NÚMEROS 32 - Guarani Bible with DC

Rubén jare Gad iñemuña reta oñemoëta ɨ̈aka Jordán güi kuaraɨ oëa kotɨ(Dt 3.12-22)

1Rubén jare Gad iñemuña reta güɨnoi jeta yae mɨmba; oecha reta ɨvɨ Jazer jare Galaad, ikavi yae chupe reta mɨmba peguarä.

2Yogüeru omomiari Moisés, jare sacerdote Eleazar jare opaete vae juvicha reta, jei reta:

3—Ɨvɨ Atarot, Dibón, Jazer, Nimra, Hesbón, Eleale, Sebam, Nebo jare Beón,

4jókuae ɨvɨ yandeYa opɨ̈ro Israel iñemuña reta peguarä vae, ikavi mɨmba reta peguarä, jare ore oime mɨmba rogüɨreko.

5Jáeramo, ndepɨakatu ko remae oreré yave, toñemee oreɨvɨrä kuae ɨvɨ, agüɨye orereroasa kuae ɨ̈aka Jordán.

6Ërei Moisés jei Rubén jare Gad iñemuña reta pe:

—¿Peipota pa pepɨta kuae pe, perëtara reta yogüɨraja ramboeve ñeraro pe?

7¿Maera pa peipota pemoäteɨ Israel iñemuña reta, agüɨye vaerä oasa yandeYa omee ɨvɨ chupe reta vae pe?

8Körai etei ko peru reta oyapo, Cades-barnea güi ambou reta yave omae ɨvɨ re.

9Opa yogüɨraja oväe Escol pe, jare oecha reta güire ɨvɨ, omoäteɨ reta Israel iñemuña reta, agüɨye vaerä yogüeru reta yandeYa omee ɨvɨ chupeNm 13.17-33. reta vae pe.

10Jáeramo ko yandeYa iyarasɨ ikotɨ reta, jare jei jee re,

11opaete Egipto güi ñogüɨnoe yave, veinte año vae güi kutɨ ngaraa oike reta ɨvɨ güɨrökuavee jee re Abraham, Isaac jare Jacob pe vae pe, mbaetɨ yogüɨreko jupi rupi jeko pegua.

12Jaeño Caleb, cenezeo Jefone taɨ, jare Josué, Nun taɨ, yogüɨreko jupi rupi yandeYa jupíe.

13Jare yandeYa iyarasɨ Israel iñemuña reta kotɨ, jáeramo omboguatauka ñuu rupi cuarenta año, opa regua jókuae jekoNm 14.26-35. pɨ̈chɨi vae reta omano yandeYa jóvai.

14Jare añave pe reta imbaeyoa vae iñemuña reta, pemomoe peru reta jeko, pemoïru vaerä yandeYa iyarasɨ Israel iñemuña reta kotɨ.

15Pe reta pepia Tumpa güi yave, jae pereeyata vi ɨma ñuu pe, jare opata pemboaiuka kuae tëta.

16Jayave oya reta Moisés re jare jei reta chupe:

—Royapota orerɨmba reta jokairä kuae pe, jare oremichia reta jëtarä.

17Javoi ore royupavota tembiporu ñeraro pegua ndive rojo vaerä Israel iñemuña reta jenonde; rogüɨraja regua rogüɨroike jae reta yogüɨrekotaa pe; oremichia reta ñogüɨnoi ramboeve tëta reta oñekëse kavía pe, kuae ɨvɨ pegua reta güi.

18Ngaraa royerova ye orero kotɨ Israel iñemuña reta güɨnoi regua metei ñavo iɨvɨ ae.

19Echa ngaraa roipɨɨ oreyeupe ɨvɨ jae reta ndive, Jordán jovaicho kotɨ, echa ore oimeta ma rogüɨnoi oreɨvɨ ae kuae kotɨ, Jordán jovaicho pe, kuaraɨ oëa kotɨ.

