1Sacerdote ruvicharä oiko yave Onías, tëta guasu maraëɨ Jerusalén oikose yepi vɨakatu rupi, jare mborookuai reta jeigüe opaete oyeapo, echa kuae mbɨa jae ko jeko kavi yae vae, echa omotareɨ teko pɨ̈chɨi reta.
2Mburuvicha reta etei ombaemboete mbaemboetea renda pe, jare jökorai ombotuicha reta tupao mbota ikavi vae rupi.
3Seleuco ave, jaeko mburuvicha guasu Asia pegua, omee korepoti mbaeyuka jepɨrä.
4Ërei metei mbɨa Simón jee vae, sacerdoterä oiko yave Bilga pe jare oyangareko yave oiko tupao re, iyarasɨ sacerdote ruvicha Onías kotɨ, oyangareko ramo oiko maemeerenda tëta guasu pegua re ramo.
5Oecha ramo mbaetɨ mbae ipuere oyapo Onías kotɨ, ojo imiari Apolonio Tarso pegua ndive, jókuae ara rupi oikose yave sundaro ruvicharä Celesiria jare Fenicia pe,
6chupe imiari tupao Jerusalén pegua oiko katu yae vae re, korepoti joko pe oñeñovatu oï vae opa rapeä ma oyepapa vae re, echa ko mbaeyuka reta jepɨrägüe oasa yé ma, jáeramo ikavi ko mburuvicha guasu oyemboiya jese, jei chupe.
7Apolonio ojo imiari mburuvicha guasu re jókuae mbaeyekou tupao pegua re. Jayave mburuvicha guasu ombojee Heliodoro, jae ko mburuvicha guasu iyɨvɨrigua, oyemboiya vaerä jókuae mbaeyekou reta re.
8Jaema voi etei Heliodoro oguata jokotɨ, ombojee jaanga opou vaerä Celesiria jare Fenicia rupi, ërei ngatu jae ko ojo oyapo mburuvicha guasu oyókuai vae.
9Oväe ma yave Jerusalén pe, sacerdote ruvicha jare jokuaeɨgua reta oë jape pe ipɨakatu reve, jare omombeu chupe reta miari oendu tupao imbaeyekou regua re, jare mbae ko ou oeka vae, jayave, oparandu chupe reta añete ra jókuae.
10Imemano vae reta jare tɨ̈reɨ reta pegua ko oyemboatɨ jókuae korepoti, jei chupe sacerdote ruvicha,
11joko pe oime vi oï Hircano imbae, jae ko Tobías taɨ, joko pegua tuvicha vi. Körai, ipɨapochɨ vae Simón tuicha iyapu. Omombeu vi chupe opaete reve korepoti oï vae jae ko trece mil dosciento kilo jare seis mil seisciento kilo oro,
12ngaraaí ko kia oyapo jupimbae vae jókuae tëta maraëɨ re iporogüɨrovia vae kotɨ, echa kuae tupao jae ko mbaemboetea renda opaete ɨvɨ rupi omboete vae.
13Ërei Heliodoro, mburuvicha guasu oyókuai rami, oipotañoi güɨraja korepoti mburuvicha reta imbaeyekourä.
14Ara jae ombojeea pe, oike tupao pe oipota jókuae mbaeyekou reta, opaetei tëta ko ipɨatɨtɨ jókuae ara.
15Sacerdote reta jemimonde reve, oyetavatɨka oyerure Tumpa pe mɨmba oyeyuka oyeapɨ jese vae jóvai, echa jae ko omee mborookuai korepoti oñeñovatu vaerä, oyerure reta vi agüɨye vaerä kia oñátai jókuae mbaeyekou.
16Sacerdote ruvicha ipɨakañɨ omae ïru reta, echa jovaiyu yeti oyekuaa oasa ete ipɨatɨtɨ ramo,
17jare oasa ete okɨɨye ipɨa pe ramo tuicha yae oiporara.
18Jeta vae reta opa tɨnɨe oka rupi oyerure vaerä metei rami tupao re, agüɨye vaerä oa ñemomarai pe.
19Kuña reta oyemonde temimonde jüu vae pe jare ipɨtía oipea reve guata reta okavɨte rupi. Kuñatai reta oñeñovatu yogüɨreko vae, opa ñogüɨnoe ikatu rupi jare amogüe reta oyeupi ɨvate omae vɨari vaerä,
20jare opaete vae ipo oupi ara kotɨreve, oupi reta iyerure.
