JOB 38 - Guarani Bible with DC

Job oikuaambae vae yandeYa oikuaauka chupe

1Jayave yandeYa jei Job pe, kusumirou ipäu güi:

2¿Kia nunga mbatee pa nde, arakuaa reñova vaerä

ñee reta arakuaambae pe?

3Añave eyeumbɨkua kuimbae rami;

che aparanduta ndeve, jare nde emboyevɨ cheve.

4¿Ketɨ pa nde reiko che ayapo ɨvɨ yave?

¡Eikuaauka cheve renoi yave arakuaa katu!

5¿Kia pa jei këraita ko ipɨgüe vae, reikuaa yave; jare kia pa ojäa?

6¿Mbae re pa oyemboguapɨ oï iguapɨka reta?

Jare, ¿kia pa oñono tenondegua ete ita?

7Opaete yasɨtata reta köeti yave omoembipe vae ombaemboete yave,

jare araɨgua reta opaete oyerovia katu yave.

8¿Kia pa oyopia ɨguasu,

oyepɨyere yave jembeɨ güi?

9Che añono jemimonderä amapɨtu

jare iñomaarä ɨ̈vɨti.

10Añono jembeɨrä

jare ayokenda jöke oë jupi vae.

11Jae chupe: “Kuae peño reyuta reväe,

kuae pe opata ndeɨaparúa.”

12¿Opaete ara reikove reiko ramboeve,

rere pa yasɨtata guasu köe jerúa pe,

oë vaerä jare köe güeru vaerä?

13¿Jókuae tembipe oesape vaerä opaete ɨvɨ,

jare jeko pɨ̈chɨi vae reta yogüɨraja vaerä oñemi?

14Jayave oyekuaa kavi opaete ɨvɨ, ipïra temimonde rami.

15Tembipe omboavai iyoa vae reta,

jare omomburu vae mbaetɨ oyapo.

16¿Reike pa nde ɨguasu jesaɨa kotɨ,

jare reike pa remae ɨvɨsoro guasu iyɨvɨte rupi?

17¿Oyeechauka pa ndeve mano jöke,

reecha pa mano jöke reta iä?

18¿Reikuaa pa ɨvɨ ipɨguasugüe?

Reikuaa yave ere opaete kuaekuae reta.

19¿Kerupi pa tape ojo tembipe renda kotɨ vae?

Jare ¿ketɨ pa oime pɨtumimbi renda?

20¿Reraja vaerä reroväe iyapɨ pe,

jare reikuaa jëta jape?

21Nde reikuaa ko aipo,

echa güɨramoi rea ma jókuae ara yave,

jeta año ma ko aipo renoi.

22¿Reike pa remae iroɨ jɨru pe,

ani amandau jɨru pe?

23Añovatu mbɨatɨtɨ iara peguarä

jare ñoraro reta iara peguarä vae.

24¿Mbae nunga tape rupi pa opa oñemoai tembipe,

jare ketɨ rupi pa oñemoai ɨvɨtuakuvo reta ɨvɨ iárambo rupi?

25¿Kia pa oipea tape ɨporu pe,

ama-vera jare ararɨapu pe?

26Omongɨ vaerä ɨvɨ ipombae re,

ñuu ipombae re mbaetɨ kuimbae reta oñemoëta vae rupi.

27Omoäkɨ vaerä ɨvɨ ipombae jare oñeotɨmbae vae;

ombojokɨ vaerä ñana ipɨau vae.

28¿Kia pa ama ombou,

ani kia pa omondɨkɨ ɨsápɨi?

29¿Ketɨ güi pa oë iroɨ,

kia pa ombou?

30Ɨ reta opa oñemotäta ita rami,

jare ɨguasu iárambo rupi opa täta.

31¿Ndepuere pa remboatɨ renoi meteia peño yasɨtataatɨ Pléyade jee vae,

ani reñono tee yasɨtataatɨ Orión jee vae?

32¿Nde pa rembou yasɨtata köe jerúa iora pe kavi,

ndepuereta pa reyókuai oguata, yasɨtataatɨ Osa Tuicha vae opaete iyasɨtata ndive?

33¿Reikuaa pa nde kërai ko ara re ñogüɨnoi vae reta?

¿Jókuae mbaepuere joko pegua pa reipota reyapo ɨvɨ pe?

34¿Ndepuere pa reyókuai amapɨtu reta,

güɨnoi vaerä jeta ɨ?

35¿Ndepuere pa remondo ama-vera reta yogüɨraja vaerä,

jae reta jeita ra ndeve: “Ko roï, oreokuaiño”?

36¿Kia pa omee yandeɨvɨte pe arakuaa katu,

güɨra reta pe, güɨratï pe ani takareo pe?

37¿Kia pa yarakuaa katu jare oikuaa amapɨtu mbovɨ ra ñogüɨnoi vae,

kia pa omoäpɨata amapɨtu, okɨ vaerä?

38Ɨvɨkúi reta opa oñemotäta yave,

ɨvɨkɨ̈ta reta opa oya oyoe.

39¿Nde pa reeka yaguapope kuña jembiarä,

omongaru vaerä imembɨ reta jɨ̈vɨata regua,

40oyapakua reta yave ikua pe,

oñemi reta ñogüɨnoia pe?

41¿Kia pa omee uruapúa reta okaru vaerä,

imembɨ raɨ reta jäse chekotɨ yave,

jare oguata reta oipota rupi yɨmbɨaɨ jeko pegua?