2 MACABEOS 12 - Guarani Bible with DC

Judas opüa iɨvɨ iyɨvɨrigua reta re

1Opa ma yave kuae yemongeta reta oyeapo, Lisias oyerova ye mburuvicha guasu kotɨ, jare judío reta omboɨpɨ oparavɨkɨ iko ñavo rupi.

2Ërei amogüe sundaro ruvicha reta, Timoteo, Apolonio, Geneo taɨ, Jerónimo jare Demofón, jaeramiño vi Nicanor, jae ko sundaroäpɨta Chipre pegua juvicha, mbaetɨ omaeño yogüɨreko pɨagüive judío reta.

3Jaeramiño vi, tëta guasu Jope pegua reta oporoyuka mbatee jei vae. Oparea reta judío reta joko pe oiko vae reta pe, oyeupi vaerä jembireko reve reve jare opaete imichia reta reve barco reta jae reta güeru jokoropi köiño oñono vae rupi, emaenoko mbaetɨ oñomotareɨ yogüɨreko rami,

4ërei oyapo reta yepe jókuae tëta ipo reta jökorai oyemongeta ramo. Jare judío reta, oipota yogüɨreko kavi avei jeko pegua mbaetɨ mbae oyemongeta reta, jare ikɨ̈reɨ voi reta; ërei opa ma oë yogüɨraja ɨguasu tɨpɨa pe yave. Jopeɨgua reta opa omosakapɨmiuka chupe reta barco. Jare oupitɨ ko dosciento rupi opa omano vae.

5Judas oikuaa yave jasɨ katu yae omano jëtara reta, omombarandu jupiegua reta,

6jare oyerure reve Tumpa jupi vae pe, oguata reta jëtara reta iyukaa kotɨ. Pɨ̈tu reve oyatapɨ reta barco reta jenda re jare oyuka opaete joko pe oñepɨ̈ro oï vae reta.

7Ërei jókuae tëta guasu jöke oyeokenda oï ramo ojo ye, oyemongeta ou ye vaerä pɨare katu yave opaetei oyuka Jope pegua reta.

8Ërei oikuaa reta yave tëta Jabnia pegua reta ikɨ̈reɨ jökorai vi oyapo judío reta joko pe yogüɨreko vae,

9pɨare yave opüa tëta guasu re jare opa oapɨ reta barco reta, jare tataendɨ guasu oyekuaa ko Jerusalén güi, jókuae ko cuarenta y tres kilómetro oï joko güi.

Ñoraro Galaad pe(1 Mac 5.9-68)

10Judas jare isundaro reta opa osɨrɨ joko güi okua vaerä Timoteo, oporepeña jese cinco mil árabe ɨvɨ rupigua jare quiniento kavayu regua reta.

11Joko pe oï ñoraro tuichagüe vae, ërei Judas isundaro reta Tumpa iporomborɨ rupi, oporomoamɨri. Árabe reta, iñamɨri ma yave, oiporu Judas pe iñɨ̈ro vaerä oyoupe, jare oñererökuavee reta omee vaerä mɨmba judío reta pe jare omborɨ vaerä oipotagüe pe.

12Judas, oecha árabe reta omborɨ jeta pe ramo ikɨ̈reɨ chupe reta. Opa ma oyapo reta yemongeta yave, opa ye yogüɨraja jeyupa pe.

13Judas oporepeña vi iyarasɨ reve Caspín re, jae ko tëta guasu jëguambae; oyere jese oguambɨ guasu, jare jeta ïru tëtaguasu kotɨgua reta yogüɨreko pɨpe.

14Jókuae tëta guasu pegua reta oyerovia joguambɨ guasu re jare jeta tembíu güɨnoi reta joko pe vae re ramo, oyembopɨa yemboete reta Judas jare isundaro reta kotɨ; oikura reta jare oyangao reta Tumpa, jei reta jeta mbaembae yavaetegüe ikotɨ.

15Judas jare isundaro reta oyerure Tumpa tuicha yae opaete ɨvɨ jare ara re vae pe, echa kërai jae opa omboai Jericó mbaetɨ reve oiporu mbae nunga tembiporu ñeraro pegua ave Josué oiko yave vae, jare kërai oporepeña reta tätagüe jókuae tëta guasu joguambɨ re.

16Tumpa oñono reta ipo pe jókuae tëta, echa oporoyuka mbatee pɨpe reta, jëta-ɨpɨ pegua ɨrɨru guasu reta tresciento metro ipɨgüe vae, tɨnɨe opɨta tugüɨ.

17Ciento treinta y cinco kilómetro kutɨ, oväe reta tëta Cárax pe, joko pe yogüɨreko judío, tubiano jee vae reta.

18Mbaetɨ oväe chupe reta Timoteo, echa ojo jo güi mbaetɨ ramo oväe ipɨapotaa; ërei oeya jetagüe joko pe sundaro reta.

19Jayave Dositeo jare Sosípatro, Macabeo isundaro reta, oguata tovaicho reta kotɨ jare opaetei oyuka Timoteo ikuimbae reta oeya joko pe vae, opaete reve diez mil rupi.

20Macabeo, opa omboyao yao isundaro reta, opa oñono juvicharä jare oporepeña Timoteo re, jae ko güɨnoi ciento veinte mil sundaro ɨvɨ rupigua jare dos mil quiniento kavayu regua reta.

21Timoteo pe jërakua yave Judas ou ikotɨ vae, omondo kuña jare michia reta räri jaeramiño vi voɨta reta tëta Carnáin jee vae kotɨ, kuae tëta jae ko ñepɨ̈roa kavi yae jare yavai yaike vaerä pɨpe vae, echa tape reta ipɨmii yae.

