ISAÍAS 14 - Guarani Bible with DC

Iɨvɨ güi opa oyereraja vae reta oyerova ye vae regua

1YandeYa oipararekota Jacob iñemuña reta. Jekuae oyapo yeta imbaerä Israel iñemuña reta, güeru yeta oñono reta vaerä iɨvɨ ae pe. Ketɨgua reta oyemboyata jese reta, oñemoïruta Jacob iñemuña reta ndive.

2Jeta tëtaguasu reta omboresive kavita Israel iñemuña reta, jare omoïru retata yogüeru ye jëta kotɨ yave, jare Israel iñemuña reta oyapota jembiokuairä yandeYa iɨvɨ pe. Jökorai Israel iñemuña reta oyapota tembipɨɨrä arakae jökoraise oyapo vae, güɨnoi retata mbaepuere, arakae güɨrekose mbaepuere jese reta vae re.

Mbuka mburuvicha guasu Babilonia pegua re

3Tëta Israel, yandeYa ndemombutuu opaete mbɨatɨtɨ reta güi, mbaembae reiporara vae güi, jare yeokuaiasɨ katu pe neñono reta vae güi yave,

4rereta kuae ñee arakuaa pegua, mburuvicha guasu Babilonia pegua kotɨ:

“¡Mase, kërai ou opɨta imbaeyuvanga yepi vae!

¡Mase, kërai ou opɨta tëta guasu oro oipota rai yae yepi vae!

5YandeYa omboai ipɨapochɨ vae imbaepuere,

opɨ̈ro mburuvicha iyoa vae reta ipopoka mborookuai pegua,

6tëtaguasu reta pe oiporarauka yepi iyarasɨ reve vae,

oinupa avei yepi vae,

iyarasɨ reve oyokuaiasɨ katu yepi tëtaguasu reta vae,

oyapo yepi jeta ikavimbae chupe reta vae ipïrimbae reve vae.

7Opaete ɨvɨ pegua reta oputuu pɨagüive ñogüɨnoi,

jare jäsémbai oyerovia reta güi.

8Ɨvɨra ciprés jee vae reta jare ɨ̈vɨrare reta ave

oyerovia reta ndesusere re, jare jei reta:

‘Nde resusere güire mbaetɨ ye kia ou oreasɨa vae.’

9Omanogüe reta ñogüɨnoia pe, ipɨakañɨ reta nderé,

tëogüe reta opüa nderapependo vaerä,

opaete ɨvɨ pegua mburuvicha reta opüa iguapɨka güi,

jare opaete mburuvicha guasu tëtaguasu pegua reta opüa oyemboɨ.

10Opaete jae reta jeita ndeve:

‘Opa ndembaepuere ndegüi,

reyu vi repɨta ore rami.

11Kuae omanogüe reta ñogüɨnoia pe ou opa ndepɨapochɨ,

jare nderemimbɨ arpa ipu reta.

Taso reta ko nderuparä jare ndeasoyarä.’

12¡Maera pa ko rea ara güi,

yasɨtata köembiya, jembipeasɨ köe-pota yave vae!

Reyeitɨuka ɨvɨ re,

nde remoamɨri yepi tëtaguasu reta vae.

13Rere yepi ndepɨa pe ndeyeupe:

‘Tayeupi ara kotɨ;

tañono cheguapɨka mborookuaía pegua Tumpa iyasɨtata reta iárambo ye;

taguapɨ ɨvɨtɨ guasu,

tumpa reta ñogüɨnoia pe ɨvɨtuguasu kotɨ.

14Tayeupi amapɨtu ɨvate yae vae kutɨ ye;

tamboyovake Tuicha yae ete vae.’

15¡Ërei rea ko omanogüe ñogüɨnoia kotɨ,

ɨvɨgüɨasɨ kotɨ!

16Ndereecha vae reta, oyemboɨta omae nderé, jare jei retata:

‘¿Jae pa kuae kuimbae omborɨrɨi yepi ɨvɨ vae,

opa yepi omboai tëtaguasu reta vae,

17ɨvɨ oeya yepi ipombae vae,

opa yepi omboai tëta guasu reta vae,

jare mbaetɨi oyora jembipɨɨ reta vae?’

18Opaete vae mburuvicha guasu tëtaguasu pegua ñavo

oputuu kavi ñogüɨnoi jɨvɨa ae ae pe;

19ërei nde, ndemombo reta ikatu pe tɨvɨa güi,

mbae yavaete yae vae rami,

kɨse pe omano vae jemimondegüe rami,

tëogüe ɨvɨkua pe oyemombogüe rami,

tëogüe re oñepɨ̈rogüe rami.

20Mbaetɨta neotɨ reta ïru mburuvicha guasu reta rami,

echa opa rerokomegua ndeɨvɨ,

opa reyuka joko pegua reta.

Jeko kavimbae vae reta iñemuña reta

ngaraa yogüɨreko avei.

21Peyupavo peyuka vaerä taɨgüe reta,

tu reta oyapo ikavimbae vae jeko pegua,

agüɨye vaerä oyemombae reta kuae ɨvɨ re,

ani omotɨnɨe reta kuae ɨvɨ tëta guasu reta pe.”

22YandeYa Imbaepuere yae ete vae jei:

“Apüata ikotɨ reta,

opata amboai Babilonia jee,

jare joko pe jembɨregüe reta,

taɨ reve reve jare jɨmɨmino reve reve.

23Mɨmba küi jee vae oiko vaeräño ikavita,

ɨvɨ yasuru vaerä,

opata atupei, tupeicha kañɨtei pegua pe.”

YandeYa Imbaepuere yae ete vae ko jökorai jei.

Tëtaguasu Asiria opata oyemboai

24YandeYa Imbaepuere yae ete vae jei jee re aeño:

“Añetete, che ayemongeta rami oyeapota;

ayemongeta oyeapo vaerä vae oyembopota ko.

25Asiriaɨgua

jókuae oiporarauka yepi ndeve vae iporookuai opa chugüi jeko pegua,

echa moichɨ güi oëta moitini,

ani mboi oveve vae.

30Paraveteasɨ yae vae reta oyeangarekota,

jare mbaetɨ mbaembae güɨnoi vae reta

yogüɨreko pɨagüiveta.

Ërei, che amboovarurukata ndembae vae reta,

mbovɨ yae jembɨre ndeve vae ave ayukata.

31¡Neräse tëta guasu jöke,

pesapúkai, tëta guasu reta Filistea pegua!

Echa ɨvɨtuguasu kotɨ güi outa tätati rami sundaro reta;

chugüi reta mbaetɨta metei ave ipɨtu vae.

32¿Mbae pa yaeta jokotɨ güi ñee jerúa reta pe?

Echa kërai, yandeYa omomɨ̈rata ma Sión,

jare jae imbae vae reta matɨ rupi oiporara yogüɨreko vae reta yogüeru yeta joko pe.