1Jayave opaete Israel iñemuña reta ñogüɨnoe, Dan güive Beerseba jare Galaad kotɨ güi, oyomboatɨ reta metei rami Mizpa pe, yandeYa jóvai.
2Jare opaete tëta reta juvicha reta ñogüɨnoi Tumpa imbae vae reta iyemboatɨa pe, opaete Israel iñemuña pegua reta güi ñogüɨnoi cuatrociento mil kuimbae ñeraro regua.
3Jare Benjamín iñemuña pegua reta oikuaa Israel iñemuña reta yogüeru Mizpa pe. Jare Israel iñemuña reta oparandu jókuae levita pe, kërai ra jókuae ikavimbae yae oasa vae.
4Jayave levita, kuña omano vae ime jei:
—Cherembireko ndive royu roväe Gabaa Benjamín iñemuña reta jëta pe, ropɨta vaerä jókuae pɨ̈tu joko pe.
5Ërei opüa cheré jókuae pɨ̈tu Gabaa pegua reta, opa oimama o roputuu roï pɨpe vae cheyuka reta vaerä, jare cherembireko pe oyapo jae reta ipɨa jemimbota, jáeramo omano.
6Jayave che aipɨɨ cherembireko jëogüegüe opa amboyao yao, jare amondo opaete Israel iñemuña reta iɨvɨ rupi, oikuaa reta vaerä kuae ikavimbae yae oasa vae.
7Añave opaete Israel iñemuña reta kuae pe peï vae, peyemongeta jare pemae mbae ra peyapota vae.
8Jayave opaete vae reta metei rami iyemongeta, opüa oyemboɨ jare jei reta:
—Agüɨye metei ave kia tojo ye jo guakapi pegua pe ani jëta kotɨ yandepɨte güi.
9Kuae yayapota añave, yayombosuerte yaikuaa vaerä kia ra tenonde ojota oporepeña Gabaa re.
10Opaete ñemuña güi oyeekɨta cien vae güi payandepo kuimbae, mil vae güi cien jare diez mil vae güi mil, güɨraja vaerä tembíu opaete vae peguarä; jare ïru reta yogüɨrajata Gabaa pe Benjamín iñemuña reta pe omboekovia jókuae ikavimbae yae oyapo ɨvɨ Israel pe vae.
11Opaete Israel iñemuña reta oyomboatɨ metei rami oporepeña vaerä tëta guasu re.
12Jare omondo ñee jerajaa reta opaete ɨvɨ rupi, Benjamín iñemuña reta iɨvɨ rupi, jei reta vaerä chupe: “¿Maera pa ikavimbae yae oyapo amogüe reta pepɨte pe?
13Pemee orepo pe jókuae jeko kavimbae reta, kuae Gabaa pe ñogüɨnoi vae royuka vaerä, jare toyetɨo ɨvɨ Israel kuae ikavimbae güi.”
Ërei Benjamín iñemuña pegua reta mbaetɨ oyapo jëtara Israel iñemuña reta jeigüe.
14Ërei ngatu tëta guasu reta Benjamín iñemuña pegua oyomboatɨ Gabaa pe, oñeraro vaerä jëtara Israel iñemuña reta ndive.
15Jare Benjamín iñemuña tëta guasu reta güi oyomboatɨ vae, oupitɨ veintisei mil kuimbae ñeraro regua, oyepapambae reve seteciento kuimbae oyeparavogüe Gabaa pegua reta.
16Jókuae seteciento kuimbae reta oyeparavogüe, iyasu vae reta ko, opaete oikatu ojäa tamamboka oyavɨmbae reve aagüe vae ko.
17Jare Israel iñemuña reta oyepapa vi, oyepapambae reve Benjamín iñemuña reta; opaete reve cuatrociento mil kuimbae ñeraro regua.
18Jaɨkue rupi opüa Israel iñemuña reta jare yogüɨraja Bet-el pe, jare oparandu reta Tumpa pe, jei reve:
—¿Kia räri pa oregüi reta tenonde ojota oñeraro Benjamín iñemuña reta ndive?
Jare yandeYa jei chupe reta:
—Judá räri tojo tenonde.
19Jare Israel iñemuña reta opüa ndeimbove yogüɨraja oyembojeyupa Gabaa jóvai.
20Jare ñogüɨnoe oñeraro Benjamín iñemuña reta ndive; oyeapo kavi reta oñeraro vaerä Gabaa iyɨpɨ pe.
21Jayave ñogüɨnoe Gabaa güi Benjamín iñemuña reta; opa oyuka jókuae ara veintidó mil kuimbae Israel iñemuña pegua reta.
22Ërei oñemoäta ngatu ye opaete vae, kuimbae Israel iñemuña pegua reta, jare oyeapo kavi reta ye oñeraro vaerä kárumbo ma oñeraroa pe.
23Echa Israel iñemuña reta yogüɨraja oyaeo yandeYa jóvai pɨ̈tu regua, jare oparandu reta yandeYa pe, jei reve: “¿Rojo yeta pa roñeraro orerëtara Benjamín iñemuña reta ndive?”
Jare yandeYa jei chupe reta:
—Pekua ye chupe.
24Jare Israel iñemuña reta yogüɨraja ye Benjamín iñemuña reta pe, mókoi araa pe.
25Ërei jókuae ara jekuae Benjamín iñemuña reta ñogüɨnoe ye Gabaa güi chupe reta jare jekuae oyuka ye ïru dieciocho mil kuimbae ñeraro regua reta.
