EZEQUIEL 31 - Guarani Bible with DC

Faraón oyembojaanga metei ɨ̈vɨrare re

1Oncea año pe, mboapɨa yasɨ re, tenondegua araa pe yandeYa jei cheve:

2“Nde kuimbae, ere Faraón mburuvicha guasu Egipto pegua pe, jare jëtaɨgua reta pe:

‘¿Mbae re ra oyembojaangata ndembaepuere?

3Nde ko, ɨ̈vɨrare Líbano pegua rami,

jäka reta ipöra jare tëɨ yae,

jäka ɨvateasɨ yae.

4Ama jare ɨ reta ombokuakuaa,

iyɨ́vɨri rupi oguata ɨ reta;

jare opaete ɨvɨra reta omboɨu.

5Jeta yae ɨ güɨnoi ramo,

ɨvate yae okuakuaa ïru ɨvɨra reta güi,

jäka reta oyembojeta,

jare matɨ oñemoai.

6Oipotagüe güɨra reta

oyapo jaitɨrä jäka reta re.

Oipotagüe mɨmba reta ñana rupigua

oa imembɨ iküaraɨa igüɨ rupi.

Iküaraɨa igüɨ pe yogüɨreko jeta tëtaguasu reta.

7Tuicha yae oyeapo kuae ɨvɨra,

ipöra jare jäka reta puku yae,

echa japo reta ñogüɨnoi ɨ jembeɨ pe.

8Metei ave ɨ̈vɨrare Tumpa iko raɨ pegua

mbaetɨ ipuere omboyovake,

metei ave ɨvɨra pino jee vae

ani castaño jee vae,

mbaetɨ omboyovake jäka,

metei ave ɨvɨra reta Tumpa iko raɨ pegua,

mbaetɨ omboyovake ipöra pe.

9Jeta jäka vae pe, amopöra yae ayapo,

jare opaete ɨvɨra reta Edén pe, Tumpa iko raɨ pegua omotareɨ.’

10Jáeramo, yandeYa Tumpa jei körai: Jókuae ɨvɨra ɨvate yae oyeapo vae, oupitɨ amapɨtu vae jeko pegua, ipɨa pe oyembotuicha yae.

11Che ameeta ketɨgua tëtaguasu pegua reta juvicha imbaepuere yae vae ipo pe, jae oiporaraukata chupe jeko pɨ̈chɨi oï rupi, echa che ko aröɨro.

12Ketɨgua ipɨa-pïrimbae yae vae reta oyasɨata jare omombota oeya; jäka reta oata ɨvɨtɨ reta re jare ɨvɨtɨ päu ipe kavi vae reta re, ɨ̈aka raɨ reta re jare opaete tëta reta iküaraɨa rupi ñogüɨnoi vae, opata yogüɨraja.

13Jókuae ɨvɨra oagüe re oipotagüe güɨra reta yogüeruta oñemoëta, jare jäkagüe reta re oipotagüe mɨmba reta ñana rupigua opɨ̈rota.

14Agüɨye vaerä ma metei ave ɨvɨra reta oyembotuicha iyé ɨ iyɨ́vɨri ñogüɨnoi vae reta, ani oyemboɨvate yae, ani oyembotuicha ɨvate yae jeko pegua. Echa opaete vae omano vaerä ko, ojo retata ko ɨvɨgüɨ pe, omanogüe reta ñogüɨnoia pe.

15Che peYa Tumpa jae körai: Jókuae ara ojo yave omanogüe reta ñogüɨnoia pe, ambopɨatɨtɨukata ɨguasu, opata otini; ɨ̈aka raɨ reta opata otini; ɨvɨtɨ Líbano ipɨatɨtɨta, opaete ɨvɨra reta yɨpita.

16Che amondo yave oyea omanogüe vae reta ndive, jɨapu oa ojo vae pe omokanata tëtaguasu reta. Jare jókuae ɨvɨgüɨ pe ipɨakatuta ɨvɨra reta Edén pegua ipöra yae vae jare oɨu kavi yae vae ɨvɨtɨ Líbano pegua reta.

17Omanogüe reta ñogüɨnoi pe yogüɨrajata vi jae ndive, ñeraro pe omano vae reta, ipɨ̈rata jese vae reta, jae jembiangareko reta tëtaguasu reta rupi.

18Metei ave ɨvɨra reta Edén pegua mbaetɨ ipuere oyemboyovake jae ndive, ipöra vae pe jare ɨvate vae pe; ërei ngatu ɨvɨra reta Edén pegua ndive oyeitɨukata ɨvɨgüɨ pe, Tumpa re güɨroviambae reta jare ñeraro pe omanogüe vae reta pɨri.

‘Jókuae ɨvɨra jae ko Faraón jare opaete jëtaɨgua reta. Che peYa Tumpa jae kuae.’ ”