2 CRÓNICAS 34 - Guarani Bible with DC

Josías oiko mburuvicha guasurä Judá pe(2 R 22.1-2)

1JosíasJer 3.6. güɨnoi juri año omboɨpɨ oï mburuvicha guasurä yave, jare oiko mburuvicha guasurä Jerusalén pe treinta y un año.

2Josías oyapo ikavi vae yandeYa jesa róvai, omomoe iñemuñagüe David jeko, opiambae reve chugüi kërai ave yepe.

Josías omaeñono kavi ye(2 R 23.4-20)

3Juri año ma oiko mburuvicha guasurä yave, jare taɨrusu yae vɨteri reve, Josías omboɨpɨ oeka iñemuñagüe David iTumpa. Jare doce año ma oiko mburuvicha guasurä yave omboɨpɨ oitɨouka Judá jare Jerusalén, opa omboai chugüi mbaemboete renda ɨvɨtɨ rupigua reta, Asera iä reta, tumpa-raanga reta, jare mbae iä reta oyemondɨkui oyeapo vae,

4jare opa oyemboai jae jóvai opaete mɨmba oyeyuka oyeapɨ jese Baal pe vae reta.2 R 21.3; 2 Cr 33.3. Opa vi oyokauka kuaraɨ iä reta mɨmba oyeyuka oyeapɨ jese vae güi ɨvate oï jare Asera iä reta jare mbae iä reta oyemondɨkui oyeapo vae; opa omongúi, jare opa omoai jókuae mɨmba oyuka omee chupe vae reta jɨvɨa re.

5Oapɨ vi sacerdote reta ikägüegüe, mɨmba oyeyuka oyeapɨ jese vae reta re, jae reta imbae re ae,1 R 13.2. jökorai oitɨo Judá jare Jerusalén.

6Jökorai vi oyapo tëta guasu reta Manasés pegua pe, Efraín pe, Simeón pe, ojoi oväe Neftalí pe, jare opaete tëta guasu reta iyɨ́vɨri rupi.

7Omboai mɨmba oyeyuka oyeapɨ jese vae reta, Asera iä reta jare tumpa-raanga reta, opaetei omongúi regua, jare omboai opaete ikäti kavi vae incienso oyeapɨ jese vae reta opaete ɨvɨ Israel pe yave. Javoi oyerova ye Jerusalén kotɨ.

Tembikuatía mborookuai regua oñeväe(2 R 22.3—23.3)

8Jare dieciocho año ma oiko mburuvicha guasurä yave, opa güire oitɨo ɨvɨ jare tupao, omondo Safán, Azalía taɨ, Maasías, tëta guasu juvicha jare mburuvicha Joa, Joacaz taɨ oñono kavi reta vaerä iYa Tumpa jo.

9Jayave kuae reta yogüɨraja sacerdote tenondegua Hilcías pɨri jare omee reta chupe korepoti Tumpa jo peguarä oyereraja vae, levita reta öke iyangarekoa reta oipɨɨ Manasés jare Efraín pegua reta güeru vae jare opaete Israel pe jembɨregüe reta güerugüe güi vae, opaete Judá jare Benjamín güi jare Jerusalén pegua reta güerugüe.

10Jare omee reta yandeYa jo pe mbaravɨkɨ oyapouka vae reta ipo pe, kuae reta omee mbaravɨkɨ oyapo yandeYa jo pe vae reta pe, oñono kavi reta ye vaerä tupao.

11Omee reta vi korepoti ipoki oparavɨkɨ ɨvɨra pe vae reta pe, omaeopa vae reta pe ogua reta vaerä: Ita oñeopagüe, ɨvɨra oñeopagüe jare ɨvɨra reta oñeopagüe oyepɨasa vaerä o reta oñemopüa yave, Judá pegua mburuvicha guasu reta opa omboai vae.

12Kuae kuimbae reta oyapo iparavɨkɨ jupi rupi kavi; jare iyangarekoa reta jae ko levita Jahat jare Abdías, Merari iñemuña reta, jare Zacarías jare Mesulam, Coat iñemuña reta, oyapouka reta vaerä mbaravɨkɨ; jare levita reta oikatu ombopu jare omoñee tembiporu tairari pegua vae re.

13Kuae reta omae vi ombaevoɨ vae reta re jare opaete mbaravɨkɨ oyapo vae reta re. Amogüe reta jae ko mburuvicha guasu pe ombaekuatía vae, tëta ruvicha jare öke iyangarekoa.

14Jare korepoti oyereru yandeYa jo pe vae oñerenoe ramboeve, sacerdote tenondegua Hilcías oväe chupe tembikuatía yandeYa iporookuai regua, Moisés rupi omee vae.

15Jupiveiño sacerdote tenondegua Hilcías omombeu ombaekuatía vae Safán pe:

“Aväe chupe tembikuatía mborookuai regua yandeYa jo pe.” Hilcías omee tembikuatía Safán pe,

16jare Safán güɨraja mburuvicha guasu pe, jare imiari chupe opaete mbaembae jae oyokuaigüe re, jei:

—Nderembiokuai reta oyapo ñogüɨnoi opaete mbaravɨkɨ reyókuai rami.