26Jayave yogüɨraja ye opaete Israel iñemuña reta jare opaete tëta, jare oguapɨ oyaeo reta Bet-el pe, jare oyekuaku reta tembíu güi jókuae ara pɨ̈tu regua, jare omee reta mɨmba oyeyukagüe opaetei oyeapɨ vae, jare mbota yembopɨakatu pegua yandeYa jóvai.
27Jare Israel iñemuña reta oparandu yandeYa pe (echa käjou morogüɨrökuavee päve pegua oï joko pe jókuae ara,
28jare sacerdote Finees, Eleazar taɨ, Aarón jɨmɨmino oyapo mbaravɨkɨ jókuae ara), jei reta chupe: “¿Rojo yeta pa roñeraro orerëtara Benjamín iñemuña reta ndive ani mbaetɨta pa?” Jare yandeYa jei chupe reta: “Pekua, echa pɨareve che opata amee pepo pe.”
29Jayave Israel iñemuña reta oñemi kavi okätɨro ñogüɨnoi tëta Gabaa ikupe rupi.
30Jayave Israel iñemuña reta yogüɨraja ye Benjamín iñemuña reta pe mboapɨa ara pe, jare oyeapo kavi reta oñeraro vaerä Gabaa iyɨpɨ pe tenonde yave rami.
31Jare jekuae Benjamín iñemuña reta ñogüɨnoe ye oövaiti tovaicho reta, oeya mombɨrɨ katu tëta guasu jare omboɨpɨ oyuka reta amogüe jovaicho tenonde yave rami, tape ojo Bet-el kotɨ vae rupi jare Gabaa pegua ko rape rupi; jare oyuka reta treinta rupi kuimbae Israel iñemuña pegua.
32Jare Benjamín iñemuña pegua reta jei: “Ñamoamɨri reta ye tenonde yave rami.” Ërei Israel iñemuña reta jei: “Yatekuarai, mombɨrɨ ñogüɨnoe reta vaerä tëta guasu güi tape rupi.”
33Jayave Israel iñemuña reta opaete opüa oñemi kavi okätɨro ñogüɨnoia güi jare oyeapo kavi reta Baal-tamar pe, jare tëta guasu Gabaa ikupe rupi kapii tëɨa rupi oñemi kavi okätɨro ñogüɨnoi vae ñogüɨnoe vi joko güi.
34Jare oporepeña reta Gabaa re diez mil kuimbae oyeparavo Israel iñemuña reta ipɨte güi vae. Jare jeiete ñeraro, Benjamín iñemuña reta mbaetɨ oikuaa jaema ko ñamɨri ñogüɨnoi vae.
35Jare yandeYa omee Israel iñemuña reta pe omoamɨri vaerä Benjamín iñemuña reta, jókuae ara Israel iñemuña reta oyuka veinticinco mil cien kuimbae ñeraro regua reta Benjamín iñemuña pegua reta.
36Jayave Benjamín iñemuña reta oecha iñamɨri opɨta.
Echa Israel iñemuña pegua reta otekuarai ñeraro güi rami oyeapo, oecha yave Benjamín iñemuña reta yogüeru chupe reta, echa oyerovia jókuae oñemi kavi okätɨro ñogüɨnoi tëta Gabaa ikupe rupi vae re.
37Jókuae kuimbae reta opüa tëta Gabaa re iparanoe jare oyuka kɨsepuku pe opaete tëta guasu pegua.
38Echa kuimbae oñemi kavi okätɨro ñogüɨnoi tëta ikupe rupi vae reta omombeu Israel iñemuña reta pe ikañɨmaa vaerä tätati ɨvate opüa vae rupi, opɨ̈ro ma yave tëta guasu.
39Israel iñemuña reta jeiete oñemoñauka Benjamín iñemuña reta pe yave treinta kuimbae rupi omano; jayave jei reta: “Jaema ñamoamɨri tenonde yave rami.”
40Jökorai yave omboɨpɨ oyekuaa tätati tëta guasu kotɨ, jare Benjamín iñemuña reta omae yave jaɨkue kotɨ oecha reta tätati opüa ɨvate.
41Jayave Israel iñemuña reta oporepeña jovaicho reta re, jare Benjamín iñemuña reta okɨɨye echa oikuaa reta iñamɨri ma ñogüɨnoi.
42Otekuarai reta tëi Israel iñemuña reta güi ñuu kotɨ tape ojo vae rupi, ërei mbaetɨ ojoyepe reta, echa tëta opɨ̈ro vae reta ñogüɨnoe vi oövaiti jare opa oyuka.
43Jökorai opa oimama reta Benjamín iñemuña reta jare oaɨkuemoña opa regua oyuka Menúha güive Gabaa güi kuaraɨ oëa kotɨ regua.
44Jare Benjamín iñemuña pegua reta omano dieciocho mil kuimbae ñeraro regua reta.
45Ïru reta oyerova otekuarai ñuu kotɨ ɨ̈vavira Rimón kotɨ, ërei jókuae osɨi vae reta güi tape rupi opa oyuka cinco mil; Israel iñemuña reta jekuae oaɨkuemoña Gidom kotɨ jare oyuka reta dos mil kuimbae.
46Benjamín iñemuña reta ñeraro regua omano veinticinco mil kuimbae.
47Ërei seisciento Benjamín iñemuña reta otekuarai ñuu kotɨ ɨ̈vavira Rimón pe; joko pe yogüɨreko irundɨ yasɨ.
48Jare Israel iñemuña reta oporepeña ïru Benjamín iñemuña reta re jare oyuka reta kɨsepuku pe opaete kuimbae tëta guasu ñavo, oyuka reve mɨmba ani oipotagüe japerä rupi oïgüe, oapɨ reve tëta guasu reta.
Who We AreWhat We EelieveWhat We Do
2025 by iamachristian.org,Inc All rights reserved.
