LEVÍTICO 26 - Guarani Bible with DC

Mborerekua reta ñeereendu katu regua(Dt 7.12-24; 28.1-14)

1Agüɨye peyapo tumpa-raanga reta pemboete vaerä, agüɨye pemopüa peyeupe mbae iägüe pemboete vaerä, peɨvɨ pe ave agüɨye pemopöra peñopa ita peyetavatɨka jóvai vaerä, echa che ko peYa Tumpa. jare pemboete chero mbaemboetea. Echa che ko peYa Tumpa.

3Peiko yave jare peñovatu pepɨa pe yave, jare peyapo yave cheporookuai reta,

4che ambouta peve ama iara pe kavi, jare ɨvɨ omee kavita mbaagüɨye, jare ɨvɨra reta kaa rupigua ia kavita;

5jare pearɨvogüe oupitɨta uva yagüɨye, jare uva yagüɨyegüe oupitɨ yeta maetɨ iara, jare peuta perembíu perɨ̈vɨata regua, jare peiko kavita pekɨɨyembae reve peɨvɨ pe.Dt 11.13-15.

6Jare che ameeta mbɨakatu peve peɨvɨ pe, jare peke pɨagüiveta, ngaraa oime peiämondo vae; opata aekɨuka peɨvɨ güi mɨmba pochɨ vae reta ñana rupigua, jare ngaraa etei oime ñeraro peɨvɨ pe.

7Pembotekuaraita perovaicho reta, jare opata pemoamɨri;

8pegüi pandepo vae ombotekuaraita cien tovaicho, jare pegüi cien vae ombotekuaraita diez mil tovaicho, jare perovaicho reta opata pemoamɨri.

9Echa che ayerova yeta pekotɨ, jare pombokuakuaata jare pombojetata jare cheporogüɨrökuavee päve amoañeteta pe ndive.

10Jare mbaagüɨye oarasagüe peuta, jare penoeta peñono ikatu pe mbaagüɨye oarasagüe peñovatu vaerä ipɨau vae.

11Jare che aikota pepɨte pe, ngaraa pogüɨröɨro;

12pepɨte rupi aguatata, che aikota peTumparä, jare pe reta peikota chembaerä.2 Co 6.16; Ap 21.3.

13Che ko peYa Tumpa, ɨvɨ Egipto güi perenoe vae, agüɨye vaerä peiko jembiokuai retarä, amondoo peñeapɨtía, jare che pogüɨroata peäka pemopüa reve kavi.

Ñeereendumbae jekovia(Dt 28.15-68)

14Ërei ngatu mbaetɨ yave peendu, jare mbaetɨ yave peyapo kuae cheporookuai reta,

15peröɨro yave che jae vae, jare pepɨa etei güɨröɨro yave cheporookuai reta, peyapombae vaerä, jare mbaetɨ pemboete cheporogüɨrökuavee päve,

16che ayapota vi peve kuae: Ambouta peve kɨɨye yavaetegüe, peiporara yae vaerä, pembopɨtu yae vaerä, jare pemaetɨ tëiñota, echa perovaicho reta jou vaeräño ko.

17Ayemboyovaichota pekotɨ, jare peñemoamɨriukata perovaicho reta pe; pemotareɨ vae reta güɨnoita mbaepuere peré, jare petekuaraita yepe tëi mbaetɨ kia peraɨkuemoña reve.

18Ërei opaete kuaekuae reve mbaetɨño peendu cheve yave, che ayerovata pekotɨ aiporarauka vaerä peve chiu ye, peyoa reta jeko pegua.

19Amboaita pegüi pepɨayemboete jese vae, mbaetɨta amongɨ peve, jare peɨvɨ pe mbaetɨta mbaagüɨye.

20Pepɨ̈rata reta opaiñota peiporu, echa peɨvɨ pe mbaetɨta mbaagüɨye, jare ɨvɨra reta mbaetɨta ia.

21Mbaetɨ yave peiko kavi che ndive, jare jekuaeño mbaetɨ peendu cheporookuai reta yave, che amoïruta peve chiu ye mbaerasɨ pɨ̈chɨi vae, mbaeyoa peyapo rupi.

22Ambouta peve mbaeporou reta, peraɨ reta jare perɨmba reta omokañɨtei vaerä, mbovɨ yae pepɨtata, mbaetɨta kia oguata tape rupi peɨvɨ pe.

23Ërei kuaekuae reve mbaetɨ yave peñeñono kavi, jare jekuaeño peyovaicho che ndive yave,

24che ayovaichota vi pe ndive, jare aiporaraukata peve chiu ye peyoa reta re.