17Güɨnoe reta tupao pe korepoti oï vae, jare omee reta mbaravɨkɨ re oyangareko vae reta pe jare mbaravɨkɨ iyapoa reta pe.

18Jaeramiño vi ombaekuatía vae Safán omombeu mburuvicha guasu pe jei: “Sacerdote Hilcías omee cheve metei tembikuatía.” Jare Safán omongeta mburuvicha guasu jóvai.

19Jare mburuvicha guasu oendu yave jókuae tembikuatía mborookuai regua, omondoro jemimonde ipɨatɨtɨ güi,

20jupiveiño mburuvicha guasu oyókuai sacerdote Hilcías, jare Ahicam, Safán taɨ, jare Abdón, Micaías taɨ, jare ombaekuatía vae Safán, jare Asaías mburuvicha guasu iyɨvɨrigua, jei chupe reta:

21—Pekua peparandu yandeYa pe cheré, jare Israel pe jare Judá pe jembɨregüe reta re, kuae tembikuatía pe ñee reta oñeväe vae regua; echa yandeYa iyarasɨ yae ko aipo yandekotɨ, echa ñaneñemuñagüe reta mbaetɨ oipota oendu kuae yandeYa iñee reta, mbaetɨ vi oyapo reta opaete kuae tembikuatía pe oyekuatía oï vae.

22Jayave Hilcías jare mburuvicha guasu oiparavo omondo vae reta yogüɨraja ñeemombeúa kuña Hulda, Salum jembireko pɨri; Salum jae ko Ticva taɨ, Harhas jɨmɨmino, temimonde reta iñovatúa. Hulda oiko tëta guasu Jerusalén jembeɨ kotɨ, jare omomiari reta yave,

23jae jei chupe reta:

—Körai jei yandeYa Israel iTumpa: “Pere jókuae kuimbae pembou oparandu cheve vae pe:

24Körai jei yandeYa: ‘Che aruta kuae tëta re jare yogüɨreko pɨpe vae reta re opaete ikavimbae, kuae tembikuatía pe oyekuatía oï vae reta, mburuvicha guasu Judá pegua jóvai omongeta reta vae.

25Echa chereeya reta jare oapɨ reta ikäti kavi vae incienso tumpa ambuae reta pe, chemboarasɨuka reta opaete oyapogüe reta rupi; jáeramo chearasɨ opüa kuae tëta reta kotɨ jare mbaetɨta chearasɨ poi.’

26Ërei ngatu pere jókuae mburuvicha guasu Judá pegua pe, pembou peparandu vaerä cheve vae pe: Körai jei yandeYa Israel iTumpa: ‘Tembikuatía pegua ñee reta reendu jeko pegua,

27echa reyembopɨatɨtɨ jare reñemomichi cheróvai reendu ramboeve kuae tëta re jare pɨpegua reta kotɨ jae vae, nde remondoro nderemimonde ndepɨatɨtɨ güi jare reyaeo ramo cheróvai, che aendu vi ndeve. Jökorai jae che peYa.

28Jáeramo remanota mbɨakatu rupi, jare rogüɨrajaukata neñemuñagüe reta ñogüɨnoia pe, mbaetɨta reecha opaete ikavimbae che aruta kuae tëta re vae jare pɨpegua reta re vae.’ ”

Javoi mburuvicha guasu jemimondo reta oyerova ye imiari reta vaerä mburuvicha guasu pe.

29Jayave mburuvicha guasu omboatɨuka opaete tenondegua reta Judá pegua jare Jerusalén pegua.

30Javoi mburuvicha guasu ojo yandeYa jo kotɨ opaete kuimbae Judá pegua reta ndive, jare Jerusalén pegua reta ndive, sacerdote reta, levita reta, opaetei joko pegua reta ndive, michi vae güive jare opaete okuakuaa vae reta. Joko pe mburuvicha guasu omongeta opaete jókuae tembikuatía morogüɨrökuavee päve pegua pe oyekuatía oï vae, yandeYa jo pe oñeväe vae.

31Javoi mburuvicha guasu opüa oyemboɨ okɨta iyɨpɨ pe oyapo morogüɨrökuavee päve yandeYa jóvai, oiko vaerä jae jeia re, oyapo vaerä iporookuai reta jupi rupi kavi opaete ipɨa ndive, opaete jekove ndive, oyapo vaerä opaete ñee reta morogüɨrökuavee päve pegua pe, oyekuatía oï jókuae tembikuatía pe vae.

32Javoi jei opaete Jerusalén pegua reta pe jare Benjamín pegua reta joko pe ñogüɨnoi vae pe, oyapo vaerä opaete kuae mborookuai. Jare Jerusalén pegua reta oyapo Tumpa iporogüɨrökuavee päve oyekuatía oï rami, iñemuñagüe reta iTumpa.

33Josías omboai opaete Israel iñemuña reta ñogüɨnoia rupi ikavimbae yae oyeapo vae reta, jare jei opaete Israel pe ñogüɨnoi vae reta pe omboete vaerä yandeYa Tumpa. Jare jae oikove oiko ramboeve mbaetɨ osɨrɨ reta yandeYa, iñemuñagüe reta iTumpa güi.