2 MACABEOS 10 - Guarani Bible with DC

Tupao oyekɨayoe vae(1 Mac 4.36-61)

1Macabeo jare jupiegua reta, yandeYa iporomborɨ rupi, opɨ̈ro ye tupao jare tëta guasu Jerusalén.

2Omboai reta mɨmba oyeyuka oyeapɨ jese vae itumpa ambuae vae reta oyapo okavɨte pe vae, jare imbaemboetea renda.

3Oikɨayoe ma yave tupao, omopüa ye pɨau reta ïru mɨmba oyeyuka oyeapɨ jese vae, jare oekɨ reta tata tataɨ güi, jare güɨrökuavee reta mbaeyuka pɨpe. Oapɨ reta vi ikäti kavi vae incienso, omoendɨ reta mechero jare güɨrökuavee reta mbɨyape mbaemboete pegua. Mókoi año ma ko oasa mbaetɨ güire oyeapo mbaeyuka reta.

4Kuae jaɨkue rupi, oñaɨvɨ reta omboya regua jesɨva ɨvɨ re, oiporu reta yandeYa agüɨye vaerä ma oiporarauka chupe reta maemegua rupi; jare iyoa reta yave ombosɨmbi vaerä ipɨa guasu reve, ërei agüɨye mo oeya itumpa ambuae vae reta ipo pe,

5kuae tupao karamboe yave itumpa ambuae vae reta omongɨaa pe etei, oyekɨayoe ye, jae ko veinticinco pe, Quisleu yasɨ pe.

6Jare omboarete reta oyerovia reve chau ara rupi, arete o ñairaka pegua jee vae pe rami, imaendúa reve ndei ave ko ɨma kuae arete omboasa reta ɨvɨtɨ jare ɨvɨkua rupi, mɨmba pochɨ vae reta yogüɨreko rami.

7Jáeramo limón omopöra reta ñana joogüe pe güɨraja, ñana-rokɨ jare karandaɨ joo ndive, okäta reta Tumpa pe, echa jae omborɨ reta oikɨayoe vaerä itupao.

8Jare vi, tëta oikuatía mborookuai opaete judío reta omboarete vaerä año ñavo kuae ara.

Judas mbae tuicha vae oyapogüe vae

9Ñanemiari ma Antíoco imano re, jae ko Epífanes oero reta vae,

10añave ñanemiarita Antíoco Eupátor re, ipɨapochɨ yae vae Antíoco Epífanes taɨ jembiapo pɨ̈chɨi reta re.

11Oguapɨ yave Eupátor mburuvicharä, oñono iyɨvɨriguarä Lisias, kuae ko jae sundaro ruvicha jare mburuvicha vi Celesiria jare Fenicia pegua.

12Tenonde yave oikose Tolomeo, Macrón jee vae, jaeñoete oechauka jupi vae judío reta pe, echa ñäteɨ ramo pɨ̈chɨi vae ou reta jupi, oyogüɨroata kavi yae jae reta ndive.

13Jáeramo vi mburuvicha ichëi reta oñeapo jese Eupátor pe. Oñono Filométor tuvicharä Chipre pe, ërei jae ojo joko güi oñemoïru Antíoco Epífanes ndive; jókuae ramo, opaete vae omotareɨ. Oecha ma yave mbaetɨ teko ikavi chupe, oyeyuka mbayachi pe.

Ñoraro Gorgias jare Idumeo reta kotɨ(1 Mac 5.1-8)

14Gorgias oñono reta yave sundaro ruvicharä, omboatɨ ñoraro regua reta, jare jëgua chupe ñavo güɨropüa ñoraro judío reta kotɨ.

15Jökorai yave, Idumeo reta ñepɨ̈roa rupi ñogüɨnoi vae, omoambeko judío reta jare Jerusalén kotɨ güi osɨigüe oipɨɨ reta, jökorai oeka reta yogüeru ñoraro.

16Macabeo ndive ñogüɨnoi vae reta, opa yave oiporu yerure rupi Tumpa pe iporomborɨ, joko güi oguata reta Idumeo reta iñepɨ̈roa kotɨ,

17oporepeña reta ko jese täta rupi jare opɨ̈ro reta chugüi jókuae ɨvɨ, omoamɨri reta oguambɨ guasu güi oñoraro vae reta, oñaseokɨ̈ti reta ipo pe ɨvate güi oagüe, jare oparapiti reta veinte mil kuimbae re.