25Ambouta peve ñeraro, ayepɨ vaerä mbaetɨ ramo perovia cheporogüɨrökuavee päve re, jare peeka yave perëta guasu rupi ñepɨ̈roka, che amondota mbaerasɨ ovakatu vae pepɨte pe, jare peñemoamɨriukata perovaicho reta pe.

26Che ambouta peve karuai guasu, payandepo kuña reta omboyɨta mbɨyape metei horno pe, jare ojäata omee peu vaerä; peuta ërei ngaraa perɨ̈vɨata.

27Ërei kuaekuae reve mbaetɨño yave peyandu cheñee, jare jekuaeño peyovaicho che ndive yave,

28che ayovaichota vi pe ndive chearasɨ reve, jare aiporaraukata peve chiu ye, peyoa reta re.

29Jayave peuta peraɨ reta jare perayɨ reta isoogüe.

30Amboaita pembaemboete renda ɨvɨtɨ re ñogüɨnoi vae, jare ambosururuta petumpa-raanga reta, jare añonota perëogüegüe petumpa-raanga reta oyekagüe iárambo rupi, echa pɨ̈chɨi yae ko cheve;

31amokañɨteita perëta guasu reta, jare pembaemboete renda, jare ngaraa ma aëtu mbae ikäti kavi vae pegüi.

32Amokañɨteita opaete mbae peɨvɨ pe, perovaicho reta yogüɨrekota peɨvɨ pe vae ipɨakañɨta opɨta.

33Jare opata pomoai kerupi ïru tëtaguasu reta rupi, ñeraro rupi opata pomoai, peɨvɨ oikota ipombae jare perëta guasu reta tëtagüerä.

34Jayave jókuae ɨvɨ oyekouta ara reta mbutuu pegua re, opaete ara reta ipombae oiko ramboeve, pe peiko ramboeve perovaicho reta iɨvɨ pe; jökorai jókuae ɨvɨ oputuuta jare oyekouta ara reta mbutuu pegua re.

35Opaete ara reta ipombae ɨvɨ oiko ramboeve oputuuta, echa mbaetɨ pemombutuu jókuae ɨvɨ ara reta mbutuu pegua pe, peiko ramboeve pɨpe.

36Jare pegüi oimeño oikove vae, perovaicho reta iɨvɨ pe, añonota ipɨa pe kɨɨye rai, metei ñana-roo oa yave ave okɨɨyeta, kɨsepuku pe kia omoña vae rami otekuaraita, oyepɨakata mbaetɨ kia omoña reve;

37peyomboavai güi peyopɨakata ñeraro güi otekuarai vae rami, yepe tëi mbaetɨ kia peraɨkuemoña; ¡ngaraa pepuere perovaicho re!

38Jare opata pekañɨtei ïru tëtaguasu reta rupi, perovaicho reta iɨvɨ pe opata pekañɨtei.

39Jare pegüi oimeño oikove vae omanota perovaicho reta iɨvɨ pe, ikavimbae vae peyapo jeko pegua; ¡pemanota peñemuñagüe reta iyoa jeko pegua jare peyoa jeko pegua!

40Ërei peyemombeu yave ikavimbae peyapo vae re, peñemuñagüe reta oyapo rami peyapo vae re, jare oyovaicho reta yogüɨreko che ndive vae rami,

41che ayovaichota vi pe ndive, jare pogüɨrajata perovaicho reta iɨvɨ pe; jare joko pe peñemomichi yave, jare peikuaa reve peiporara peyoa re yave,

42che chemaenduata morogüɨrökuavee päve ayapo Jacob ndive,Gn 28.13-14. Isaac ndive,Gn 26.3-4. jare Abraham ndive vae re,Gn 17.7-8. jare chemaenduata vi peɨvɨ re.

43Jare pe reta opata peeya peɨvɨ jare jókuae ɨvɨ oyekouta ara reta mbutuu pegua re, echa ipombae oikota ketɨ peiko ramboeve; jayave pe reta peiporara yaeta pereko kavimbae re, echa peröɨro jare pekuérai cheporookuai güi.

44Yepe tëi opaete kuae mbaembae reta oasa pe reta ndive, peiko ramboeve perovaicho reta iɨvɨ pe, che ngaraa pogüɨröɨro, ngaraa vi pogüɨromara jare pomokañɨtei, ngaraa amboai morogüɨrökuavee päve ayapo peñemuñagüe reta ndive vae, echa che ko peYa Tumpa.

45Chemaenduata morogüɨrökuavee päve ayapo peñemuñagüe reta ndive vae re, Egipto güi pogüɨnoe yave opaete ɨvɨ pegua reta jovake, aiko vaerä peTumparä. Che ko jae peYa.”

46Jae ko kuae mborookuai reta jare mboromboe reta yandeYa oyapo oyoupe Israel iñemuña reta ndive, Moisés rupi ɨvɨtɨ Sinaí re vae.