JUDIT 5 - Guarani Bible with DC

Holofernes omboatɨ oporomboarakuaa vae reta

1Omombeu yave sundaro ruvicha guasu Holofernes, Asiria pegua pe, Israel-ɨgua reta oyeapokatu ñogüɨnoi ñoraro pe vae jare opa oyokenda reta ñogüɨnoi tape oasa ɨvɨtɨ rupi vae, jare igüembɨ guasu rupi oñono reta ñogüɨnoi opaete ɨvɨtɨ ɨvatea rupi vae, jare opa vi ñuu oikëse reta güɨnoi vae,

2jare jókuae yavaete yé omboarasɨ. Oekauka güɨrave opaete mburuvicha Moab pegua reta, jare Amón pegua reta jare opaete ɨ guasu jembeɨ rupi oï vae reta,

3jare jei chupe reta körai: “Pe Canaan-ɨgua reta, pere cheve kia nunga reta pa ko jókuae oï kavi ñogüɨnoi ɨvɨtɨ re vae, kia nunga tëta pegua reta pa ko, jëia yae ete pa ko isundaro reta, mbae pe pa ko imbaepuere yae reta, kia nunga mburuvicha guasu pa ko jae juvicha reta jare isundaro reta oyókuai vaerä,

4jare maera pa jae retaño etei kuaraɨ oikea kotɨgua mbaetɨ yogüeru cherövaiti.”

Aquior iñee

5Aquior, jae ko opaete amonita reta juvicha, jare jae jei körai: “Mburuvicha eyeapɨsaka kuae nderembiokuai jeita ndeve vae re, jaeta ndeve añetegüe kuae tëta reta pea ɨvɨtɨ köiño oï vae re oime ñogüɨnoi vae regua. Cheapu potaa ko aï ndeve.

6Jae reta jae ko Caldeaɨgua reta iñemuña.

7Tenonde yave yogüɨrekose Mesopotamia pe, echa mbaetɨ ikɨ̈reɨ reta güɨrovia yogüɨreko itenondegua reta itumpa re, Caldeaɨgua pe yogüɨrekose yave.

8Jare opa reta oeya itenondegua reta jeko jare omboete reta Tumpa araɨgua, echa jókuae jae Tumpa chupegua reta. Jókuae jeko pegua ko caldeaɨgua reta opa omombo reta mombɨrɨ itumpa reta jesa róvai güi, jaema jae reta opa osɨi Mesopotamia kotɨ, jare yogüɨreko.

9Ërei jae reta iTumpa jei chupe reta oë reta vaerä joko güi ojo vaerä yogüɨreko Canaán pe, jare oiko reta jare täta oyemboikokatu reta oro pe, korepoti pe jare jɨmba rupi.

10Jaɨkue rupi oiko karuai tätagüe vae Canaán pe, jare ou reta Egipto pe yogüɨreko ye tembíu re ma. Joko pe ma oñemuña reta ye jeta rupi, oyeapo reta ma tëta ipo jetagüe vae.

11Jaema jayave mburuvicha guasu Egipto pegua iyarasɨ ikotɨ reta, jare omombaravɨkɨ reta oyapouka chupe reta adobe. Jókuae pe täta oyuvanga jese reta jare oyapo reta tembipɨɨrä.

12Jaema jae reta osapúkai ma itumpa kotɨ, jare jae oiporarauka opaete Egipto pe ombou chupe reta mbae yakuerambae chugüi vae. Jaema jayave Egiptoɨgua reta opa omombo iɨvɨ güi.

13Jare Tumpa omondɨpa chupe reta Ɨguasu Pɨ̈ta vae ipuere vaerä oasa reta,

14jare güɨraja reta tape Sinaí kotɨ ojo vae rupi jare Cadés-barnea rupi, jaema jae reta opa omoë opaete ñuu rupi yogüɨreko vae reta,

15jaema jae reta opa opɨta yogüɨreko vaerä amorreo reta iɨvɨpe. Jare täta imbaepuere reta jare opa omokañɨtei reta Hesbón pegua reta. Oasa reta Jordán rupi jare oyemombae reta opaete ɨvɨ ɨvɨtɨ güɨnoi vae re,

16opa omombo reta joko güi cananeo, ferezeo, jebuseo, Siquem, gergeseo reta, jare joko pe ɨma yogüɨreko ye.

17Jare mbaetɨ ramboeve mbaeyoa oyapo reta iTumpa kotɨ, ikavi oiko reta; echa jae reta iTumpa jae ko Tumpa mbae ikavimbae omotareɨ vae.

18Ërei opia reta yave tape jae jei chupe vae güi, täta oiporara reta kañɨtei tuicha vae ñoraro rupi jare oyererajauka reta tembipɨɨrä ɨvɨ ambuae pe. ITumpa itupao opa oyemboai, jare jëta reta opa opɨta jovaicho reta ipo pe.

19Ërei añave rupi ko, opa ye ma oyerova reta Tumpa kotɨ, jare opa ye ma ma yogüeru oñemoai yogüɨreko vae güi jare opa ye yogüeru oiko Jerusalén pe, iTumpa jo ikɨambae oï vae pe, jare opa oñeñono kavi reta ɨvate vae rupi, mbaetɨ kia oikoa rupi.

20Jae ko jókuae, cheruvicha, jaema kuae tëta reta oime mbae oyapo yave jare iyoa iTumpa kotɨ yave, jare yande reta oime yaendu ma vae jei reta yandekotɨ yave, yandepuere yaja ñañoraro jae reta ndive.

21Ërei mbaetɨ ko mbaembae ikavimbae oyapo kuae tëta reta yave, nde cheruvicha ikavi ko yaeyaño ikavi rupi; echa mbaetɨ yave, ipuere ko iTumpa oepɨ reta, jare yande yandepuere yapɨta pɨ̈chɨi opaete vae reta jóvai.”

22Jare Aquior opa imiari yave, opaete jókuae teyupa iyɨ́vɨri oï vae reta opa iñeeäta reta. Holofernes isundaro ruvicha reta, jare opaete Moab pegua reta ɨ jembeɨ rupi yogüɨreko vae reta, ikɨ̈reɨ reta Aquior opa ombopika pika reta.

23Jei reta: “Ore ngaraa rokɨɨye Israel-ɨgua reta güi; jae reta jëiambae reta ko jaema ngaraa ipuere oñoraro reta ore ndive.

24¡Yaja chupe reta jayave, mburuvicha Holofernes! ¡Opaete nde sundaro reta pe mbaeä etei ko Israel-ɨgua paravete ete!”