18Ërei nueve mil vae reta, jembiporu reve reve, oñepɨ̈ro chugüi mókoi oɨvate reta ñepɨ̈roa kavi yaea pe,

19Macabeo oeya Simón, José jare Zaqueo, jeta sundaro ndive, opüa vaerä tovaicho re, joko güi jae ojo ïkotɨa.

20Ërei Simón isundaro reta, mbaeyekou oipotarai ramo, oyeguata reta jovaicho pe korepoti rupi. Oipɨɨ reta setenta mil korepoti, jare jekovia pe ombosɨiuka reta jovaicho.

21Macabeo pe imiari reta yave kuae re, omboatɨ isundaro ruvicha reta jare omboeko jëtara oguauka vae pe, echa ko ombosɨiuka jovaicho.

22Kuae jeko pegua oyukauka reta, jova mókoi ramo, jaema voi etei opɨ̈ro mókoi reve o ɨvate reta.

23Opaete ñoraro rupi oporomoamɨri; jókuae mókoi oɨvate pe peño oyuka veinte mil tovaicho.

24Timoteo iñamɨri ma yave judío reta ndive, omboatɨ jeta ñoraro regua reta, jaeramiño vi kavayu regua Asia güi güerugüe reta, jare opüa Judea re.

25Macabeo, jeta vae reta ndive oyaro ma Timoteo yave, oyerure reta Tumpa pe, oyeatɨ reta ɨvɨkúi pe re oyemonde reta temimonde jaimbe vae pe.

26Oyetavatɨka reve mɨmba oyeyuka oyeapɨ jese vae jóvai, oiporu reta Tumpa pe iporoparareko, jae etei oyovaicho vaerä tovaicho reta kotɨ jare oyemboɨ vaerä ikotɨ opüa vae reta pe, mborookuai guasu pe jei rami.

27Opa ma yave oyerure reta, oipɨɨ jembiporu jare oë reta oguata. Oyaro ma yave jovaicho, opɨta oputuu reta.

28Kuaraɨ jembipe ma ou yave okua reta oyoe. Ipɨakatu reve jare iYa re oyeko reta ramo, oñono ipɨa pe oporomoamɨrita ko vae. Itumpa ambuae vae reta iyarasɨ reve oñoraro.

29Jare güɨramoiño, ñoraro jeiete pe, tovaicho reta oecha ara re pandepo kuimbae reta, ikavayu ndive ñavo jare ikayuru pegua oro katuai vae, kuae reta oñeñono judío reta jenonde,

30jare oimama reta Macabeo yave, oepɨ reta jembiporu pe agüɨye vaerä kia oyuka. Ojäa reta vi juvɨ jare ama-vera jovaicho reta re, ërei jae reta opa jesa ogüe jare okɨɨye güi opa otekuarai reta joko güi.

31Veinte mil quiniento sundaro ɨvɨ rupigua jare seiciento kavayu regua reta opa oñeaseokɨ̈ti.

32Timoteo otekuarai Guézer kotɨ, kuae ko jae ñepɨ̈roa okúe mbae vae, Quereas ipogüɨ pe oï vae kotɨ.

33Macabeo, jeta vae reta ndive, okua jese reta irundɨ ara rupi.

34Japɨpe pegua reta oñepɨ̈ro kavi ñogüɨnoi ramo, ñee jasɨ katu vae rupi oikura reta Tumpa.

35Ërei ara pandepoa pe köe ma yave, veinte mil taɨrusu vae reta Macabeo isundaro güi, omboasɨ yae ma yekura reta iTumpa kotɨ ramo, oyeupi reta oguambɨ guasu re jare yavaete oyuka reta jape rupi oïgüe,

36ïru reta, oecha yave kuae, oyeupi reta vi ïkotɨa rupi oporepeña japɨpe pegua reta re, oyatapɨ reta o ɨvate reta re jare jöke re, oyapo reta tata guasu jare oapɨ pɨpe jekove reve Tumpa oyangao vae reta. Ïru reta oakɨo öke oike vaerä japicha reta, jökorai opɨ̈ro reta jókuae tëtaguasu.

37Timoteo yepe, oime jokotɨ oñemi tëi oï ɨvɨkua pe, ërei jeseve oñaseokɨ̈ti reta, jëtara Quereas jare Apolófanes rami.

38Opa ma yave kuae oasa, omboete reta yemongoi jare yerure rupi yandeYa, echa oyapo ikavi vae Israel pe omoamɨri vaerä jovaicho reta.