨpe vae imbae ae, jare peñono pɨpe ikäti kavi vae incienso, jare peya katu yandeYa jóvai metei ñavo vae ikäti kavi vae incienso oyeapɨ pɨpe vae ndive, dosciento cincuenta ikäti kavi vae incienso oyeapɨ pɨpe vae. Nde jare Aarón peraja vi pembae ae ikäti kavi vae incienso oyeapɨ pɨpe vae.

18Jayave metei ñavo oipɨɨ ikäti kavi vae incienso oyeapɨ pɨpe vae imbae ae, jare oñono reta pɨpe tata, jare opɨyere jese ikäti kavi vae incienso, jare yogüeru reta oñeñono tupao guakapi pegua jöke pe, Moisés jare Aarón ndive.

19Coré opa ma yepe omboatɨuka tëta pegua reta Moisés jare Aarón kotɨ, tupao guakapi pegua jöke pe; jayave yandeYa iyemboetea oyekuaa opaete yatɨ vae reta pe,

20jare yandeYa jei Moisés jare Aarón pe:

21—¡Pesɨrɨ opaete kuae yatɨ vae reta güi, opata amokañɨtei aramoete pegua!

22Jayave jae reta oyetavatɨka jare itindɨasɨ ɨvɨ re, jare jei reta:

—OreRu Tumpa, opaete oikove vae reta jekove iTumpa, ¿metei kuimbaeñoä pa iyoa? ¿Maera pa ndearasɨ opaete kuae yatɨ vae reta kotɨ?

23Jayave yandeYa jei Moisés pe:

24—Ere opaete kuae yatɨ vae reta pe, osɨrɨ reta vaerä Coré, Datán jare Abiram jo guakapi pegua iyɨpɨ güi.

25Jayave Moisés opüa jare ojo Datán jare Abiram pɨri, jare opaete Israel iñemuña itenondegua reta vi yogüɨraja jupíe.

26Jare jae imiari yatɨ vae reta pe, jei reve:

—Pesɨrɨ kuae kuimbae reta oyemboyovaicho Tumpa kotɨ vae reta jo guakapi pegua güi, jare agüɨye etei imbaembae re pepoko, agüɨye vaerä pe reta vi pemano jae reta imbaeyoa jeko pegua.

27Jare osɨrɨ reta Coré, Datán jare Abiram jo guakapi pegua iyɨ́vɨri güi; jare Datán jare Abiram ñogüɨnoe oñeñono jo guakapi pegua jöke pe, jembireko reve reve jare imichia reta ndive.

28Jare Moisés jei:

—Kuae rupi peikuaata yandeYa ko chembou ayapo vaerä opaete kuae mbaembae vae, mbaetɨ ko ayapo cheyeugüi aeño.

29Opaete kuimbae reta omano ramiño kuae reta omano yave, ani kuimbae ñavo ndive oasa ramiño kuae reta oasa yave, jökorai yave mbaetɨ ko yandeYa chembou.

30Ërei ngatu yandeYa oyapo yave mbae ipɨau vae, jare ɨvɨ oyepeka yave, jare opa omókoi yave jekove reve opaete imbaembae ndive, jayave peikuaata kuae kuimbae reta ko güɨröɨro yandeYa vae.

31Jare Moisés opa ma imiari opaete kuae ñee reta yave, oyepeka ɨvɨ oyemboɨ reta ñogüɨnoia pe.

32Ɨvɨ oyepeka, jare opa omókoi jókuae reta, opaete jo pegua reta, opaete kuimbae Coré jupiegua, jare opaete imbaembae.

33Jökorai jae reta opaete imbaembae ndive oa jekove reve omanogüe reta ñogüɨnoia pe, jare ɨvɨ oyeokenda ye. Jökorai opa okañɨtei reta opaete yatɨ vae reta ipɨte güi.

34Jare opaete Israel pegua reta yatɨ ñogüɨnoi iyɨ́vɨri vae, oyandu jäse reta yave, otekuarai reta, echa jei reta: “¡Agüɨye tiñanemókoi vi ɨvɨ!”

