JEREMÍAS 5 - Guarani Bible with DC

Jerusalén jare opaete Judá iyoa

1YandeYa jei:

“Peguata Jerusalén pegua kaye reta rupi,

pemae kavi, peeka joka guasu rupi,

yaecha ra peväe kia jupi vae oyapo vae,

jare añetegüe rupi oiko vae.

Peväe yave cheɨ̈rota Jerusalén pe.

2Yepe tëi amogüe reta jei mbae cheree re,

ërei mbaetɨ ko añetete jei reta.”

3CheYa Tumpa, nde reeka vae ko jupigüe oyapo vae,

reinupa reta tëi, ërei jeseve mbaetɨ oyandu reta;

reiporarauka tëi chupe reta,

ërei mbaetɨ oipota reta oikuaa.

Oyembopɨa täta reta, oasa ete ye ita güi,

mbaetɨ oipota reta oyerova ye ndekotɨ.

4Che jae cheyeupe:

Yarakuaambae retaño ko mbaetɨ jeko kavi,

echa mbaetɨ oikuaa reta yandeYa jemimbota regua

jare iporookuai reta.

5Taja yarakuaa katu vae reta kotɨ tachemiari chupe reta.

Echa jae reta oikuaa yandeYa jemimbota regua,

iTumpa iporookuai reta.

Ërei opaetei ma yepe oyembopɨapochɨ reta Tumpa kotɨ,

ñäteɨ oyapo reta mborookuai jei vae.

6Jáeramo yaguapope oëta kaa güi jare oyuka retata,

aguarayaɨmba ñuu rupigua opata ombojaɨ jaɨ reta,

yaguapara oporepeñata tëta guasu reta re

jare kia oë yave ombojaɨ jaɨta;

echa jeiete yae pɨapochɨ reta,

jare mbaetɨ jupi reta.

7YandeYa jei:

“Cheɨ̈ro rapeä ko ndeve opaete kuae re.

Peraɨ reta chereeya,

jare jei reta mbae tumpa-raanga jee re.

Amee jeta jembíu retarä,

ërei mbaetɨ jeko kavi reta cheve,

opaete vae yogüɨreko menda re oyuvanga vae rami.

8Kavayu okaru kavi vae oñee jembireko jaɨkue rami,

metei ñavo ojo japicha jembireko jaɨkue.

9Kuae jeko pegua, ¿amaeñota ra jese reta?

Jei yandeYa.

Körai tëtaguasu vae pe,

¿mbaetɨta ra jupi aiporarauka chupe teko oyapogüe re?

10¡Toike tovaicho reta chupe, jare topa tomboai reta,

uvarupa tomboai reta, ërei agüɨye opaetei tomboai!

¡Jäka topa toakɨo reta, echa chembaeä ma ko!

11¡Israel pegua reta jare Judá pegua reta

oyembopɨapochɨ chekotɨ!

Che peYa, jae.”

Tembiporara oñemoërakua

12Israel pegua reta

jare Judá pegua reta güɨröɨro yandeYa;

jei reta: “Mbaeä etei ko Tumpa.

Ngaraa ikavimbae ou yandeve,

ngaraa oime ñeraro ani karuai.”

13-14Ɨvɨtu ramiño ko ñeemombeúa reta,

echa yandeYa iñeeä ko omombeu reta.

Körai jei cheve Tumpa, yandeYa imbaepuere yae ete vae:

“Jókuae ñee jei reta jeko pegua, kuae toiko chupe reta:

Cheñee reta toï tata rami chupe reta ndeyuru pe,

jare kuae tëta toñogüɨnoi yepea rami,

jókuae tata topa tomboai.”

15YandeYa jei ye:

“Israel pegua reta,

mase, ko aru peve matɨ güi jeta vae,

jëia yae jare tëta ñɨma yae vae pegua reta.

Mbaetɨ peikuaa iñee reta

jare iyemongeta reta vae.

16Kuae reta ñeraro regua jëia vae yepeai ko,

juvɨ reta oporomboasayepembae ko.

17Neremitɨ jare nderembíu jou retata,

nemichia reta ave jou retata ndegüi.

Ndevecha jare ndeguaka reta,

ndeuva jare ndeɨva reta.

Jembiporu ñeraro pegua pe omboaita tëta guasu

oñekëse kavi vae, reyerovia jese vae.”

18YandeYa jei: “Jókuae ara, ngaraa opaetei amokañɨtei Judá pegua reta.

19Oparandu reta ndeve yave: ‘¿Maera pa kuae oyapo oreve yandeYa Tumpa?’ Javoi ere chupe reta: ‘Pesɨrɨ yandeYa güi jare peyeokuai tumpa ambuae pe peɨvɨ pe rami, jökorai peota peyeokuai ketɨgua reta pe ɨvɨ ambuae pe.’

Yeandu Israel peguarä

20‘Emombeu Israel pegua reta pe

jare toendu vi Judá pegua reta, kuae:

21Peendu kuae, pe yarakuaambae

jare ipɨa täta vae reta,

oime tëi peresa reta, ërei mbaetɨ peecha,

oime tëi peapɨsa reta, ërei mbaetɨ peendu.

22Che, peYa jae:

¿Mbaetɨ pa peipoɨu chegüi?

¿Mbaetɨ pa pekɨɨye chegüi?

Che añono ɨvɨkuitï ɨguasu jembeɨrä,

ɨguasu ngaraai oasa vae.

Yepe tëi tuicha ɨaparúa opüa,

ërei ngaraai ipuere oasa.

23Ërei ngatu pe reta

peyembopɨa täta jare peyembopɨapochɨ;

peyerova chegüi jare opa chereeya.’

24Mbaetɨ pere pepɨa pe:

‘Yamboete mo yandeYa Tumpa,

ama ombou iara pe kavi yandeve vae,

ama tenondegua ete jare taɨkuegua ete,

jare omee yandeve ara kavi yambaarɨvo vaerä.’

25Ërei pembaeyoa reta oyopia opaete kuaekuae reta pegüi,

jare mbaetɨ peyekou jese.

26Echa oime tëta chembae pe

kuimbae ipɨa-pïrimbae reta,

oporopïaro reta, güɨra oipïaro vae reta rami,

oyapo ñuai, pɨpe oipɨɨ vaerä ïru vae reta.

27Omotɨnɨe reta jo mbaembae oñomigüe pe,

güɨra oipɨɨgüe pe, jɨru omotɨnɨe rami.

Jökorai tuichagüe yae oyeapo jare oyemboikokatu reta.

28Okaru kavi jare ikɨra yae reta.

Jeko ikavimbae oyapogüe oasa ete ye;

mbaetɨ oyapo reta jupi vae tɨ̈reɨ pe,

mbaetɨ oyapo jupi vae paravete vae reta pe.

29Kuae jeko pegua, ¿amaeñota ra jese reta?

Kuae rami oyapo vae,

¿mbaetɨ ra jupi aiporarauka vaerä chupe reta jeko re?

Che peYa, jae.

30‘Yavaetegüe jare ikavimbae yae vae

oasa oï kuae tëtaguasu pe. Jae ko:

31Ñeemombeúa reta omoërakua apu;

sacerdote reta oyapo mbaravɨkɨ ipɨa jemimbota rupiño;

¡jare tëta chembae vae jökorai oipota!

Ërei, ¿mbae pa peyapota ou ma kañɨtei yave?’ ”