JOB 15 - Guarani Bible with DC

Elifaz omboeta Job pe

1Elifaz Temán pegua jei ye:

2Yarakuaa vae mbaetɨ omoë ñee osirivembae,

mbaetɨ oyembotuicha yemongeta oasa ɨvɨtu ramiño vae re.

3Mbaetɨ omoë iñee ikɨ̈reɨ imiari güiño,

mbaetɨ oyeepɨ yemongeta jupimbae pe.

4Ërei nde mbaetɨ ma reipoɨu Tumpa güi,

¡reyerure poi ma Tumpa pe!

5Echa remombeu jupimbae reiko vae,

jare reiporu yarakuaambae vae reta iñee.

6Neñee aeño ko nejäa, mbaetɨ ko che,

nde aeño ko nemiari ndeyé.

7¿Nde räri pa reiko Adán güi?

¿Ani nde räri pa reyeapo ɨvɨtɨ reta ndei oiko mbove?

8¿Reikuaa pa Tumpa oyemongeta oyapo vaerä vae,

ani reyererovia pa ndeño jae yarakuaa katu yae vae?

9¿Oime pa mbae nde reikuaa mbaetɨ ore roikuaa vae,

mbae nunga arakuaa pa renoi, ore mbaetɨ rogüɨnoi vae?

10Iñäkatï vae reta jare okuakuaa yae ma vae reta ko ñogüɨnoi ore ndive,

yarakuaa yae neñemuñagüe reta güi vae.

11¿Mbaetɨ pa jaekavi ndeve Tumpa etei ndembopɨakatu vae,

jare ñee yeaeä rupi jei ndeve vae?

12¿Maera pa reyererajauka ndepɨa jemimbota pe?

¿Maera pa ndearasɨ yae reve remae?

13¿Maera pa ndearasɨ Tumpa kotɨ,

jare rere oipotagüe ñee?

14¿Ikɨambae pa kuimbae Tumpa jóvai,

ipuere pa kuimbae oyembojupi?

15Mase, Tumpa mbaetɨ güɨrovia katu mbatee iaraɨgua reta re ave,

ara reta ave mbaetɨ ikɨambae jesa róvai.

16¡Vɨtei pa kuimbae ikɨa jare jupimbae Tumpa jóvai vae,

yɨmbɨaɨ etei jupimbae re, iɨuve yae vae ɨ oyúe rami!

17Eyeapɨsaka cheré, che taechauka ndeve,

chemiarita ndeve aechagüe re,

18yarakuaa katu vae reta imiari oreve vae,

jae reta oyemboe iñemuñagüe reta güi vae.

19Chupe reta oñemee kuae ɨvɨ,

jae reta ndive mbaetɨ oyea ketɨgua reta.

20Kuimbae iyoa vae jare ipɨarai vae,

oiporara yae, jare mbaetɨ ɨma oiko.

21Oendu jɨapu rami, okɨɨye yae chugüi vae,

jaekavi yaecha ma oï yave, imonda vae reta opüa jese.

22Ojoyepe rapeä susere güi,

¡oñemiä etei oï kɨsepuku güi!

23Oeka tëi oipota rupi mbɨyape jei reve: “¿Ketɨ ra oime oï?”

Oikuaa ko susere okätɨro jese vae.

24Tembiporara guasu ombopɨatɨtɨ,

metei mburuvicha guasu oporepeña ñeraroa pe kia re rami.

25Echa oñemopüa Tumpa kotɨ,

oyembopɨa pochɨ Imbaepuere yae ete vae kotɨ.

26Oporepeña Tumpa re iñäka omopüa reve,

iyeopiaka yandambusu vae ndive.

27Echa oiko kavi ramo oyembopɨa pochɨ.

28Tëta guasu reta oiko pɨpe vae, opata oyemboai,

o reta opɨtata ipombae,

opɨtata tëtagüeräño.

29Mbaetɨta oiko kavi ani ɨma oikokatu oiko,

mbaetɨta vi omoai kerupi imbaembae reta.

30Mbaetɨta ojoyepe mano güi,

tata omotini ɨvɨra jäka rami, iñemuña reta okañɨteita,

Tumpa ipɨ̈túe rupi opata okañɨtei.

31Agüɨye perovia katu oporombotavɨ vae reta,

echa peyembotavɨukaiñota ko.

32Ndei iara oväe mbove jäka opa ipiru,

jare ngaraa ye ma jokɨ.

33Metei uva ndei yagüɨye vae osururu ramita ko,

ɨvɨra olivo jee vae ipotɨ osururu vae ramita ko.

34Iyoa vae reta mbaetɨta iñemuña,

jo ombokavi korepoti oipɨɨ vɨari vae rupi vae,

opata ókai chugüi.

35Ipurúa rami ikavimbae pe, jare omoë jupimbae,

omee ia mborombotavɨ pegua.