SALMOS 146 - Guarani Bible with DC

SALMO 146Mbaemboete jupi ko Tumpa vae re

1¡Tamboete cheYa opaete cherekove ndive!

2YandeYa pe tatairari aikove aiko ramboeve;

cheTumpa pe atairarita salmo, aikove aiko ramboeve.

3Agüɨye peyeko mburuvicha reta re,

ani oipotagüe kuimbae re, ngaraa ko ipuere oporogüɨroasayepe.

4Echa omano yave ojo ye ɨvɨkuirä,

jare jókuae ara voi opa iyemongeta reta.

5Oyerovia ko jókuae, Jacob iTumpa iporomborɨ güɨnoi vae,

iporoäro güɨnoi yandeYa, Jacob iTumpa re vae,

6jae ko oyapo ara jare ɨvɨ,

ɨguasu jare opaete pɨpe yogüɨreko vae.

Jae mbaetɨ oipoepɨ jeigüe.

7Oyapo jupi vae oiporara vae reta pe,

omongaru yɨmbɨaɨ vae reta.

YandeYa oyora tembipɨɨrä yogüɨreko vae reta;

8omomae jesambae vae reta,

omopüa ogüɨapi vae reta,

oaɨu jupi rupi yogüɨreko vae reta.

9YandeYa oyangareko ketɨgua reta re,

tɨ̈reɨ re jare imemano vae re,

ërei jupimbae reta ombojopa.

10Sión, neTumpa oporookuaita jekuae avei rupi,

yandeYa oporookuaita jekuae avei rupi.

¡Aleluya!