NÚMEROS 25 - Guarani Bible with DC

Israel iñemuña reta omboete Baal-peor

1Israel iñemuña reta ñogüɨnoi Sitim pe; jare kuimbae reta omboɨpɨ iyaguasa kuña Moab iñemuña reta ndive,

2jókuae kuña reta oparea chupe reta yogüɨraja vaerä itumpa-raanga pe mbota omee retaa pe. Israel iñemuña reta okaru jare omboete jókuae tumpa-raanga reta,

3jökorai oyemboya reta tumpa-raanga Baal-peor re;Ap 2.14. jare yandeYa iyarasɨ ikotɨ reta,

4jare jei Moisés pe:

—Emboatɨ opaete mburuvicha reta tëta pegua, jare eyuvɨ cheróvai ara pe etei mburuvicha itumpa-raanga pota vae reta, jayave chearasɨ poita ikotɨ reta.

5Jayave Moisés jei Israel iñemuña reta oporojäa vae reta pe:

—Peyuka perëtara reta güi oyemboya tumpa-raanga Baal-peor re vae.

6Ërei ngatu metei kuimbae Israel iñemuña reta pegua güeru metei kuña Madián pegua jëtara reta ipɨte pe, Moisés jare opaete Israel iñemuña reta jovake, jae reta oyaeo ramboeve tupao guakapi pegua jöke pe.

7Jare Finees Eleazar taɨ, sacerdote Aarón jɨmɨmino oecha yave, opüa jëtara reta ipɨte güi, jare oipɨɨ metei mii;

8jare ojo jókuae Israel iñemuña reta pegua jaɨkue o guakapi pegua pe, jare oɨe rasa päve, kuimbae Israel iñemuña pegua jare kuña Madián pegua. Javoi osondo mbaerasɨ pɨ̈chɨi yae vae oparapiti oï Israel iñemuña reta ipɨte rupi vae,

9veinticuatro mil opa omano jae reta ipɨte güi.

10Jayave yandeYa jei Moisés pe:

11—Finees Eleazar taɨ, sacerdote Aarón jɨmɨmino omombɨta chearasɨ Israel iñemuña reta kotɨ, echa jae jägüɨro vi che rami jese reta. Jáeramo, cherägüɨro rupi mbaetɨ opa amboai Israel iñemuña reta.

12Jáeramo emombeu chupe reta, ayapo ko jae reta ndive morogüɨrökuavee päve mbɨakatu pegua;

13güɨnoita jae jare iñemuña reta jae jaɨkue rupi, morogüɨrökuavee sacerdote pegua jekuae avei pegua, jägüɨro cheré jeko pegua jare oyapo Israel iñemuña reta re Tumpa iñɨ̈ro vaerä mbaeyoa re.

14Jare jókuae kuimbae omano kuña Madián pegua ndive vae jee ko Zimri, Salu taɨ, metei tëtara Simeón iñemuña pegua güi tenondegua vae.

15Jókuae kuña jee Cozbi, Zur tayɨ, jae ko metei tëtara Madián pegua itenondegua.

16YandeYa jei Moisés pe:

17—Peporepeña Madián pegua reta re, jare opa peyuka,

18echa jae reta oiporarauka peve, ipoki rupi pembotavɨ omboeteuka peve Baal-peor, jare jeindɨ Cozbi rupi, metei tenondegua Madián pegua tayɨ, omano mii pe vae, ambou yave mbaerasɨ pɨ̈chɨi yae vae oparapiti, Baal-peor jeko pegua.