20Jayave Moisés jei chupe reta:

—Jökoraita ko yave, peota ko yandeYa jenonde ñeraro pe yave,

21opaete pe reta peasa perembiporu ñeraro pegua reve reve yandeYa jenonde yave, jae opa regua güɨnoe omombo jovaicho reta iyeugüi,

22kuae ɨvɨ oñepɨ̈ro ma yandeYa jóvai yave, pepuere peyerova, mbaetɨta pepɨta teko pe yandeYa jóvai jare Israel iñemuña reta jóvai. Jare kuae ɨvɨ topɨta pembaerä yandeYa jóvai.

23Ërei ngatu mbaetɨta ko jökorai peyapo yave, peyoa ko yandeYa kotɨ; jare agüɨye peakañɨ metei ara peiporarata ko peyoa re vae.

24Pemopüa tëta guasu reta pemichia reta peguarä, jare pevecha reta jokairä; ërei pembopo peñee.

25Jare Rubén jare Gad iñemuña reta jei Moisés pe:

—Ore nderembiokuai reta, royapota ko nde rere rami.

26Oremichia reta, orerembireko reta, jare opaete orerɨmba opɨtata ko kuae tëta guasu reta Galaad pegua peño,

27jare ore nderembiokuai reta orerembiporu ñeraro pegua reve reve rojota yandeYa jenonde ñeraro pe, nde oreya oreokuai rami.

28Jayave Moisés jei sacerdote Eleazar jare Josué, Nun taɨ, jare opaete Israel iñemuña juvicha reta pe:

29—Opaete Rubén jare Gad iñemuña reta oasa yave pe reta ndive Jordán, jembiporu reve reve oñeraro reta vaerä yandeYa jenonde, jókuae ɨvɨ opa ma pepɨ̈ro yave, pe reta pemee jae reta imbaerä ɨvɨ Galaad.

30Ërei mbaetɨ oasa reta pe ndive yave, oñemeeta chupe reta iɨvɨrä pepɨte pe ɨvɨ Canaán pe.

31Jare Rubén jare Gad iñemuña reta jei:

—Toroyapo yandeYa jei oreve rami.

32Toroasa orerembiporu ñeraro pegua reve reve yandeYa jenonde ɨvɨ Canaán kotɨ, jare topɨta orembaeräJos 1.12-15. kuae ɨvɨ oï ɨ̈aka Jordán jovaicho pe vae.

33Jökorai Moisés omee Gad iñemuña reta pe, Rubén iñemuña reta pe jare Manasés iñemuña reta oyemboyaogüe vae pe Sehón amorreo reta juvicha guasu iɨvɨ, jare Og mburuvicha guasu Basán pegua iɨvɨ, opaete tëta reta jare ko reta iyɨvɨrigua ndive.

34Gad iñemuña reta omopüa pɨau ye tëta guasu Dibón, Atarot, Aroer,

35Atarot-sofán, Jazer, Jogbeha,

36Bet-nimra jare Bet-arán, tëta reta oñekëse kavigüe; oyapo reta vi ivecha reta jokairä.

37Jare Rubén iñemuña reta omopüa pɨau ye tëta guasu Hesbón, Eleale, Quiriataim,

38Nebo, Baal-meón (jee reta oyepoepɨgüe) jare Sibma, oipoepɨ reve amogüe tëta guasu jee, jae reta omopüa pɨau ye vae.

39Maquir, Manasés taɨ iñemuña reta yogüɨraja Galaad kotɨ jare opɨ̈ro reta, jare opa omoë omombo amorreo reta joko pe yogüɨreko vae.

40Jare Moisés omee Maquir, Manasés taɨ iñemuña reta pe ɨvɨ Galaad, jare yogüɨreko pɨpe.

41Jare Jair, Manasés iñemuña pegua opɨ̈ro vi mbovɨ teyupa reta, jare ombojee Havot-jair pe.

42Jaeramiño vi Noba ojo opɨ̈ro tëta Kenat jare tëta raɨ reta iyɨvɨrigua reta; jare ombojee Noba, jae jee pe aeño.