PROVERBIOS 10 - Guarani Bible with DC

Salomón iñee reta arakuaa pegua

1Salomón iñee reta arakuaa pegua:

Kunumi yarakuaa katu vae, omboyerovia ko tu; ërei iyarakuaambae ombopɨatɨtɨ ko ichɨ.

2Ikavimbae rupi oyemboikokatu vae, ngaraa oyekou kavi,

ërei jupi rupi oiko vae, oyereroasayepeta ko mano güi.

3YandeYa ngaraa oiporarauka yɨmbɨaɨ jupi rupi oiko vae pe,

ërei jupimbae re ngaraa omaeño jɨ̈vɨata vaerä.

4Ipokoseä oparavɨkɨ vae, iparavete;

ërei iparavɨkɨse vae, oikokatu.

5Mbaarɨvo iara pe ombaarɨvo vae, yarakuaa katu ko;

ërei mbaarɨvo iara pe oke reteiño vae, imarambae ko.

6Kuimbae jupi vae pe oime mborerekua,

ërei iyoa vae oñemokïriiukata jeko pɨ̈chɨi pe.

7Kuimbae jupi vae re oime ñee kavi;

ërei kuimbae jupimbae jee, jarembae pegua okañɨ.

8Iyarakuaa vae omboresive mborookuai reta;

ërei iñee-rei vae, paravete opɨta.

9Jupi rupi kavi oiko vae, oiko pɨagüive oiko,

ërei jupimbae oiko vae, oiporarata ko.

10Jesäɨ rupi mbae jei vae, mbɨatɨtɨ ko oyapo iyeupe,

jare iñee rupi jei jeiiño mbae vae, oiporarata.

11Jupi vae iñee reta, tekove katu ko,

ërei iyoa vae, oñemokïriiukata jeko pɨ̈chɨi pe.

12Ñomotareɨ güeru yoaka reta,

ërei mboroaɨu iñɨ̈ro opaete mbaeyavɨ reta pe.

13Yarakuaa vae reta iñee pe oime arakuaa katu;

ërei chikote ko mbaetɨ oyemongeta kavi vae reta peguarä.

14Iyarakuaa vae reta oñovatu avei yarakuaa,

ërei iyarakuaambae reta jarembae oyembosusere iñee pe aeño.

15Oikokatu vae imbaeyekou, tëta guasu jëguambae rami ko chupe;

ërei paravete vae isusere jae ko mbaravete.

16Jupi vae jembiapo, jae ko tekove peguarä;

ërei iyoa vae jembiapo, jae ko mbaeyoa peguarä.

17Yemboarakuaa oendu vae oepeña ko tekove;

ërei yembosɨmbi mbaetɨ oipota oendu vae, oyavɨ ko iyeupe.

18Oporoaɨu raanga vae iyapu vae ko,

Ndaye omoërakua vae mbaetɨ ko yarakuaa.

19Jeta yae imiari vae iñee rupi oyavɨ katu, ërei oyeandu reve iñee omoë vae yarakuaa ko.

20Korepoti ikavigüe rami ko jupi vae iñee;

ërei iyoa vae reta ipɨa ikaviä etei ko.

21Jupi vae reta iñee rupi omborɨ jeta vae,

ërei iyarakuaambae reta omano, mbaetɨ iyarakuaa jeko pegua.

22YandeYa iporerekua, mbaeyekou ko,

ngaraa güeru mbɨatɨtɨ.

23Yarakuaambae, omomoraño oyapo ikavimbae;

ërei yarakuaa katu vae, omboyerovia iyarakuaa katu.

24Iyoa vae okɨɨye yae chugüi vae etei outa chupe, ërei jupi vae pe oyembopo ipɨa jemimbota.

25Kusumirou oasa, jökorai ko jeko kavimbae mbaetɨ oiko puku,

ërei jupi vae oiko jekuae avei.

26Mbae jayasɨ vae oporomojäi yeɨ, ani tätati tesa omboasɨ;

jökorai ko jókuae iyakɨ vae iyokuaía pe.

27YandeYa güiño oipoɨu vae, oiko pukuta,

ërei iyoa vae reta ngaraa yogüɨreko avei.

28Jupi vae reta oäro vae, yerovia katu ko;

ërei iyoa vae reta oäro tëi vae, mbaetɨ.

29YandeYa oyangareko jeko kavi vae re,

ërei omboai jeko kavimbae.

30Jupi vae ngaraai oyemombo iɨvɨ güi,

ërei iyoa vae ngaraa oikoño oiko ɨvɨ pe.

31Jupi vae iyuru güi oë arakuaa katu,

ërei iñee pɨ̈chɨi vae güi oyeasɨata ikü.

32Jupi vae iyuru güi oë ñee pöra;

ërei iyoa vae reta iyuru ikɨa.