1Joás chiu año güɨnoi omboɨpɨ oï mburuvicha guasurä yave, jare oiko mburuvicha guasurä Jerusalén pe cuarenta año. Ichɨ jee Sibia, jae ko Beerseba pegua.
2Joás oyapo jupi rupi yandeYa jesa róvai opaete ara sacerdote Joiada oikove oiko ramboeve.
3Jare Joiada omomenda mókoi kuña ndive, jökorai Joás oime taɨ reta jare tayɨ reta.
4Jaɨkue rupi Joás oyemongeta omopüa pɨau ye vaerä yandeYa jo,
5jare omboatɨ sacerdote reta jare levita reta, javoi jei chupe reta: “Peë opaete tëta guasu reta Judá pegua rupi pemboatɨ korepoti opaete Israel iñemuña reta güi, año ñavo oyeapo kavi vaerä ñaneTumpa jo. Peyemoambeko jarembae pegua kuaekuae re.” Ërei levita reta mbaetɨ oyemoambeko kuaekuae re.
6Jáeramo mburuvicha guasu Joás oenɨi sacerdote tenondegua Joiada jare jei chupe:
—¿Maera pa mbaetɨ reyemoambeko levita reta güeru vaerä mbota opaete Judá güi jare Jerusalén güi Moisés yandeYa jembiokuai omee mborookuai Israel iñemuña reta pe tupao guakapi peguarä vae?
7Echa Atalía jeko kavimbae jare jupiegua reta güɨrokomegua Tumpa jo jare güɨnoe vi itumpa reta peguarä opaete mbaembae oñeñono tee yandeYa jo pe vae.
8Jayave mburuvicha guasu oyapouka käjou jare jókuae käjou oñono reta ikatu pe, yandeYa jo jöke pe,
9javoi omoërakuauka opaete Judá rupi jare Jerusalén rupi güeru reta vaerä mbota yandeYa pe, Moisés Tumpa jembiokuai omee mborookuai Israel iñemuña reta pe ñuu pe vae.
10Jare mburuvicha reta jare opaete vae reta oyerovia reve güeru mbota oñono käjou pe omotɨnɨe regua.
11Jare levita reta yogüeru güɨraja vaerä käjou mburuvicha guasu pe ombaekuatía vae pe yave, oecha reta jeta ma korepoti yave ou mburuvicha guasu pe ombaekuatía vae jare metei kuimbae sacerdote tenondegua oñono vae, jare reta güɨraja käjou, jare oikuavo reta, javoi oñono reta ye jenda pe. Jökorai oyapo reta ara ñavo, jare omboatɨ reta jeta korepoti.
12Javoi mburuvicha guasu jare sacerdote Joiada omee mbaravɨkɨ oyapo yandeYa jo pe vae reta pe, oeka reta vaerä ita oñopa vae reta, jare ipoki oparavɨkɨ ɨvɨra pe vae reta, oñono kavi reta vaerä yandeYa jo. Jare ipoki oparavɨkɨ jiero pe vae reta jare jiero iyu vae pegua, oyapo kavi reta vaerä tupao.
13Jayave oparavɨkɨ ipoki mbaembae oyapo vae reta, jae reta ipo pe mbaembae reta oyeapo kavi ye, jare oñono kavi reta ye Tumpa jo arakae yave oiko rami, jare ikavi oyapo reta oeya.
14Jare opa oyapo reta yave güeru reta mburuvicha guasu pe jare Joiada pe korepoti jembɨregüe, jare jókuae jembɨregüe oyapo vaerä tembiporu reta korepoti pegua yandeYa jo pe oyeporu vaerä, angúa reta, kuchara reta, vaso reta oro pegua jare korepoti pegua reta. Jare omee reta mɨmba oyeyukagüe opaetei oyeapɨ vae ara ñavo yandeYa jo pe opaete ara Joiada oikove oiko ramboeve.
15Jare Joiada indechi; jare indechi yae pe omano; ciento treinta año güɨnoi yave omano,
16jare oñotɨ reta David Jëta guasu pe mburuvicha guasu jɨvɨa oïa pe, echa oyapo jupi vae Israel iñemuña reta ndive jare Tumpa ndive, jökoraiño vi tupao pe.
17Joiada omano yave yogüeru mburuvicha reta Judá pegua jare oñererökuavee reta omborɨ vaerä mburuvicha guasu. Jare mburuvicha guasu omaeño oyemboarakuaauka chupe reta,
18jare oeya reta iyangarekoambae yandeYa jo, jae reta iñemuñagüe iTumpa jare omboete reta Asera iä jare ïru mbae iä reta ipoki vae oyapogüe reta. Jare kuae mbaeyoa jeko pegua Tumpa iyarasɨ Judá kotɨ jare Jerusalén kotɨ.
19Jare yandeYa ombou chupe reta ñeemombeúa reta omboyerova reta ye vaerä ikotɨ. Ërei jae reta mbaetɨ oyeapɨsaka ñeemombeúa reta iporomboarakuaa re.
20Jayave Tumpa iEspíritu ou Zacarías re, sacerdote Joiada taɨ re jare ojo oñeñono ɨvatea pe jare jei opaete vae pe: “Tumpa jei: ‘¿Maera pa pe reta mbaetɨ peyapo cheporookuai reta? ¿Maera pa pe reta aeño peeka peyeupe ikavimbae? ¡Pe reta chereeya jeko pegua che poeyata vi!’ ”
21Ërei ngatu opaete vae oyovaicho ikotɨ, jare mburuvicha guasu iporookuai rupi oyapi reta ita pe oyuka regua yandeYa jo joka pe.
22Jökorai mburuvicha guasu Joás mbaetɨ imaendúa Joiada, Zacarías tu iporoparareko ikotɨ vae re, jare oyuka taɨ Zacarías. Jare omanota ma yave jei: “¡YandeYa toecha kuae jare tojäa!”
23Año ou vae re oporepeña jese Siria pegua sundaro reta; jare yogüeru reta Judá pe jare Jerusalén pe, jare oyuka reta jókuae tëta pegua opaete mburuvicha reta, jare opaete opɨ̈rogüe omondo reta mburuvicha guasu pe Damasco pe.
24Echa yepe tëi Siria pegua sundaro reta yogüeru mbovɨño, ërei yandeYa etei omee jae reta ipo pe jeta yae tëi sundaro reve, yandeYa jae reta iñemuñagüe iTumpa güi opia reta jeko pegua. Jökorai Joás oiporara jókuae oyapo vae re.
25Jare Siriaɨgua reta opa ye yogüɨraja yave, imbaerasɨ yae opɨta; jare iyɨvɨrigua reta oyovaicho ikotɨ sacerdote Joiada taɨ imano re, jare oyuka reta jupa pe aeño. Jare oñotɨ reta David Jëta guasu pe, ërei mbaetɨ oñotɨ reta mburuvicha guasu reta jɨvɨa oïa pe.
26Joás kotɨ oyovaicho vae reta jae ko Zabad, Simeat taɨ, Amón iñemuña pegua, jare Jozabad, Simrit taɨ Moab iñemuña pegua.
27Joás taɨ reta regua, jeta mbaembae reta jepɨ vae omboatɨ vae regua jare yandeYa jo omopüa pɨau ye vae regua oyekuatía oï mburuvicha guasu reta regua oyekuatía oïa pe. Jare taɨ Amasías oguapɨ jekovia pe mburuvicha guasurä.
Who We AreWhat We EelieveWhat We Do
2025 by iamachristian.org,Inc All rights reserved.