35Jare yandeYa ombou vi tata, jare opa omokañɨtei jókuae dosciento cincuenta kuimbae reta, ikäti kavi vae incienso güɨrökuavee tëi ñogüɨnoi vae.

36Jayave yandeYa jei Moisés pe:

37“Ere Eleazar sacerdote Aarón taɨ pe toekɨ ikäti kavi vae incienso oyeapɨ pɨpe vae reta, tata jendɨ vae güi, jare tata oimeño oï pɨpe vae tomombo matɨ; echa oñeñono tee ko,

38iyoa jekove ae kotɨ vae reta ikäti kavi vae incienso oapɨ pɨpe vae; jare tomboipe kavi toyapo chugüi mɨmba oyeyuka oyeapɨ jese vae oñeova pɨpe vaerä; echa pɨpe ko güeru reta güɨrökuavee vaerä cheróvai, oñeñono teegüe ko; jare kuae topɨta Israel taɨ reta oyemomaendúa avei jese vaerä.”

39Jare sacerdote Eleazar oipɨɨ ikäti kavi vae oyeapɨse pɨpe vae reta, jiero iyu vae pegua, jókuae okaigüe reta güɨrökuavee tëi pɨpe vae; jare omboipe reta oyapo vaerä pɨpe mɨmba oyeyuka oyeapɨ jese vae iñovakarä,

40Israel iñemuña reta imaendúa avei jese vaerä, kërai mbaetɨta kia nunga vae, Aarón iñemuñambae vae ipuere oya güɨrökuavee vaerä ikäti kavi vae incienso yandeYa jóvai, agüɨye vaerä oasa Coré jare jupiegua reta rami; yandeYa omombeu tëi Moisés rupi chupe rami.

41Pɨareve pe opaete Israel iñemuña reta iñeenguru Moisés jare Aarón kotɨ, jei reve:

—¡Pe reta peyuka tëta yandeYa imbae!

42Jare oyemboatɨ reta ramboeve Moisés jare Aarón kotɨ, omae reta tupao guakapi pegua kotɨ yave, ko oecha reta amapɨtu opa oñova, jare oyekuaa yandeYa iyemboetea.

43Jare yogüeru Moisés jare Aarón tupao guakapi pegua jóvai.

44Jare yandeYa jei Moisés pe:

45¡Pesɨrɨ katu kuae oyemboatɨ vae reta güi, amokañɨteita aramoete pegua!

Moisés jare Aarón oyetavatɨka itindɨasɨ reta reve ɨvɨ re,

46jare Moisés jei Aarón pe:

—Eipɨɨ ikäti kavi vae incienso oyeapɨ pɨpe vae, jare eñono pɨpe tata mɨmba oyeyuka oyeapɨ jese vae pegua, jare eñono iárambo ikäti kavi vae incienso jare ekua aramoete tëta yatɨ ñogüɨnoi vae reta pɨri, jare eyapo chupe reta Tumpa iñɨ̈ro vaerä mbaeyoa re, echa yandeYa iyarasɨ ou ma; omboɨpɨ ma omano ñogüɨnoi jeta vae.

47Jayave Aarón oipɨɨ ikäti kavi vae incienso oyeapɨ pɨpe vae Moisés jei chupe rami, jare osɨi jeta oyemboatɨ ñogüɨnoia kotɨ; jare oecha omboɨpɨ ma omano ñogüɨnoi jeta vae tëta pe; jare jae oñono ikäti kavi vae incienso jare oyapo chupe reta Tumpa iñɨ̈ro vaerä mbaeyoa re;

48jare oñeñono omanogüe reta jare oikove vae reta ipäu pe; jare osondo jókuae jeta omano ñogüɨnoi vae,

49catorce mil seteciento opa omano jayave, oyepapambae reve Coré ndive omano vae reta.

50Javoi Aarón ou ye Moisés oïa pe, tupao guakapi pegua jöke pe, osondo ma jókuae jeta omano vae yave.