1 CRÓNICAS 28 - Guarani Bible with DC

David opa omboasa Salomón pe mbaravɨkɨ jare mborookuaía

1David omboatɨ Jerusalén pe opaete Israel iñemuña reta juvicha reta; ñemuña ñavo vae reta itenondegua, sundaro reta oyemboyao yao vae juvicha reta, jeta vae reta juvicha reta, mburuvicha guasu jare taɨ reta imbaeyekou re oyangareko vae reta juvicha reta, jare opaete sundaro ruvicha reta jare opaete isundaro reta jëia yae vae.

2Jayave David opüa oyemboɨ jare jei: “Peyeapɨsaka cheré, cherëtara aaɨu vae reta: Che ayemongeta tëi amopüa vaerä metei o, käjou morogüɨrökuavee päve pegua yandeYa imbae oiko avei vaerä pɨpe, joko pe ñaneTumpa güɨnoi vaerä iporookuaía; jare ayapokatu tëi ma opaete amopüa vaerä,

3ërei Tumpa jei cheve: ‘Nde mbaetɨta remopüa metei o cheree re, echa nde kuimbae ñeraro regua ko jare jeta reporoyuka.’

4Ërei ngatu yandeYa Israel iTumpa cheparavo opaete cherëtara reta ipɨte güi aiko vaerä mburuvicha guasurä Israel re jekuae avei pegua. Echa jae oiparavo ñemuña Judá mburuvicharä, jare Judá iñemuña güi oiparavo cheru, jare cheru taɨ reta güi che cheparavo aiko vaerä mburuvicha guasurä opaete Israel re.

5Jare añave, jeta cheraɨ yandeYa omee cheve vae güi oiparavo cheraɨ Salomón oiko vaerä mburuvicha guasurä yandeYa iporookuaía güɨnoi Israel re vae re.

6YandeYa jei vi cheve: ‘Nderaɨ Salomón omopüata chero jare cheroka, echa aiparavo cheraɨrä, jare che aïta turä,

7jare amomɨ̈ratata iporookuaía jekuae avei pegua, jae oñemoäta ngatu oyapo vaerä yave cheporookuai reta, añave oyeapo oï rami.’

8‘Añave, opaete Israel jovake, kuae yandeYa imbae oyemboatɨ vae reta, jare ñaneTumpa oyeapɨsaka yanderé vae jóvai peñovatu kavi jare peyapo opaete yandeYa Tumpa iporookuai, peiko avei vaerä kuae ɨvɨ kavi pe javoi pepuere peeya kuri peraɨ reta peguarä jekuae avei pegua.

9Jare nde cheraɨ Salomón, eikuaa cheTumpa jare eyeokuai chupe opaete ndepɨa jupi reve jare nekɨ̈reɨ ngatu reve kavi, echa yandeYa oecha opaete vae ipɨa jare oikuaa oipotagüe yemongeta. Jayave, nde reeka yave, jae omeeta ndeve reväe vaerä; ërei resɨrɨ ko yave chugüi, ndembosɨrɨta iyeugüi jekuae avei pegua.

10Mase, añave yandeYa ndeparavo remopüa vaerä chupe metei o mbaemboete pegua. ¡Jáeramo, eñemoäta ngatu jare eyapo!’ ”

11Jayave David omee taɨ Salomón pe, tupao iä oñejäa kërai oyeapo vaerä vae regua, o oñemopüa vae jare oñeñovatu mbae pɨpe vae, o ɨvate vae pegua o raɨ reta, jare tupao rapɨpe ñɨ̈ro renda.

12Omee vi chupe opaete oyemongeta oyapo vaerä vae iä oñejäa kavi reve tupao joka jare o raɨ reta ñogüɨnoita iyɨ́vɨri rupi vae, mbae jepɨ vae reta oñeñovatu pɨpe vaerä, jare mbota reta oñeñono tee vae oñeñovatu pɨpe vaerä,

13jare o raɨ reta sacerdote reta jare levita reta oyopoepɨ mbaravɨkɨ güi yave peguarä, jökoraiño vi opaete tembiporu oyeporu yandeYa jo peguarä vae.

14Omee vi chupe jeta oro jare korepoti oyapo vaerä tembiporu oro pegua jare korepoti pegua, oyeporu vaerä tupao pe mbaemboete oñemee yave yandeYa pe;

15omee vi chupe oro oyapo vaerä mechero jare jendarä; jare korepoti oyapo vaerä mechero jare jendarä; omee chupe jaekavi oupitɨ vaerä metei ñavo; oyeporu vaerä tupao pe mbaemboete oñemee yave yandeYa pe;

16omee vi jeta oro jare korepoti oyapo vaerä mesa mbaemboete pegua, omee chupe jaekavi oupitɨ vaerä mesa ñavo oro pegua jare korepoti pegua, mbɨyape mbaemboete pegua oyemboyoarambo kavita oñeñono jese vae.

17Omee vi chupe oro oyapo vaerä tɨ̈ai reta, ɨrɨru reta, kopa reta jare tasa reta, jare korepoti oupitɨ kavi oyapo vaerä tasa reta.

18Omee vi jeta oro oyeambae, ikäti kavi vae incienso oyeapɨ jese vae peguarä, jaeramiño vi omee chupe oro oyeapo vaerä araɨgua reta iä jendarä, ipepo omoata vae pe omoia käjou morogüɨrökuavee päve pegua yandeYa imbae vae reta.

19David jei: “Jae kuae opaete yandeYa oechauka cheve mbaembae oyeapota vae iä reta, jae oikuaauka cheve këraita oyeapo opaete mbaravɨkɨ vae.”

20Jayave David jei taɨ Salomón pe: “¡Eñemoäta ngatu jare eñemomɨ̈rata, eyapo mbaravɨkɨ! ¡Agüɨye eyembopɨtu jare ekɨɨye, echa yandeYa cheTumpa oïta nde ndive! Jae ngaraa ndereeya ani osɨrɨ ndegüi opa reyapo regua mbaravɨkɨ yandeYa pe: Tupao jare opaete oyeporuta pɨpe vae.

21Ko ñogüɨnoi sacerdote jare levita reta mbaravɨkɨ oyapo vaerä tupao pe; ñogüɨnoi aveita nde ndive opaete mbaravɨkɨ pe; jökoraiño vi ikɨ̈reɨ ngatu vae reta jare ipɨarakuaa opaete mbaravɨkɨ pe vae, mburuvicha reta jare opaete vae oyapo vaerä nde rere vae.”