21Jasɨ katu ñamae jese reta yave, echa opaete vae oï itava re, jare sacerdote ruvicha reta ipɨandeko yeyé oyapo, tuicha ombopɨatɨtɨ.
22Yerure omboɨvate güɨnoi meme yandeYa imbaepuere vae pe agüɨye vaerä oñátai iya reta güi mbaerɨru reta tupao pegua.
23Heliodoro omboɨpɨ oyapo tenonde ma oyemongeta oyapo vaerä vae.
24Ërei nagtu jae jare iñeïru reta ñogüɨnoi ma mbaeyekou jóvai yave, yandeYa tuicha vae jare Espíritu reta iTumpa jare imbaepuere yae vae oyeechauka yavaete katu rupi chupe reta, jáeramo opaete oike japɨpe pe vae reta oiämondo tuicha Tumpa imbaepuere, jare joko peño opaete jete jëogüe reta.
25Echa oyekuaa chupe reta metei kavayu ipöra yae vae, jare opo jese vae yavaete yae, echa kavayu ipɨ jenondegua pe oyapaso paso Heliodoro, jókuae opo jese vae jemimonde oro katuai.
26Oyekuaa vi mókoi taɨrusu reta ipöra yae vae, ipɨ̈rata jare jemimonde kavi yae vae. Oyemboɨ reta Heliodoro iyɨke ñavo pe, jare okaguai mbatee jese reta,
27oyuka rai raiti oñono reta jare opa ogüe Heliodoro güi jesa.
28Jökorai ko oasa Heliodoro ndive, tenonde yave ikuimbae yae oike japicha reta ndive mbaeyekou renda pe vae, añave ko oyevoɨuka ma oë joko güi, echa ko mbaetɨ ipuere oguata, ërei jayave güi güɨrovia reta opɨta Tumpa imbaepuere re.
29Tumpa imbaepuere rupi jókuae mbɨa ogüɨapi ramo, iñeembae opɨta mano ipo pe.
30Judío reta oyapo yasoropai Tumpa pe, echa oechauka iyemboetea mbaemboete renda pe; jare tupao, opa ramo oporomongɨɨye jare oporombojopa vae pe, añave tɨnɨe oï yerovia jare vɨakatu yandeYa imbaepuere rupi.
31Heliodoro ichëi reta osɨi Onías kotɨ omboyerureuka vaerä Tumpa tuicha vae pe, iñɨ̈ro vaerä Heliodoro pe jembiapo re, echa jae omano vaerä ma oï.
32Sacerdote ruvicha oipoɨu ramo mburuvicha guasu omboya jese reta Heliodoro imbaerasɨ, güɨrökuavee mbaeyuka okuera vaerä.
33Güɨrökuavee ramboeve mbaeyuka güɨnoi mɨmba iya re, jókuae taɨrusu reta yeño, tenonde oyemonde rami etei, oyekuaa ye Heliodoro pe, oyemboɨ reta jóvai jare jei chupe: “Emee tuicha yasoropai sacerdote ruvicha Onías pe; echa jae iyerure rupi, yandeYa iñɨ̈ro ndeve reikoveño vaerä.
34Reiporara ma Tumpa iyarasɨ, añave emoërakua jae imbaepuere.” Kuae ñee opa ojäa yave, okañɨ reta ye.
35Heliodoro güɨrökuavee mbaeyuka jare oñererökuavee yeyé Tumpa kotɨ jekove omee ye chupe ramo. Joko güi oyupavo Onías pe jare oyerova ye isundaro reta ndive mburuvicha oïa kotɨ.
36Opaete vae pe imiari Tumpa tuicha vae oyapo ikotɨ vae re, jare jae etei oecha vae re.
37Jayave mburuvicha guasu joko güi oparandu Heliodoro pe, kia ra omondo yeta Jerusalén kotɨ vae, jae jei chupe:
38“Cheruvicha guasu, oime yave nderovaicho ani ramo kia oyemongeta pɨ̈chɨi ndekotɨ, emondo jae jokotɨ, jae re ou yeta ko oväe ndeve ñenupa jaɨkuere katuai, echa joko pe añetete oime Tumpa imbaepuere vae.
39Ara pe oiko vae oyangareko jare oepɨ; kia ojo yave yemongeta pɨ̈chɨi ndive, jae oinupata jare oyukata ombou.”
40Jae kuae miari Heliodoro regua jare tupao imbaeyekou regua.
Who We AreWhat We EelieveWhat We Do
2025 by iamachristian.org,Inc All rights reserved.