1CheRu Tumpa, amboete vae,
agüɨye nekïrii epɨta;
2echa jupimbae jare iporombotavɨse vae imiari kaviä chekotɨ;
iyapu reve imiari reta cheré.
3Cheatɨ reta ñee ñemotareɨ pegua pe,
¡oñemopüa reta chekotɨ jupimbae reve!
4Cheporoaɨu omboekovia reta cheve ñemotareɨ pe;
ërei ngatu che ayerure.
5Chepɨa kavi, omboekovia reta cheve ikavimbae pe,
jare cheporoaɨu, ñemotareɨ pe.
6Emopüa chupe reta jupimbae vae,
Satanás toï iyakatu pe.
7Oñejäauka yave, topɨta teko pe;
jare iñee reta toyeapa jese.
8Agüɨye toiko puku;
ambuae vae topɨta jekovia pe.
9¡Taɨ reta toiko tɨ̈reɨ,
jare jembireko toiko imemano vae!
10¡Taɨ reta toguata reteiño,
jare toyerure toyogüɨreko reta tembíu re,
mombɨrɨ rupi jo oyemboaigüe güi!
11Mbia iya, topa topɨ̈ro imbaembae chugüi reta.
Ketɨgua reta topa topɨ̈ro chugüi reta, iparavɨkɨ rupi güɨnoigüe.
12Agüɨye kia toiparareko tomae jese,
ani taɨgüe tɨ̈reɨ reta re ave.
13Topa tokañɨtei iñemuña reta,
topaetei tokañɨtei jee.
14YandeYa timaendúa tu oyapo ikavimbae vae re,
jare ichɨ iyoa agüɨye tomboai;
15agüɨye yandeYa tiñakañɨ iyoa reta güi,
topa etei tomokañɨtei ɨvɨ güi.
16Echa mbaetɨ imaendúa oporoparareko vaerä,
oiporarauka paravete vae pe, oñemomichi vae pe,
jare oiporara oiko vae pe, oyuka vaerä.
17Iyepopeyuse yae, jayave ¡toyepopeyu reta jese vae!
Mbaetɨ oipota ñee kavi, jayave ¡agüɨye etei tiñee kavi reta ikotɨ vae!
18Toñova yepopeyu, jemimonde oñova rami;
toike jɨe pe ɨ rami,
jare ikägüe reta rupi asaite rami.
19¡Toï chupe jemimonde rami,
ani ikuakuaa oyeumbɨkua pɨpe vae rami!
20¡Körai cheYa tomboepɨuka, chemboeko vae reta pe,
ñee ikavimbae jei chekotɨ vae reta pe!
21Ërei nde cheYa Tumpa,
eyapo ikavi vae cheve, nderee reaɨu vae jeko pegua;
¡chereepɨ, echa ndeporoparareko ikavi yae ko!
22Echa chepɨatɨtɨ jare cheporiau aï,
chepɨa ipere rami oï cheɨvɨte pe.
23Cheara oasa ojo oiko, küaraɨa oasa rami;
¡aiko, ɨvɨtu opa güɨraja tuku vae rami!
24Chetava reta jëogüe mbaetɨ akaru jeko pegua,
jare cherete ipɨtu chepiru ramo.
25¡Che aiko chupe reta, iñee kaviä vaerä cheré!
¡Omae reta cheré yave, ombovava reta iñäka cheyóyai!
26Chemborɨ, cheYa Tumpa;
¡chereroasayepe ndeporoparareko oï rupi!
27Toikuaa reta ndembaepuere,
nde cheYa ko reyapo kuae vae.
28Yepe tëi jae reta oyepopeyu cheré,
ërei nde ndeporerekua cheré;
yepe tëi jae reta oñemopüa chekotɨ,
ërei toñemomaraiuka reta,
jare che nderembiokuai tayerovia.
29¡Imiari kavimbae cheré vae reta, timara topɨta!
¡Mara toñova reta temimonde rami!
30Atairarita cheYa pe, tuicha rupi;
¡jeta vae reta ipɨte pe tamboete!
31Echa jae oñeñono omborɨ vaerä paravete vae reta,
oepɨ vaerä omboeko vae reta güi.
Who We AreWhat We EelieveWhat We Do
2025 by iamachristian.org,Inc All rights reserved.