22Judas isundaro reta oväemí ma yogüɨraja yave, tovaicho reta oyaporai kɨɨye, echa Tumpa, mbaetɨ jesa güi kia oñemi vae, oyeechauka chupe reta. Opa otekuarai reta jare oyoupii omboɨpɨ oyoasɨa jare oyoyuka reta.

23Judas jei ete oaɨkuemoña reta jare opa oyuka kɨse pe treinta mil rupi jókuae iporoyukase vae reta.

24Timoteo ave oa Dositeo jare Sosípatro isundaro reta ipo pe; ërei ipɨarakuaa iyeupe jare oiporu oyora reta vaerä, echa jae oime güɨnoi tembipɨɨrä jovaicho reta tu jare jëtara reta, mbae oasa chupe yave jaema etei jae reta omano vaerä ñogüɨnoi.

25Jökorai, ɨma katu oyoaka reta agüɨye vaerä oyuka jókuae judío reta, ojo Timoteo oporomokɨ̈reɨ, jare oyora reta agüɨye vaerä mbae oasa jëtara reta pe.

26Joko güi Judas ojo Carnáin kotɨ jare tumpa Atargatis itupao kotɨ, joko pe oñaseokɨ̈ti veinticinco mil rupi kuimbae reta.

27Oporomoamɨri ma jare opa ma yave oporoyuka, oguata Efrón kotɨ, tëta oñemomɨ̈rata kavi yae oï vae, joko pe oiko Lisias jare ïru tëta kotɨgua reta. Ipɨ̈rata vae taɨrusu reta ñogüɨnoi oguambɨ guasu jóvai, jae reta yavaete katu oñoraro oepɨ vaerä, jare japɨpe pe güɨnoi reta jeta tembiporu ñoraro pegua.

28Ërei, opa ma oyerure reta yave Tumpa pe, jae imbaepuere rupi omoamɨri reta jovaicho, judío reta oike jókuae tëta pe jare oyuka veinticinco mil rupi pɨpegua reta.

29Joko güi omboɨpɨ oguata reta Escitópolis kotɨ, ciento ocho kilómetro Jerusalén güi.

30Ërei judío joko pegua reta oepɨ Escitópolis-ɨgua reta, echa jae reta ipɨakatu oyoe jare oyomborɨ vi tekoavai reta pe.

31Judas jare isundaro reta omee yasoropai jare oeya ñee chupe reta jekuae avei yogüɨreko kavi vaerä judío reta ndive. Yogüeru oväe reta Jerusalén pe oyearo ma semana reta iyaretea pe.

32Arete oasa ma yave, oguata reta Gorgias kotɨ, sundaro ruvicha Idumea pegua.

33Jae oövaiti reta tres mil sundaro ɨvɨ rupigua jare cuatrociento kavayu regua reta ndive.

34Oa oyoe reta ñoraro pe yave, omano mbovɨ katu judío reta.

35Jayave Dositeo, kavayu regua jäta ngatugüe vae, jae ko judío tubiano jei vae, oipɨɨ Gorgias jemimonde pe jare omboɨpɨ ombotɨrɨrɨ täta rupi, ikɨ̈reɨ tëi güɨraja jekove reve; ërei metei kavayu regua Tracia pegua oepeña Dositeo jare oyasɨa chugüi iyɨva, jökorai Gorgias osɨi tëta Maresa kotɨ.

36Azarías isundaro reta, ɨma yae ma oñoraro yogüɨreko ramo opa ma ikangɨ. Jayave Judas oiporu yandeYa pe omborɨ vaerä ñoraro pe.

37Omboɨpɨ oyemongoi reta iñee pe, ojäa reta sapúkai ñoraro pegua jare, oa güɨramoi peguaño Gorgias isundaro reta re, kuae reta opa otekuarai.

38Judas omboatɨ isundaro reta jare ojo tëta Adulam kotɨ. Oyearo ma chiúa ara yave, oyekɨayoe reta jare omboete ara mbutuu.

39Pɨareve pe jaɨai voiño, Judas isundaro reta ndive opa yogüɨraja oupi japicha reta jëogüe ñoraro pe oagüe, oñotɨ vaerä jëtara reta jɨvɨa oïa pe.

40Ërei tëogüe reta jemimonde ñavo oväe reta chupe reta tumpa raanga Jabnia pegua imbaembae reta, mborookuai guasu oyopia chugüi reta vae. Jayave ramo oikuaa reta maera ko omano reta vae.

41Jayave opaete reve omboete reta yandeYa, jupi vae jare mbaetɨ kia jesa güi oñemi vae,

42jare oyerure reta Tumpa pe iñɨ̈ro vaerä opaete iyoa re. Judas jayave oiporu opaete vae pe oiko vaerä ikɨambae, echa oecha katu reta ma iyoa jeko pegua ko jae reta omano.

43Jayave omboatɨ dos mil korepoti jare omondo Jerusalén kotɨ, oyeapo vaerä mbaeyuka mbaeyoa re. Oyapo ikavi vae jare jupi vae, echa opaete ko oikove yeta kuri.

44Jare mbaetɨ yave mona güɨrovia sundaro reta oikove yeta vae re, ngaraa tëi oyerure jese reta.

45Ërei jae oikuaa katu, kia omano yave ipɨakatu reve oimeta mbaeyekou güɨnoi. Jae maraëɨ vae iyapoa jare ipɨakatu ramo, jáeramo oyapouka mɨmbayuka omanogüe reta re, Tumpa iñɨ̈ro vaerä chupe reta.